Nawku Jang Lam De ( Youth Program ) 31.5.2020

Nawku Jawng Lam De ngu ai shaloi anhte ni gaw, hpa majaw Nawku Jawng sa na matu, ahkyak la nga ai kun? ngu ai ga san shawng san yu mai nga ai.. Dai hpe garai nhtai shi yang, sum tsaw tsaw taw ai yan, lahkawng gaw, hpa majaw galoi mung rau rau sha nga nga mayu ai rai? dai sha n ga, tinang gaw tinang tsawra ai wa/ jan hpang de hpa majaw, galoi mung sa mayu taw ai rai? Tinang tsawra ai wa/ jan tinang hpang de sa wa na hpe, hpa majaw galoi mung ala taw ai rai? myit yu mai nga ai. Hpa majaw nga yang, tinang grai tsawra ai majaw rai nga ai.

Dai hte maren sha,anhte  ni mung Karai Kasang hpe tsawra ai nga yang gaw, shi hpang de galoi mung sa muyu na rai nga ai. Karai Kasang gaw anhte a myit masin hkum hkrang mahkra hte shi hpe tsawra nawku daw jau na matu ra sharawng nga ai. ( col 3:16 : Eph 5 :18-19 ). Shinggyim masha ni hpe tsawra dik ai Karai Kasang anhte ni, shi hpang de sa wa na matu, galoi mung ala taw nga ia. Dai re majaw Karai Kasang gaw anhte shinggyim masha ni hpe tsawra ai sakse madun dan na matu, shi tsawra dik ai Kasha Shingtai Madu Yesu Hkristu hpe mungkan ga de shangun dat nna, anhte ni yawng hpe hkye hkyang la ai amu magam galaw shangun lai wa sai rai nga ai. dai majaw anhte ni Nawku Jawng sa nna, Karai Kasang hpe nawku dawjau shakawn kungdawn na lam gaw ahkyak la nga ai, Nawju Jawng sa ai lam gaw, anhte ni hkam la lu sai shaman chyeju ni hpe, Karai Kasang hpe chyeju dum chyeju htang na matu hte, shi hpe nawku dawjau na matu rai nga ai Nawku jawng sa ai a majaw, anhte ni a myit ni galai shai lu ai atsam hte, anhte a prat hpe mung, galai shai shangun nga ai. Dai re majaw  Karai Kasang gaw shi daw da ai Tara lam 10 hta na, No 3 kaw “ Laban nhtoi chyoipra u ga, amu bungli ni hpe gam kau nna,nawku amu hta shaja nga na myit dum u “ nga nna jaw da nga ai. Nawku hpung a Tara lam 6 hta mung, Laban nhtoi hte,Nawku hpung a poi shani e Missa hkungga sa lawm u, Missa hkungga n nawng ya ai shara de laban nawku sa lawm u “ nga nna tsun da nga ai, Nawku Hpung A Tara Kanu ( canon law/ CIC.1247 ) hta mung,” Kahtawlik Nawku Hpung masha ni yawng gaw, laban nhtoi hte nawku hpung a chyoi pra ai poi nhtoi ( Holy Day ) ni hta Missa hkunnga sa lawm na lit nga ai. Kahtawlik hpung masha ni gaw dai nhtoi ni hta amu bungli ni hpe gam kau nna, Karai Kasang hpe nawku dawjau ra ai. Madu a nhtoi hta kabu pyaw ai hte shang lawm ra ai, Myit masin hkum hkrang hpe ban sa shangun ai nhtoi rai nga ai nga nna tsun da nga ai. Kahtawlik Nawku Hpung masha ni a matu Laban nhtoi hte Missa hkungga gaw manu dawdan nlu, gara hte mung shadawn nmai ai ahkyak dik kaba rai nga ai. dai re majaw anhte ni yawng, Missa Hkungga shang lawm ai a marang e, san seng san pra ai, Shachyoi shapra ai chye ju ni hkam la lu ga ai. Missa Hkungga hte laban nawku sa lawm ai lam gaw, Hkristu hpe kam sham ai hpung masha ni yawng shara mi kaw rau jawm hpawng ai. Karai Kasang a mungga hpe madat hkam la ai, Hkristu hte rau sha jawm pawng nna, Chyoipra Hkum hpe hkam la ai lam ni rai nga ai. Missa Hkungga gaw Madu Yesu Hkristu a n-ni n-kyi yubak hkam ai U dang ntsa re, si hkam ai hte bai hkrung rawt wa nna, anhte shinggyim masha ni yawng hpe hkye hkrang la ai lam hpe, kalang bai myit yu dum shangun ai mung rai nga ai. Missa hkungga gaw Hkristu hpe kam sham ai anhte hpung masha ni yawng hpe, kam sham ai myit tsawra myit langai hte rau sha langai hte langai jawm pawng nga nna, Madu Langai, makam masham langai, tsawra myit langai, kashin kamun langai, myit mada lam langai sha hte nawku dawjau na matu rai nga ai.

Dai re majaw nang ngai anhte ni yawng laban nawku nkam sa ai nga yang gaw, myit yu ra sai rai nga ai ,nang ngai gaw Karai Kasang hpe n nawku ai nga yang gaw lama ma hpe gaw nawku taw sia mung rai nga ai. Tinang hkum tinang nawku ai kun? ngat hpe nawku ai kun? TV hpe nawku ai kun? Vedio, Game hte smart phone ni hpe nawku nga ai kun? Gawdin poi ni hpe nawku nga ai kun? myit yu na mai nga ai.Nawku jawng mung nsa na gaw, ngai Karai Kasang hpe kam sham ai, nawku ai ngu tsun jahpai nmai nga ai. Nawku jawng mung nsa ai  ngai hpa hpe mung n nawku ai ngu mung tsun nmai nga ai, Nang ngai anhte ni nre ai, njaw nkaja ai, shut ai lam ni lama ma hpe gaw naw ku taw sai hpe myit  kaw galoi mung dum ra nga ga ai.

#youth

#crdbromahtenawnglat