Dinghku Myit dik Myit Pyaw Na Matu Madu Jan Madu Wa Shada Aten Jaw Chye Ra Ai (II)

      Tsawra ai kun dinghku kanu kawa ni e kashu kasha ni nlawm ai sha anhte madu jan madu wa lahkawng sha re ai aten ni hpe la chye  ra ai ngu mu mada ai.Madu jan Madu wa rau sha shana shat wa sha ai,hkrun lam rau hkawm ai zawn re ai lahkawng hkra sha myit dik myit pyaw hte rau run rai hkawm chyai ai ten mung yawm dik shata mi hta kalang sha gaw galaw la gring ai ngu mu mada ai.

      Ndai shara hta kashu kasha lawm yang nkaja na i? ngu anhte nkau tsun mayu ai lam gaw nga na re.Kashu kasha ni lawm yang gaw kaja gaw kaja nga ai.Raitim madu jan madu wa yan a nambat langai ningshawng jaw ai shara hta ningrum ningtau wa/jan nrai mat nna kashu kasha ni rai mat nna dai ten hta kanu yan kawa gaw kashu kasha ni sha mayu ai sa mayu ai shara hpe sha ningshawng jaw ra ai majaw dum nta hta dum nta masha yawng hkum ai daram sha hkam sha lam hpe lu la nga ai re.

     Dai majaw madu jan madu wa lahkawng rau sha myit pyaw myit dik lam lu na matu aten ra nga ai. Kaja wa nan sha madu wa madu jan lahkawng rau sha myit sim myit sa ga shaga ai,rau sha lam hkawm ai,muk sha let tsun jahta chyai ai lam mung salum hkum htawn lam lu la mai nga ai.Dai zawn hkring sa la dat ai majaw madu jan madu wa lahkawng a salum ni hpe bai sharawt jasu ya lu nga ai.

     Anhte dum nta shinggan de hkawm chyai na yak hkak ai ni a matu gaw dum nta hta nga nna myit pyaw myit dik lam hpe tam la mai nga ai.Rau sha sofa dung lahkum hta rau ta gindun dung let sumla hkrung yu ai.Ningrum ningtau a matu sha hpa hte Coffe zawn re ai hpe hkum nan gayau jaw ai hte rau sha lanu lahku rai nga mai nga ai. Ndai zawn kanu yan kawa myit hkrum myitra tsawra nga ai gaw kashu kasha ni a matu myit masin shim lam hpe lu la shangun nga ai.

       Ndai zawn madu jan madu wa langai hte langai myit pyaw myit dik hte lanu lahku nga ai gaw grau nna myit gang hkat lu ai zawn shi ngai hpe naw tsawra nga ai ngu tinang hkum tinang bai sharai rawt hkawm sa wa lu na rai nga ai.Ndai zawn rai langai hte langai salum gumhtawn hkra nnga jang tsan gang hkat wa shangun chye nga ai.Bungli shingra masa mung nbung ai hta mungkan tsin yam hpe kaja ai hte nkaja ai lam ni hpe lai di nga ai ten ladaw ni hta tsan gang ra ai masa lam ni gaw anhte hkam sha ra nga ga ai.Dai ten ni hta shada hkran hkran tsun shaga let gau ngwi ngwi tsan gang wa nna hpang jahtum hka mat ni nga lam anhte na chye yu na ga ai.

       Langai hte langai shada salum gumhtawn myit gang hkat na matu galaw shakut ai lam nnga jang gaw dinghku ngwi pyaw lam hte tsan wa chye nga ai.Dai majaw kun dinghku hta shim lum nga pyaw ngang kang na matu gaw madu jan madu wa langai hte langai myit gang hkat lu na matu ahkyak la galaw shakut ra nga ai. Dai majaw tinang a Ningrum ningtau hpe shim lum ai hte ahkyak la lakawn lamai ai lam gaw ahkyak madung re ngu mu mada lu ai.

         Anhte yawng gaw myitru myit tsang myit garen ai ten ningrum hte rau myit pyaw myit dik rai nga hkawm ai lam ni hpe bai myit dum chye ai ni rai nga ai majaw dai zawn re lam law law nga yang gaw anhte madu jan madu wa shada bai myit gang wa lu nga ai.Dai majaw anhte kun dinghku myit pyaw myit dik lam ni lu la na matu galaw la nga ga law.

Ref; May Thingyen Hein