Awng Dang Ai Lam Hte, Tau Hkyen Lajang Ai Lam

Tau hkyen lajang ai hpe masha shagu nra ma ai. Grau nna akajawng galaw chye ai akyang nga ai ni nra ma ai, kaja wa nga yang, dai zawn aten ni yang she, galaw dat ai lam ni gaw, myit tsam pu tsam pa lam ni hte myit ningma ni hpe byim shangun chye nga ai, grau nna hkra machyi ai gaw  hkam kaja lam rai nga ai, hkyen lajang na ten nlu mat ai bungli nga yang gaw kaning ndi nga ai, dai zawn akajawng galaw shakut ra ai ga rai nga ai.

Tsawra ai ramma ni, tau hkyen lajang ai a majaw, lu la ai akyu chyeju ni kaw na langai gaw, mang hkang ni hpe lawan ladan lu hpran ai hte, grau nna tang du ai hku galaw shakut lu ai atsam nga ai nga nna, sawk sagawn da nga ma ai hpe mu lu ai.ndai gaw majaw ngu ai ta nga yang, nang kaw tau hkyen lajang da ai a majaw mang hkang ni hpe hpran na lam yan ni nga ai majaw rai nga ai.   

Shiga shapoi ai wa langai hku nna, tinang ndau shana na shiga hpe tau hti da ai nga yang, kaja wa shiga ndau shana ai ten hta, shut ai lam yawm wa na rai nga ai, pinra ntsa kaw tsun shaga na ni mung, mahkyen lamang tsun shaga ya na wa mung, dai hte maren sha rai nga ai, tau hkyen lajang ra ai, hpang langai gaw, interview galaw na matu mung tau hkyen lajang ra ai sha rai nga ai, dai majaw, tau hkyen lajang ai ngu ai gaw, masha ni yawng hta grau nna, magam dap shang nga ai ni hte bungli madu ni a matu, hku hkau da sai masa lam mung rai nga ai, chyinghkai kanu ni pyi manap shat ni, shana shat ni a matu, tau hkyen lajang da ga ai re, dai majaw nang mung tinang galaw ra ai lam yan a matu tau hkyen lajang u ngu n gun jaw mayu ai.

American gumsan magam Abraham Lincoln hku nna mung, ndai tau hkyen lajang ai lam hte seng nna, “ Ngai hta hpun langai hpe kran na matu hkying hkum 8 ram aten lu na rai yang, ngai lang na ningwa hpe hkying hkum 6 daram garang ra na re ’’ nga nna tsun da ga ai hpe na yu na ni law na re... dai majaw, tau hkyeng lajang ai lam ngu ai gaw, nkau yaw shada lam hte galaw sa ai lam ni n galaw shi yang, tau nna jin jin galaw lajang da ai lam hpe tsun mayu ai rai nga ai, ginsup ai masha ni tau hkyen lajang ma ai, nbungli line galaw ai nbungli gau masha ni tau hkyen lajang ma ai, bai yu ngwi ninghkring ni hte shingni hpaji du ni tau hkyen lajang ga ai, dai zawn sha.. masha shagu grau  nna, awng dang ai ni yawng hte gaw tau hkyen lajang ai lam nga ai ni chyu rai nga ai, tsawra ai ramma ni mung tau hkyen lajang nga ai kun? ga san san mayu ai

Kaja wa nga yang tau hkyen lajang ai lam ngu ai gaw, pyaw hpa lam gaw nrai nga ai, ajin aban byim shangun nga ai tau hkyen lajang na matu aten jaw ra ai, n gun atsam jai lang ra ai, dai majaw masha shagu nkam galaw ga ai, raitimung awngdang ai lam ngu ai gaw dai tau hkyen lajang ai lam kaw na sa wa ai rai nga ai. tau hkyen lajang ai aten ladaw hta kaja ai ningmu ni, myit masa rawt jat wa ai lam ni hkrum wa na rai nga ai,

Awng dang lam a matu mahkyen lajang chye ra ai..... Awng dang  na matu tau hkyen lajang ai a adaw chye na ni gaw hkyen lajang ra nga ai, dai zawn galaw ai lam gaw, tinang hkum hpe tinang kam ai lam hpe tsaw wa shangun nga ai, awng dang na matu, tinang hkum tinang kam ra ai, nang galaw sa na magam ni awng dang hkra galaw na matu kam ra ai, dai majaw madu hkum hpe kam ai lam gaw awng dang na matu  tau hkyen lajang ai lam re ngu kam u, tinang kam da ai hte maren, tinang a awng dang lam gaw byim wa na rai nga ai,

