Madu jan madu wa shada ga law ninggyet hkat ai raitim myit mahyi hkat ai lam nnga hkra sadi ga

Dinghku kata hta madu jan madu wa shada ga law ninggyet ga law hkat ai raitim myit machyi hkat ai lam nnga hkra sadi nga ga. Anhte gaw madu jan madu shada da,dum nta masha shada mi rai rai kalang marang myit shut ga li ga law hkat lam gaw anhte masha shagu gaw hkrum sha ga na ga ai.

 Dai zawn ga law ninggyet hkat ai majaw tinang tsawra ai ni hku hkau ai ni hpe sum kau ra ai ni mung nga chye ga ai. Anhte tsawra ai ni hte ga law ninggyet hkat ai lam gaw dawdan yak ai lam rai nna grai nna gwi gwi dawdan ra ai lam rai nga ai.Kalang marang ntau shalau tinang a myit hpe nlu hting wa yang ga law ninggyet ai lam gaw grau sawng wa ai masa de du mat nna kanawn mazum lam hpe mung hten wa shangun chye nga ai.

Ntara jang gaw zim rai nhkam nga ga. Raitim shi a pawt sin dawng ai hte shingjawng nna tinang a pawt sindawng ai hpe njai lang hkrup na matu sadi ra nga ga ai.

 Masa lam langai ngai a majaw madu jan madu wa lahkawng shada da masin pawt hkat nna ginhtang tsun shaga ai ten ni hta langai hte langai shayawm hkat ai lam nlu galaw hkat nna masin pawt ai myit machyi ai lam ni hte kapaw hkat ai lam ni sawng laja wa jang gaw nbyin gring ai nju ndawng hkat ai lam ni du hkra byin chye nga ai majaw sadi ra nga ga ai.

Masin pawt ai myit ni hte langai hte langai ga law ninggyet hkat ai shaloi tinang dang mayu ai myit hte dasang nan ningrum machyi hkra na ga si ni hpe lata tsun shaga ai lam ni anhte galaw chye ga ai.

Ningrum hpe dang yang rai sai ngu ai myit hte hpang de byin wa chye ai lam ni hpe nmyit ai sha tsun chye, galaw chye ai lam ni gaw kun dinghku hpe hkra machyi shangun nga ai.

Ningrum kaw na myit nlu hting ai majaw masin pawt ai hte tsun hkrup dat nna ga law hkat jang gaw tinang a masin hpe hting hkang la ga.Masin pawt ai hte n jut shanawng chye ai ga si ni hpe ntsun hkrup hkra sadi htinghkang ra nga ga ai.Tinang hte ningrum rau myit azim sha zim mat ai hte myit zim myit sa ten hta she hparan lajang gring nga ai re.

Ga law ninggyet hkat ai ten anhte myu shayi ni law malawng gaw hkam sha lam hpe ntsun ai sha myit ndik ai lam hpe sha tsun chye ai majaw maga mi maga na wa chye na ya hta shi hpe mara shagun ai ngu sawn la nna grau nna myit ndik rai byin chye nga ai.Pawt mung grau pawt chye nga ai.

Dai majaw ga law ninggyet hkat ai shaloi myit ndik ai lam hpe ntsun ai sha,shi galaw ai lam a majaw myit yawn myit npyaw ai hkam sha lam hpe tsun ai gaw grau kaja nga ai.

Tinang a hkam sha lam hpe sha tsun ai shaloi gaw maga mi na wa mung tinang a ntsa chye myit tau ya nna ga law ninggyet hkat ai masa lam hpe chye na bawngban jahkrum lu ai madang de galai du wa lu nga ai.Tinang a hkam sha lam hpe tsun ai re majaw ningrum kaw nna myit tau chye na wa ya lu ai lam ni mung nga wa chye nga ai.

Dai hta n ga tinang kaw nna mung masin pawt ai lam hpe ndang hkang lu ai majaw mi rai rai ndum sadi dat lu ai mi rai rai shi hpe hkra machyi hkra tsun hkrup ai rai yang gaw bai hpyinem dat ga ngu tsun mayu ai.

Anhte hpyinem lajin laroi  shagu gaw hkret sum ai,asum jaw ai shayawm ya ai lam gaw nrai nga ai.Nang jaw ai ngai shut ai ngu ai masa lam mung nrai nga ai.Anhte gaw tinang maga kaw nna kaga masha wa hpe myit dingbai dingna jaw hkrup ai rai yang gaw hpyinem lajin laroi ga tsun gring ai ngu mu mada ai.

Tinang tsawra ai wa ntsa hta nga jang gaw tsawra myit hte nkau masa lam hta tinang jaw ai raitim hpyinem ra ai lam nga nga ai.Gara hku mi rai rai tinang a majaw tinang tsawra ai wa myit masin machyi hkam sha ai nga jang gaw hpyinem let bai hprinem wa ai masa lam ni hpe bai lu la hkra galaw la ra nga ga ai.

Bai nna anhte ga shaga ai shaloi anhte shinggyim masha ngu ai ni gaw masin pawt wa jang nsen tsaw ja wa chye nga ga ai.Anhte lahkawng maga ga law ninggyet hkat ai shaloi langai gaw nsen tsaw ja ai hte tsun wa jang maga wa mung bai nsen ja marawn let ninggyet hkat ai lam gaw grau sawng ai madang de du wa shangun chye nga ai.

Dai majaw ningrum wa kaw nna ga ja nsen tsaw ai raitim tinang maga kaw nna nsen hpe shayawm let nsen man man hte myit zim myit sa hte tsun shaga ai rai yang gaw ningrum hpe mung yawm wa shangun nga ai.Dai hta n ga byin chye ai lam ni nga chye nga ai.

Anhte gaw ga law ninggyet hkat ai shaloi maga mi na wa hpe hparan tsun sanglang lam njaw ai sha tinang tsun mayu ai lam hpe sha shanawng tsun shaga nga ai lam gaw grai sawng ai lam rai nga ai.

Anhte shinggyim masha shagu gaw tinang jaw ai sha shadu sawn la chye ai ni hkrai rai nga ai.Dai shi tsun mayu ai hpe  shawng tsun shangun nna htum hkra madat ya ga.Ngut jang she tinang tsun mayu ai lam hpe matut tsun ai gaw kaja dik rai nga ai.

Dai gaw ga li ga law ninggyet hkat ai masa lam kaw nna malan pru wa lu nna tinang tsun ai ga mung shi a na hta shang na sha rai nga ai.Anhte nkau shinggyim masha ni gaw ga law ninggyet dat lu yang she,tinang tsun mayu ai lam hpe tsun kau dat lu yang she myit hta atsang nga ai zawn hkam sha ai ni mung nga chye ga ai.

Dai re  anhte a kun dinghku galoi mung grau nna ngwi pyaw simsa nga pyaw na matu gaw tsun shaga ai lam hta myit masin machyi hkam wa chye ai lam hpe koi gam nga ga law.

By; Munghkrang