Kangka nna hpring zup ai kanu kawa ni byin tai lu na matu masa lam kaja ni

Tsawra ai kun dinghku kanu kawa ni kangka nna hpring zup ai kun dinghku kanu kawa byin tai lu na matu masa lam kaja ni hpe gam garan ya na nngai. Anhte kanu kawa ngu ai ni gaw kashu kasha ni hpe shangai chyinghkai ai hte sha gaw lit kangka sai ngu nlu tsun nga ai.

Kashu kasha ni galu kaba bawngring lam ni a matu ra ahkyak ai nga sa lu sha lam ni hpaji sharin ai lam hte shinggyim mungkan hta atsawm sha nga lu na matu shakut nna lam madun sharin shaga ra nga ga ai.

 Dai re majaw anhte kanu kawa ngu ai ni yawng gaw anhte a kashu kasha ni yawng hpe tinang byin shangun, galaw shangun mayu ai lam hpe shadip shagyeng ai lam n galaw ai sha bawngban jahkrup nna galaw ai gaw grau nna kaja nga ai.

 Anhte kanu kawa ni gaw anhte kashu kasha ni hpe byin shangun mayu myit hte ma ni a myit ra hpe nmyit ya ai sha aw ra, le ra galaw ra ai ngu shadut tsun chye nga ga ai.

Dai lam gaw jaw kaja ai masa lam gaw nrai nga ai. Anhte kashu kasha ni byin mayu ai myit ra lam hpe atsawm sha madat nna ra ai hpe lam madun shading sharai ai lam galaw ya ra ai rai nga ai .

Ga shadawn shanhte myit lawm ai ginsup hpan,madum sumpi lam ni zawn re ai hta tsaw dik madang de du hkra ra ai sharin dabang ni hpe lung sharin hkaja shangun ai lam gaw jaw kaja ai lam rai na re ngu mu mada ai.

Bai nna tsawra ai nu wa ni anhte kashu kasha ni hpe ahkyak ai gaw tinang hkum tinang kamhpa chye hkra sharin ya ra nga ai. Anhte kanu kawa nkau gaw tinang a kashu kasha ni hpe tsawra ai majaw pu sin hkren yawng hkan galaw ya, myit ra hkan ya chye ga ai.

Dai gaw shut ai lam re ngu mu mada ai. Hpa majaw nga yang ndai zawn galaw ya ai lam gaw kashu kasha ni hpe mak kara galaw mayu myit hpe rem da shangun ai rai nna, aten du jang shanhte lagaw shanhte tsap ra sai nga ai hte anhte ya zawn galaw ya ai lam gaw shut nga ai ngu mu mada myit malai chye nga ai.

 Dai re majaw kashu kasha ni hpe lu sha ai kaw nna hpang let jawng kaw nna lawm pru wa ai nta laika ni hpe galaw ai,manghkang langai hpe hparan ai ten shanhte a atsam hte shanhte galaw lu ai atsam nga wa hkra kaji ai kaw nna lam madun woi galaw ya ra nga ai.

Bai nna tsawra ai nu wa ni e anhte kashu kasha ni a shawng hta  anhte a lai kyang hpe sadi hting hkang ra nga ga ai. Anhte kashu kasha ni htep dik ai hku nna len la chye ai gaw kanu kawa ni rai nga ai. Shanhte gaw anhte galaw lam mahkra hpe galoi mung lat yu nga chye nna aten lu ai hte tinang galaw ai hku raw rai galaw chye nga ai.

 Dai re majaw anhte kanu kawa ni kaw nna shanhte a shawng hta nkaja ai lai kyang ni langai pyi n galaw hkrup hkra sadi maja ra nga ai. Anhte kashu kasha ni hpe tsawra matsan dum chye ai lam,myit tau ya chye ai lam,hkungga lara chye ai lam,lai len kaja ni hpe kaba wa shangun mayu ai nga jang anhte kanu kawa ni hkum kaja ai lam madun ni byin na matu ahkyak nga ai.

 Bai anhte a kashu kasha ni hpe gaya n jahkrum ga.Anhte kanu kawa ngu ai ni mung shinggyim masha re majaw kalang marang gaw kashu kasha ni a ntsa masin pawt ai lam ni nga chye na re ai hpe chye na ai. Raitim gara hku mi pawt mayu ai nga tim shanhte hpe gaya jahkrum roi ai ga ni hpe gaw anhte tsep kawp koi gam ra na ga ai.

Anhte nkau ga si ni gaw gayet ai hta grau machyi ai hku hkam sha ai ngu ai lam hpe anhte na yu na ga ai. Bai nna anhte a kashu kasha ni hpe tsawra ai ngu ai lam hpe madun dan na matu mung ahkyak nga ga ai.

Anhte nkau kanu kawa ni gaw nye a kashu kasha ni hpe kraw salum hta tsawra taw nga ai gaw shaw madun dan nra ai,ngai ya ten kashu kasha ni hpe aten nlu jaw ai gaw shanhte a shawnglam prat a matu magam bungli galaw nga ai ngu myit chye ga ai.

Raitim dai gaw shut ai masa lam re ngu mai tsun nga ai. Tinang gaw kade mi zim rai nga ai,bungli law kyin nga ai raitim kashu kasha ni a ntsa tsawra ai lam tsawra shawang myit hpe gaw shani shagu madun dan ra nga ai. Grai gaw nra ai bungli sa hkyen ai ten,bungli kaw nna du wa ai ten hta shanhte hpe ahpum abup ai lam sha gaw madun lu yang mai ai.

Anhte kanu kawa ni kaw nna tinang shut ai lam galaw hkrup yang dai shut ai lam hpe masat masa galaw nna kashu kasha ni hpe hpyinem ga tsun shaga ra nga ai. Ngai gaw kanu kawa she re ndai daram sha shut ai gaw hpa nra ai ngu nmai myit la ai. Dai rai yang kashu kasha ni gaw tinang a nkaja ai lai kyang hpe len la chye wa na rai nga ai.

Bai nna tang du ai rit kawp tara ni hpe masat da ya ra nga ai. Ndai hta rit kawp tara law law hpe masat tawn da nna kashu kasha ni hpe hting hkang na matu tsun mayu ai gaw nrai nga ai.

Ra wa yang ra ai hku shayawm ai,shakang ai lam ni galaw nna kumhpa jaw dam jaw ai ladat hpe mung jai lang mai nga ai. Dai hku nre ai sha ladu shalai myit ra hkan ya ai lam gaw anhte kashu kasha ni hpe jahten chye ai majaw ndai lam ni a ntsa ra yang ra ai hku shading sharai jai lang mai nga ai.

Hpang jahtum hku nna kashu kasha ni hte  shada mung jahta tsun shaga hkat lam galaw ya ra ai. Anhte kanu kawa law malawng ni gaw kashu kasha ni hpe sharin shaga na matu kanu kawa langai hku nna ga shaga na hpe sha myit lu chye nga ai.

Raitim jahkring hkring ngu na daram kashu kasha ni tsun ai ga hpe bai madat ya nna shanhte hte jahta chyai ai lam gaw kanu kawa hte kashu kasha lapran grau nna ni htep wa shangun nga ai.

Anhte kanu kawa shagu gaw kashu kasha ni a ntsa tsawra shawang myit gaw grai law htam nga ai ni rai nga ai.Raitim kalang marang ndai lam ni gaw tsawra shawang myit ni a majaw shut ai lam byin wa chye ai majaw lahta de na lam ni hpe jai lang ai rai yang kashu kasha ni matu kangka ai hte hpring zup ai kanu kawa ni byin lu na rai nga ai.

By; munghkrang