Kun dinghku de ai hta jinghku jingyu ni gaw ahkyak ai kun?

   Tsawra  hkungga ai nu wa ni anhte myit sawn chye ga ai gaw ngai gaw shi hte hkungran na she re shi dum nta masha ni hte hkungran na mung nre gaw nga nna nhkungran shi yang myit sawn chye nga ga ai.Anhte law malawng gaw kun dinghku de hkungran na myit dat ai shaloi tinang a sumtsaw wa ai hpaji marai,chye na ya lu ai lam hte kyang lai len ni hpe sha madung da myit chye ga ai.

   Sumtsaw wa a dum nta masha ni a masa lam hpe shalawm myit nna kun dinghku de ai ni gaw naw nlaw nga ai.Tinang a sumtsaw wa hpe sumtsaw ten ladaw hta sha mu lu chye lu ai raitim shi a dum nta masha ni a masa lam ni hpe kalang ta nmu nchye lu ga.Dum nta masha ni a kata lam masa lam ni hpe mu lu chye na gaw grau she tsan nga ai.

    Anhte ningrum hpe lata ai ten hta matsan ai,sut su ai,hpaji chye ai,amyu tsaw ai,arawng sadang nga ai ngu ai ntsa lam hpe sha madung da myit chye nga nna, shi a dum nta masha ni a htung lai len,myit masa kyang lai len ni hpe mung anhte myit shalawm na matu ahkyak ai ngu mu mada ai.

   Anhte kanu kawa nkau jawm gaw tinang a kasha wa na,la na jan/wa hpe kawa (shing nrai) kanu gaw kun dinghku hta byak (maru marang re) ai lam byin ga ai kun? nga san chye ma ai re.Anhte a kanu kawa ni a myit hta shi kasha a prat hkrun lam hta kun dinghku hte seng ai myit ru tsam pu lam ni nnga shagun mayu ai majaw kahkri tai na wa/kanam tai na wa a kanu kawa ni hpe yu nna san chye ma ai.

    Dai gaw num langai, la langai sha wa la hkat ai lai len hpe hkap la ai majaw rai nga ai.Dai gaw nshut ai lam ngu mung mai tsun nga ai.Kashu kasha ngu ai ni gaw kanu yan kawa hpe yu nna len la chye ai majaw rai nga ai.Anhte kanu kawa ni nkaja lai wa sai ngu ai nkaja nhkru ai shingwang kaw na da hpren le pru lu ai gaw nga gaw nga tim nau nlaw nga ai majaw mung rai nga ai.

    Dai re majaw tsawra ai nu wa hpu nau na ni anhte gaw anhte a kashu kasha ni,anhte nan kun dinghku de na matu myit wa ai shaloi maga mi na dinghku dum nta masha ni hpe mung myit sawn gring ai ngu mu mada ai.Maga mi na kun dinghku dum nta gaw tinang hte htap htuk na kun?htap htuk ai kun dinghku dum nta ngu ai hta law malawng gaw tinang a kun dinghku dum nta hte law dik bung pre ai kun dinghku dum nta sha rai nga ai.

    Anhte shinggyim masha ni a myit masa, myit shang sha ai lam hte manu shadan ai lam ngu ai gaw shanhte lai di lai wa ai prat mahkrum madup ni, shai magang kun dinghku dum nta shada mung grau nna shai hkat na sha rai nga ai.Dai zawn shingra masa hpai shai hkat ai lam gaw kun dinghku hpe manghkang byin shangun chye nna bawngban jahkrum ai lam yak hkak wa ai shaloi awng dang ngwi pyaw ai kun dinghku byin tai na matu mung grau nna yak hkak wa chye nga ai.

    Ga shadawn tsun ga nga yang makam masham nbung ai kun dinghku nta masha langai hte mayaw htinggaw de sai nga jang shi a makam masham lam gaw nau nlaja sawng ai raitim dum nta masha ni a kam sham lam gaw tinang a matu grai sawng ai nga jang gaw manghkang byin chye nga ai.

    Shanhte maga hku nna shanhte hkap la chye na ai hku nna, tinang a ntsa hkap la chye shangun mayu ai shaloi shanhte a kam sham lam gaw tinang a ntsa ka up shangun mayu ai ten tinang hpe du hkra, hkra machyi shangun chye nga ai.Grau nna sawng ai gaw kashu kasha ni hku nna gara makam masham hpe kam sham nawku na ngu ai gaw grau nna yak wa na sha rai nga ai.

    Hpang jahtum dai hku byin ai hpe hkrum wa jang dum nta masha ni hta langai ngai a kam sham nawku ai lam de hkan nang mat nna hpang jahtum hpung gale mat ai hpe mu yu na ga ai.Dai hku n galai shai lu ai nga jang tinang a kun dinghku hta ngwi pyaw simsa ai lam ni mat wa nna hpang jahtum kun dinghku hten run mat ai de du mat chye nga ai.

    Dai re majaw kun dinghku hta aw ra maga na dinghku hte  ndai maga na dinghku ni a kun dinghku ntsa manu shadan ai lam,prat a ntsa chye na hkam la ai lam,hpaji masa,makam masham a ntsa zawn re hpe manu shadan ai lam hta shai hkat magang tinang a kun dinghku dum nta a matu mayak mahkak ni grau law magang rai nga ai.Dai majaw anhte jinghku jingyu ni hpe mung myit yu shalawm ra ai lam ngu mu mada ai.

    Tinang kaw nna shi hpe tsawra ai zawn shi hpe tsawra ai shi a dum nta masha ni,jinghku jingyu ni hpe mung chye na hkap la lu ai kun ngu myit yu mai ai lam mung rai nga ai.Tinang kaw nna shi a dum nta masha ni kahpu kanau ni hpe chye na hkap la lu yang she kun dinghku lam hta manghkang lam ni yawm na re ngu mu mada ai.

    Dai re majaw shi hpe tsawra ai ngu ai langai hte  nlaw nhproi nga ai.Shi a kanu kawa jinghku ni hte nhtuk nhprinem ai majaw hten run mat ai kun dinghku ni anhte makau grup yin hta mu yu na yu na ga ai.Kagu kamoi kani katsa sha n ga jinghku jingyu ni hpe mung myit shalawm tawn yang she tinang a kun dinghku hprinem na sha rai nga ai.

    Hpa majaw nga yang kun dinghku de ai ngu ai gaw dinghku nta lahkawng hpe jawm pawng shangun ai majaw rai nga ai.Anhte kun dinghku de na matu myit dat ai shaloi tinang a dum nta masha ni hte ninghpawt ninghpang hku nna bung hpre  ai kun dinghku shada rai yang gaw tinang a matu kaja ai kun dinghku rai na re ngu mu mada ai.

    Dai re majaw tsawra myit langai hpe sha kam let kun dinghku de lu ai raitim shi  hte tinang a lapran langai hte  langai shada chye na hkat ai lam hte sha gaw awng dang ngwi pyaw kun dinghku rai na matu gaw yak na gaw rai nga ai.

     Dai majaw kun dinghku langai ngwi pyaw na matu gaw shi hte  tinang hte shada chye na hkat ai lam sha n ga kun dinghku dum nta masha ni a myit masa kaba ai lam hte chye na ya ai lam gaw ahkyak na re ngu gam garan dat ya lu nngai.

By; John Mung Hkrang