Lagawn Lamawn Ai Lam Gaw, Na Bungli Hta, Jam Jau Jaw Nga Ai Kun? ( Youth Program ) 7.6.2020

Masha ngu byim wa sai hte rau, sak ram wa ai ten ni hta, bungli magam ngu ai hte hkrum katut wa na sha rai nga ai,  Ya ten, ladat hpa ji ni rawt jat wa nga ai ten ni hta, ramma shagu bungli hpra  lu na matu ra kadawn wa nga ai. Bungli magam hte seng nna, mungkan hta galai shai ai lam ni nga wa ai. Kung kyang ai npawt hta, machye machyang npawt maga de, lawan ai hku galai shai nga ai rai nga ai Moi shawng na htuk shapraw ai ni gaw, shi a myit nshat shaw ai lam hpe, sha nga ga ai rai nga ai, ya gaw dai hku nrai nga sai, kadai ni gaw hpa ni jai lang ai ngu ai hpe jahpan hta yu ai kaw madung da  let, gram shalat gin shalat wa ai prat rai nga sai rai nga ai.Masha shgu, bungli zawn sha, myit bang da let, galaw sa ai hte, bungli hpe shakut nna galaw ai ngu ai lapran hta, shai hkat ai lam ni nga ai. bungli hpe bungli zawn sha myit da let, galaw ai rai yaw, hkap la lu ai mahtai langai du hkra gaw lu la na rai nga ai. bungli hpe shakut nna galaw ai rai yang, kaja ai akyu hkam sha lam ni lu la na gaw teng sha rai nga ai.Bungli a ntsa, sadi dung, manu ting ga;aw ai lam  gaw, kaja dik galaw shaut lam lu na matu, ram la ai atsam ni hpe lu la na mung rai nga ai. nang galaw ai lam shagu hta galaw gring nna galaw ai ngu nhkam la ai sha, myit marai atsam kaja jaw jaw, galaw mayu ai lam ni hpe myit n-gun yawng pawng bang galaw gring nga ai re Bungli gaw, nang a shang gumhpraw maga mung, hkam kaja lam maga mung, rawt jat galu kaba shangun nna, bungli galaw nga ai majaw, n-kaja ai lam yan law law ni kaw na mung, koi gam ai hte bung wa nga na hpe mung nang hkam sha lu na rai ng ai. Lani mi tup bungli hpe kaja ai hku galaw shakut ngut ai sha ni hkan nga yang mung, nang gaw, myit dik myit pyaw lu na rai nga ai, bungli galaw shakut ai lam gaw, prat magam hpe tsaw wa lu shangun nga ai, bungli shakut ai lam hte, atsam marai ni gaw, nang hpe masha hte nbung ai lak ali shangun chye nna, dai zawn galaw shakut ai lam a majaw, masha ni a lapran dan dawng wa shangun nna,nang a galaw sa ai lam ni hpe mung masha ni mu mada lu na rai nga ai.

Anhte ni yawng bungli galaw yang she, anhte hkum nan hte, makau grupyin a ra kadawn ai lam ni hpe garum shingtau lu na rai nga ai, nang lam hpaw lu yang shang gumhpraw lu na mahkrun law law nga nga ai. Nang ngai kadai mung, masha wa a sumbu hte sak nhkrung nga mai nga ai. anhte ni yawng gaw, lu na sha na, bu hpun na lam ni a matu, tinang hkum nan lam yan jaw jaw tam bram galaw sa sak hkung nga na matu, gu dek hta lit nga ai ni hkrai rai nga ai, bungli magam lu na matu, yak hkam jam jau lam ni hkrum wa na raitim, shang gumhpraw lu na matu, lagawn n-nga taw ai sha, ladat tam let manang wa hpe shamyet lam nnga ai sha madu hkum lu tsap hkra galaw shakut ra nga ga ai. Nang langai chye da ra na gaw, awng dang ai lam ngu ai gaw tinang a kru dung atsam kaw na n-nan hpang wa let, madu hkum nan gin shalat lu ai ngu ai ningmu ni tawn da chye na ra kadawn nga ai re. nang a atsam ni hpe galoi mung rawt jat nga na mat, gin shalat ding yang rai nga ra ai. nang gaw nang a shingjawng ai wa hta, grau ai lam hte ndai hta grau kaja ai galaw shakut lam rai yang, nang a grup yin hta, mu mada ai shara de du wa lu na rai nga ai. nang ngai yawng gaw myit pyaw sim sa lam hpe ra kadawn ai hkrai rai nga ai, dai majaw masha yang gaw, myit simsa lam ngu ai pan dung de yaw shada sa nga ga ai rai nga ai. nhtang sawn yu ra na ra ai gaw, myit simsa lam nlu hkra kaning re ai pat shingdang lam ni nga ai kun ngu ai hpe mahtai tam ra nga saga ai, dai lam ni gaw, lagawn lamawn ai lam hte, ajin aban rai ai lam ni hpe mu mada lu nga ai. lagawn ai lam gaw, pyaw ai lam a, nhtang rai nga ai , law malawng gaw ajin aban re ai lam hpe masha ni gaw, pyaw hpa lam ni hte ten kadun hta shangwi shapyaw ai lam rai nna, jet ai myit simsa lam nrai ai sha n-ga, myit masin ngwi pyaw lam nkaja ai lam ni hpe mung jaw ya chye nga ai re. anhte ni gaw, ajin aban rai nga ai lam hte lagawn ai lam  ni hpe tam ai shaloi, anhte ni a sak prat a ahkying ni hpe, jahpan hte hkrak jai lang nchye ai a majaw re ai hpe mu lu nga ai. dai zawn rap ra bung pre lam nnga ai sha n ga, langai mi ra let, shara mi kaw jan taw nga yang, dai ra ai ahkying, jan ai aten ni gaw, anhte ni a, lagawn ai hte ajin aban re ai lam ni byim wa shangun nga ai re.

