Dinghku Ngwi Pyaw Na Matu Madu Jan Madu Wa Shada Aten Jaw Chye Ra Ai

        Tsawra ai hkungga ai kun dinghku kanu kawa ni e madu jan madu wa rau jawm pawng nga ai shaning loi mi na jang gaw ningrum hte seng nna salum gum htawn ai lam yawm wa magang nga sai re. Ndai lapran dingku hta malu masha nga sa lam a matu shakut shaja nga ra ai,kashu kasha ni a matu hkamja lam,hpaji lam ni sha n ga jinghku jingyu ni lam ni bai jat jang gaw lam shagu gaw madu jan madu wa shada myit dik myit pyaw nga lu na hta grau ahkyak ai lam ni hpe sha anhte law malawng myit tawn nga chye ga ai.Kaja wa nga yang madu jan madu wa shi hte ngai myit ngwi myit pyaw pyaw na matu gaw kaga lam mahkra hta grau ahkyak ai ngu yang hkap la na masha gaw nau nlaw na re.

       Anhte madu jan madu wa yan a prat hpe myit dat yang shada tsawra nja hkat ai majaw hkungran let mayaw htinggaw de ai.Ndai zawn hkungran ngut jang mung nhprinem ai lam ni,mayak mahkak da kan ai lam kajawng kaja hkrum wa nna shaning law law  bai hkrum kadup wa ai.

       Dailam ni hpe hkrum kadup laidi nga ra ai hte anhte madu jan madu wa yan a salum gumhtawn ai lam ni myit pyaw myit dik lam ni hpe shaprai shamat kau ai hte  bai bung wa ra nga ai.Dai lapran hta kashu kasha ni lu wa jang mung kashu kasha ni a matu aten jaw let shanhte hpe lanu lahku lakawn nga ai hte  madu jan madu wa shada lanu lakawn na ten ni gaw gau ngwi ngwi yawm mat wa chye nga ai.

       Dai shaloi ningrum hpe gaw kashu kasha ni hpe daram ningshawng nlu jaw mat wa ai,tinang a bungli hte bu na hpun na malu masha nga sa lam daram mung ningrum hpe ningshawng nlu jaw ai ten ni anhte hta byin nga wa na rai nga ai.Dai hta anhte kashu kasha ni hpe aten ni grai njaw ra ai ngu ntsun mayu ai,bai bungli a matu aten ni grai hkum jaw ngu mung ntsun mayu ai.

       Tsawra ai kun dinghku kanu kawa ni anhte kashu kasha ngu ai ni gaw lani mi ten hta gaw anhte hpe tawn da let tsan ai de pyen hkawm mat na U ni zawn sha re ngu ai hpe anhte ni sadi let myit dum ra na ga ai.Dai ten ni hta ningrum a makau hta tinang nga ra ai,tinang makau hta shi naw nga ai nga yang gaw naw tsamai na rai nga ai.

       Dai ten anhte kalang marang myit dum ra na gaw ningrum hpe tinang kaw nna lanu lahku lamai ai lam nnga ga ai majaw shi gaw kaga wa hpang de lawm mat jang gaw tinang langai sha dinghta ga hta pyaw pyaw nga lu na matu shakut ra mat na rai nga ai.Dai ten ni ndu shi yang tinang maga kaw nna galai shai ai lam nkau hpe galaw lu na matu ahkyak nga ai.

      Tsawra ai kun dinghku kanu kawa ni anhte kun dinghku de ai na wa ai shaloi madu jan madu wa langai hte langai rau jawm pawng nga ai hta salum gumhtawn ai lam nnga,langai a ntsa langai myit htum wa ai lam ni mung byin wa chye nga ai.

      Dai zawn nbyin shi yang tinang maga kaw nna langai hte langai bai myit shang sha,myit gang hkat lu na matu salum gumhtawn ai lam ni bai lu na matu tinang a salum hpe bai sak jahkrung sharawt na matu ahkyak nga ai law.

By; John Mung Hkrang