Akyu Hpyi Ai Amu Magam Hta Myit Yu Hpa ( 17.5.2020 )

Nawku hpung masha ni akyu hpyi ai amu magam hta, shakut nga ai ni law law nga ai. Raitimung nkau mi gaw yak hkak jam jau ai majaw, ngai akyu hpyi ra sai nga nna, myit kraw kaw na kaja wa hpyi amyu ai myit nrawng ai sha hpyi ai. nkau mi amu shaprai hpyi ai, nkau mi manang wa manang jan hpyi ai mu nna, hkan hpyi ai hte, nkau mi rai yang gaw, manang ni na shawng kaw myi man lu hkra nga nna, hpyi ai ni mung law law nga ma ai

Akyu hpyi ai lam hta, anhte a nawku hpung kaw nna, masat da ya ai akyu hpyi ga ni hte, hpa ladaw hta, kaning rai akyu hpyi ga ni tsun ra ai ngu  nna, hpung woi ningbaw ni kaw nna, masat da ya nga ai re. Akyu hpyi ga yawng ngu na daram gaw, chyum laika kaw na hkrai rai nga ai. Dai ni anhte hpung masha ni yawng, akyu ni hpe hpyi ai, akyu hpyi ga ni hpe tsun ai. raitim anhte hta na nkau ni gaw, hpyi kau ai, tsun kau ai ni she malawng rai mat sai. Tinang a myit masin hpe tinang tsun taw nga ai kyu hpyi ga hta e nbang da nna, akyu hpyi ga ni hpe tsun taw chye ga ai. Dai hku anhte hpyi taw ai rai yang, hpa akyu nhkam sha ai hta n-ga, aten htum ai hte akyu hpyi ga hpe nsen pru hkra tsun ai nga yang, n gup tsu ai hta lai na hpa akyu nnga ai. Ga shadawn, anhte Rosary hti ai, shingnrai Missa hkungga hkan e anhte grau nna myit yu hpa rai nga ai. Akyu hpyi ga ni hpe tsun taw ai hpa akyu hpyi ga re ngu ai pyi ndum shai dat ai ten ni mung nga chye ai. Anhte nawku hpung masha ni yawng gaw, akyu hpyi ga ni hpe, ma kaji ten kaw nna sharin hkam la nna tsun wa ai rai yang she, akyu hpyi ga ni yawng hpe malawng maga gaw laika buk yu nra hkra rai nna lu tsun na rai nga ai.Kalang lang akyu hyi ai ten hkan rai yang tinang myit nlawm tim, n-gup kaw nna shi hkrai shi tsun taw nga ai aten ni mung nga ai. Nkau ni nga yang akyu hpyi ga tsun ai nau lawan nna, akyu hpyi ga si ni pyi nbrat Let, lachyum ni mung shai mat chye nga ai, Majoi mi tsun ra nna tsun ai she rai mat nga ai.

Anhte hta na nkau mi rai yang gaw, ngai akyu hpyi ai lam hta grai shakut ai raitim, hpa akyu chyeju mung nhkam sha ai ngu nna tsun chye ai. Ndai zawn re ai lam ni hta, myit yu mai nga ai. Akyu hpyi ga ni yawng gaw anhte yawng a matu, kaja wa akyu rawng nna manu dan la ai. dai majaw, anhte akyu hpyi ai shaloi tinang hta ra nga ai akyu hpyi ga ni mi rai rai, akyu hpyi ga ni hpe tsun ai mi rai rai, dai tinang tsun taw nga ai akyu hpyi ga hta, tinang a myit masin hkum hkrang ap nawng nna, kaja wa myit grit nem ai hte sit shang let, hpyi na ahkyak madung rai nga ai.Akyu hpyi ai amu magam hpe anhte  ngut daw, amu shaprai daw sha sawn nna, akyu hpyi ga ni hpe tsun ai rai yang nloi la nga ai. Pu ba ai lam ni law law anhte hkam sha na rai nga ai, Dai rai yang she anhte hpyi ai akyu hpyi ga ni gaw, lachyum rawng, akyu rawng na rai nga ai. Akyu hpyi ai a nam chyim hpe chye mayu yang anhte akyu hpyi ai shaloi tinang a myit hpe kaga de nshabra kau ai sha, akyu hpyi ngut du hkra, myit lawm ai hte, hpyi yu u, Shaloi nang ngai anhte a myit masin hkum hkrang kaja pu ba ai hpe, hkam sha na rai nga ai. Jahtum e, nang ngai hpa hte mung nlu shadawn ai myit pyaw lam hpe hkam sha na teng sha rai nga ai. Dai myit pyaw myit dik lam mung, Madu Karai Kasang anhte hpe jaw ai shaman chyeju ni hta na langai mi rai nga ai, Shinggyim masha prat hta e, majoi joi lu ai hpa nnga ai, anhte yawng chye chyalu rai nga ai. Anhte a myit masin hpe anhte tsun taw nga ai akyu hpyi ga hte nan, hakm sha let, tsun ai rai yang, Madu Karai Kasang anhte hpyi ai akyu hpyi ga ni hpe madat ya na rai nga ai, Dai hku nrai yang, anhte a akyu hpyi ai nsen gaw, Madu Karai Kasang kaw ndu ai sha, lapran e summwi zawn mang mat na rai nga ai.

Nkau ni tsun ai hta akyu hpyi ai gaw nyak ai. Akyu hpyi ga ni hpe tsun na, tinang hta ra nga ai ni hpe hpyi la na nga nna, loi loi sha myit la chye ai. Dai hku sha nga yang anhte hpe hpan da nna, galoi mung bau sin ya ai Madu Karai Kasang hpe nhkung ga ai hte bung nga ai, Madu Karai Kasang gaw hpa lachyum nrawng baw nu nrawng, hpa akyu nnga ai wa zawn rai mat sai. Dai ram loi ai rai yang, mungkan ntsa akyu hpyi ai masha n nga na sai. Kaja wa nga yang nloi la nga ai. Akyu hpyi ai ngu hta e, akyu hpyi ga ni hpe tsun ai. tinang hta ra nga ai shaman chyeju ni hpe hpyi la ai ni hte sha, nhpring tsup ai. Shawng ningnan anhte hkam la lu sai shaman chyeju ni hpe mung, chyeju dum chye ra ai. Myit yu ga nga yang, anhte asak hkrung hkawm sa nga ai ten ladaw hta, shi Madu Karai Kasang a shaman chyeju ni hkrai rai nga ai, Madu Karai Kasang kaw na shaman chyeju re ngu hpe hkam la ai ni, dum chye ai rai yang, akyu hpyi ai lam hta mung, shakut mayu ai myit ni mung grau rawng wa na rai nga ai. Madu Karai Kasang a shaman chyeju hpe ndum na, tinang a tinggyeng na matu sha myit nna, hpa akyu nhkam sha ai nga nna, tsun taw ai rai yang, nang ngai hpa akyu chyeju hpe mung, hkam la lu na nrai nga ai. Nang ngai anhte ndai mungkan ga ntsa naw sak hkrung taw nga ai rai yang, shi Madu  Karai Kasang a shaman chyeju ni hpe galoi mung myit dum let, akyu hpyi ai amu magam hta grau nna, lachyum rawng ai hku, myit lawm hkum lawm ai hte hpyi nem sit shang na ahkyak nga ai

#youth

#crdnawnaw(lb)

#rvakachinservice