Myit maju jung chye ra ai... Tau hkyen lajang nga ai aten myit maju jung na gaw ra kadawn nga ai, nrai yang gaw tinang a aten ni hte n gun atsam ni jai shama kau ai hte bung nna, awng dang lam hte tsan mat chye nga ai, awng dang na matu, ahkyak ai chye da ra ai lam ni hte ahkyak  ai hku galaw sa ra na lam ni a ntsa myit maju jung ra ai, tinang du taw ai shara hte seng nna, myit dik ai du hkra, myit maju jung nna galaw sa u, awng dang na matu hpa hpe myit maju jung nna galaw ra na ngu ai hpe grau nna madung da u.

Chye Na Ya U... Tinang gaw hpa majaw tau hkyen lajang ai ngu hpe chye na da ra ai, na hkum nang san ra na gaw “ Ya ngai galaw taw nga ai gaw hpa lam yen hpe awng dang na matu rai, dai hpe ngai mung chye ai i ngu ai lam rai nga ai. dai ga san hpe htai yu ga, nang a mahtai gaw lachyum nnga taw ai zawn dai nrai nang myit mada da ai awng dang lam hte shai mat ai zawn rai yang, nang galaw ai lam ni a ntsa, grau chye na hkra myit maju jung ra ai, kalang lang hta nga yang tinang galaw taw ai magam bungli ni, masing masa ni gin sup lam ni hpe nchye na ai zawn rai byim chye nga ai dai zawn myit shuk taw sai nga yang atsawm chye na na matu aten la ra nga ai, chye na na matu nga yang lahta de bawng ban lai wa sai myit maju jung na lam yen hpe bai ra kadawn nga sai rai nga ai.

Tinang Hkum Tinang Shingdaw Yu Chye Ra Ai..... Tau hkyen lajang ai ngu ai gaw, lam yen hpe lawan wan ngut hkra sha shakut ai hpe tsun mayu ai nrai nga ai, jaw jaw hte hkrak tup galaw shakut nga ai kun ngu ai grau ahkyak la nga ai, dai majaw awng dang na matu tau hkyen lajang ai hta, tinang galaw ai lam jaw njaw shingdaw yu chye na ahkyak la nga ai, ra kadawn yang kahtap galaw shakut ra ai lam yen ni grai law nga ai, n gun dat shakut ra ai ni mung nga ai, tau hkyen lajang ai aten ladaw ngu ai gaw, yak hkak ai aten ladaw ni hpe loi na matu galaw shakut ai lam rai nga ai, raitimung tinang galaw ai lam gaw galaw gring ai lam yan ni rai taw na ahkyak nga ai.

Awng Dang Ai Lam.... Lahta na tsang ni hpe tawt lai ngut sai nga yang, awng dang ai lam gaw nang hpe hkap tau nga sai rai nga ai, nang tawt lai wa sai tsang ni hta galaw shakut ai hte maren, hkrum katut wa na sha rai nga ai, nang hku nna atsawm lajang ngut sai i, awng dang na teng ai i, raitimung sadi ra na ahkyak ai lam yan gaw, nang du taw ai shara hte nang lu la dat ai awng dang lam ni gaw, nang kaja wa ra kadawn ai lam rai nan rai ra na ngu ai lam rai nga ai, nang a awng dang lam hpe nang ra sharawng nga yang she kaja wa teng sha awng dang na rai nga ai kaja wa tau hkyen lajang ai rai nga ai jahtum hku nna tsun ga nga yang, ya kaw na hpang di shamu shamawt hkawm sa u, nang a matu lachyum rawng ai lam ni hpe tam mu na rai nga ai, raitimung nang gaw hpa hpe awng dang mayu ai i, hpa majaw ngu ai hpe atsawm hkrak chye ra nga ai, dai chye sai nga ai hte, awng dang na matu hkyen lajang sanu, galaw ra na tau hkyeng lajang na lam ni yawng hpe dung ai shara kaw matsing jahkrat u, dai rai yang she, myit malai nlu na rai nga ai, tau hkyen lajang ai lam gaw, nang a prat hte seng nga ai, hkrik hkam ai awng dang lam hte, awng dang na matu tau hkyen lajang ra ai ni grai law hkra galaw ra na rai nga ai, dai majaw ya kaw na tsawra ai ramma ni anhte a awng dang lam a matu, tau hkyen lajang sa wa saga ngu n gun jaw mayu ai law.

#youth

#rvakachinservice