Hpring zup ai kun dinghku dum nta byin wa na matu ra nga kun dinghku dum nta masha ni a yaw shada lam ni

Tsawra hkungga nu wa ni hpring zup ai kun dinghku dum nta byin tai wa na matu gaw langai hte langai kam ai,shada chye na hkat ai hte tsawra myit sindun sumri nga na matu mung ra ahkyak nga ai re.Dai hku sha yu maya rai nga yang gaw byin wa na nrai nga ai.

Kanu Kawa ni kaw nna bungli,ja gumhpraw a matu shawng lam masing nga ai zawn dinghku dum nta hte seng wa yang mung, kun dinghku a yaw shada bandung ngu tawn da na matu mung ra nga ai re.Kun dinghku yaw shada bandung nga yang she kun dinghku nta masha shada da tsawra shawang myit dum sumri grau nga wa na sha rai nga ai.

Nga Pyaw ai kun dinghku byin wa na matu gaw lahta de tsun lai wa sai kun dinghku nta masha shada da kam hpa hkat ai,chye na hkat ai hte tsawra shawang myit dum sum ri nga ra ai. Dai hku sha yu maya rai nga yang gaw byin wa na nrai nga ai.

Kun dinghku a yaw shada lam nga nna langai hpang langai galaw shapraw sa  wa yang she  Kanu yan Kawa a mungkan kashu kasha ni a hkring sa shara pyaw hpa ginra tai wa lu na rai nga ai.

Dai hta ai anhte Kanu Kawa ni tawn da ra ai Kun Dinghku a yaw shada lam ni gaw shani shagu na yaw shada lam ni tawn da ai zawn Kun Dinghku hte seng nna mung shani shagu yaw shada lam tawn da ra ai.

Kun Dinghku a yaw shada lam ngu ai hta anhte a Kashu Kasha Ma ni hpe dai ni Mau Mwi kade hkai dan na,Kun Dinghku nta masha ni ahkum ara shat jawm sha ai,Sumla hkrum wa yu ai zawn re ai hpe tsun mayu ai rai nga ai.

Ndai zawn galaw ai rai yang she Kanu yan Kawa mung Ma ni mung shada da kanawn mazum tsun shaga ai lam hta  tsawra shawang myit dun sumri grau nna makyit ngang wa lu na sha rai nga ai.

Bai nna Hkamja lam hpe yaw shada ai mung grai nan ahkyak nga ai.Kun Dinghku dum nta hta nta masha langai ngai machyi yang machyi ai wa mung hkam sha yak ai zawn kaga  dum nta masha ni mung myitru ai myit yak ai lam nga ai zawn ja gumhpraw mung htum ra nga ai re.

Dai re majw Kun Dinghku masha ni a Hkamja lam hte seng nna anhte Kanu yan Kawa ni hta lit kaba nan rai nga ai.Dai re majaw Kun Dinghku dum nta masha ni yawng ngwi pyaw hkamja na matu dum nta masha ni yawng hkamja lam hpe madi shadaw ya lu ai hkum hkrang shamu shamawt lam hkawm ai,hkamja lam hte htuk ai malu masha dum nta masha yawng rau jawm lam hkawm ai zawn re ni hpe shani shagu galaw ya na matu grai nan ahkyak nga ai re.

Bai nna Ja Gumhpraw yaw shada lam rai nga ai.Kun Dinghku langai hpring hpring zup zup hte nga lu na matu gaw Ja Gumhpraw ahkyak ai madung shara hta lawm nga ai re.Anhte Kanu yan Kawa ni tam la lu ai Ja Gumhpraw ni hpe Kun Dinghku a shawng lam a matu mahkawng da ai hte arang galaw ai ni hpe galaw ra nga ai.

Ma ni hpaji lam shabrai,Kun Dinghku a hkamja lam,Shaning htum ai shaloi Kun Dinghku nta masha ni hkrun lam hkawm ai shaloi ra ai lam,lama na kanu (snr) kawa bungli kaw na hkring pru ai shaloi Kun Dinghku hta malu masha,pu na hpun na yak hkak ai lam nnga hkra tau nau hkyen lajang da ai lam hte kajawng kaja byin pru wa ai ahkyak ni  a matu mahkawng da ai zawn re hpe hparan lajang lu na matu yaw shada mahkawng da ai lam ni mung galaw ra ai re.

Dai rai yang she Kun Dinghku hta Ja Gumhpraw grai nan yak hkak ai lam ni hpe yawm shangun nna Kanu yan Kawa a myitru lam hpe mung yawm shangun na sha rai nga ai.Bai nna anhte a Kun Dinghku hta dum nta masha ni yawng lit magam ni hpe atsawm sha garan galaw ai lam mung ahkyak nga ai.

Ndai zawn nta bungli ni hpe lit garan galaw ai lam mung Dinghku hpe ngwi pyaw shangun lu ai rai nga ai.Kanu si shat shadu ai rai yang Kawa gaw nta jasan japan lam galaw ai Ma ni gaw Ban Hkawan kashin maza hta ai zawn re hpe shani shagu lit la garan galaw na matu mung dinghku ngwi pyaw na matu ahkyak nga ai re.

Anhte Kun Dinghku nta masha ni shada da matut hkat ai lam mung ra nga ai.Bungli hkringsa rau ai ten ni hta Kun Dinghku Kanu yan Kawa hte Ma ni rau rai Sumla hkrung wa yu ai,Muk zawn rai rau galaw sha ai,Rau jawm shaga ai hte rau hkrun lam hkawm ai zawn re ni hpe galaw ra nga ga ai re.

Ndai zawn galaw na matu mung tau nau masing masa galaw da na matu mung ra nga ai re.Ndai zawn re ai hpe jahkring hkring galaw gring nga ai re.Bai langai gaw sharin ya ai lam rai nga ai.Ma ni hpe laika shaman sharin ya ai,nchye na ai laika ni hpe tsun dan ai.

Shanhte a nta laika ni hpe jawm sharin galaw ya ai ndai zawn re ai lam ni hpe anhte Kanu yan Kawa ni shani shagu galaw ya ra ai  Kun Dinghku a yaw shada lam hta bang da na matu ahkyak nga ai re.

Dai majaw anhte a Kun Dinghku ngwi pyaw ai hpring zup nga pyaw ai dinghku byin tai na matu gaw lahta de tsun lai wa sai zawn kaja ai  yaw shada lam ni nga ra ai hte  kaja wa nan mung anhte yawng hkan nang hkan sa jawm shakut ai rai yang anhte a Kun Dinghku gaw hpring zup nga pyaw wa na gaw teng sha rai nga ai.

By; Mung Hkrang