Bungli galaw ai shara hta, gara ladat hte  ndung de du wa lu na i ngu ai hta e.. nang shakut ai sha n ga, galaw shakut ai lam hte magam bungli galaw nga let, rawt jat wa ai lam hte, galaw chye na matu mung ra nga ai. ya tatut aten du hkra, galaw shakut ga ya ai lam ni yawng hta, mai kaja htum ngu ai hta  galoi mung man man rawt jat kalu kaba wa taw hkra gara hku shakut ra na ngu ai hpe galoi mung san jep yu ra nga ai. masha langai a rawt jat lam ni hpe jahten kau ya chye ai gaw, ndai lagawn ai ngu ai lam yan rai nga ai. Masha hpan a lagawn ai lam, dai lagawn ai a majaw, nang a bungli ni hten za hkrat sum mat ai hpe sadi mu mada na gaw nrai nga ai. anhte nang ngai yawng lam yan langai nrai langai hte lagawn chye nga ga ai. Nkau ni gaw, shara ra hta, grai shakut chye nna, shara ra hta gaw, lagawn lamawn rai nga ga ai. Dai ni galaw ra na magam bungli hpe hpang jahpawt de sit nawt kau chye nga ga ai.Masha shagu ndai lagawn lamawn ai lam tinang hpe kawa mayu taw ai hpe ndum nga ai ni law nga ai re. Kalang lang shiggyim masha a akyang ngu ai hte maren, bungli hpe 3,4 ya ram galaw nna, shata mi ram hkring sa la mayu chye nga ai ni hkrai rai nga ai, dai majaw anhte ni hta, rawng shingnu nga ai lagawn ai lam ngu ai hpe masha shagu ninghkap  dang manga kau ra na re ngu shadum ya mayu ai

Anhte hkum nan, anhte  a hkum hkrang kraw kata hta, majan shang taw nga ai rai nga ai. ndai lagawn lamawn ai lam hpe dang manga kau lu na lam yan gaw, madu hkum nan lagawn ai ngu ai hpe hkap yin la chye ai lam sha rai nga ai. dai hta

1. Nang gaw lagawn ai masha re hpe hkap yin la u
2. Lawt Ga Tsun Ai Lam Ni hpe jahkring kau u
3. Shani shagu galaw ra na lam yan ni hpe tsaw ka jahkrat nna lawan galaw sa u
4. Ten n-gang taw ai sha, ya jang galaw sa u
5.  Pan dung tawn da nna, galaw shangut na nhtoi ni hpe masat u
6. Marai,atsam ni nga u
7. Tinang hkum hpe masha wa san jep ai lam hpe hkam la na mtu, jin jin rai nga u  ngu n gun jaw mayu ai.

Lagawn lamawn ai lam gaw, hkam kaja lam hpe mung, hkra machyi shangun chye nga ai, myit yup shangun ai, ngyan marai hpe ali ahti byim shangun nga ai, Hpaji lam, sut masa lam ni hpe mung, hpang hkrat shangun chye nga ai, akyu nnga ai lam ni law ai a npawt madung re hpe wa mu nga ai, dai majaw lagawn lamawn ai lam hpe dang manga kau lu na tsi gaw, nhkring nsa magam bungli galaw shakut nga na lam sha nga nga ai, anhte nang ngai yawng, lagawn lamawn ai lam kaw na lawt lu wa u ga ngu yaw shada let..

#youth

#rvakachinservice