Gara Lam Yan Ni A Majaw Bungli Nlu Nga Ai Kun ( Youth Program ) 10.5.2020

Tinang gaw bungli tam taw ai wa rai taw ai ngu ga, tinang gaw hpa majaw bungli nlu ai kun? hpa ni ra kadawn nga ai kun? gara lam yan ni gaw, bungli lu na lam hta pat shing dang ya nga ai kun? ngu ai lam hte seng nna gam garan ya mayu ai

1.Shing jawng ai ni law ai... Ndai gaw, bungli shawk ai ni hte nseng nga ai, tinang shawk ai company magam gun ni hte seng nna, chye na ya ai lam, shata shabrai kaja ai, laga akyu hkam sha lam ni hpring tup lu ai ngu zawn re ai lam yan ni a majaw, bungli shawk ai law htam nga ai lam mung, nang a matu, bungli lu na matu, ahkaw ahkang yawm ai lam yan langai rai nga chye nga ai. Bungli ra kadawn ai gaw masha 50 sha bungli shatsam na ngu ga, raitimung, sa shawk ai masha gaw, 1000 jan ram rai nga taw ai lam yan zawn, dai zawn, shingjawng ai ni law ai mung, bungli nlu ai lam yan hta langai hku shang lawm nga ai re.

2.Nkaja ai myit masa nga taw ai..Masha langai hta, myit masa lam kaw ahkyak dik rai nga ai, shi a myit masa  gaw, shi tsun ai ga hkum a ntsa,npawt da nna, dan dawng nga chye ai re, bungli shawk ai shara hta,  bungli magam lata ai hta, dai myit masa kaja ai lam mung madung lawm nga ai majaw ,myit masa lam kaja na mung ra ahkyak shang lawm nga ai, Interview ai ten, jahkring na laman hta, magam gun ni a, myit masa hpe gara hku chye na law ngu san mayu na re, bungli shawk ai wa a mhtai hta, ntsa lam chye kau mai nga ai re, ga shadawn, interview ai wa bungli shawk ai wa hpe shawng na bungli kaw na hpa majaw le ai law ngu zawn re ni san chye nga ai, dai ten,raitim nraitim, shawng na bungli gaw nkaja ai lam, bungli madu nkaja ai lam, zawn re ni nseng ang ai sha tsun kau dat chye nga ai, ndai zanw tsun ai lam gaw, tinang a matu, akyu nnga ai sha n-ga, bungli lu na lam hta, dut dang mat chye ai lam hpe sadi maja ra ai ngu shadum ya mayu ai law.

3.Bungli mahkrum madup nnga ai..Ndai lam yan gaw, bungli tam taw nga ai ramma law malawng hpe, myit daw shangun chye ai kaba la ai lam yan langai hku lawm nga ai ngu yang nshut na re,bungli shaga ndau laika pa ni hta, yu dat yang, mahkrum madup 2 ning ram gaw  yawm htum, lawm nga ai hpe mu lu na re, dai majaw bungli shawk na ramma ni hku nna, kaba dik ai dut dang lawm gaw, bungli mahkrum madup ngu ai lam rai nga ai Tsawra ai ramma ni mahkrum madup nnga na, myit nmai daw nga ai, mai kaja dik gaw, tinang bungli shawk na gai wang hta, tinang a kung kyang ai lam sha ahkyak madung rai nga ai, bungli mahkrum madup mung nnga, kung kyang ai lam mung nnga rai yang gaw, tinang a matu, bungli ngu ai lam gaw, naw tsan gang taw na sha rai nga ai.

4. Lak lai ai bungli shawk laika pa nrai nga ai.... Ndai lam yan gaw, shawng nnan, bungli lu na matu, lahkam ra na lagaw lahkam rai nga  hpe tsun yang nshut nga ai.Tinang a shawk shawn pa mung, masha ni zawn sha, yo yo sha, computer seng ni hta, ready galaw da ai shawk shawn pa hta ka jahping nna, sa shawk ai zawn re ni gaw, masha law law hte shing daw nna, bungli langai lu na matu, tinang a shkut shaja ai lam gaw, n-gun yawm taw nga ai ngu mai tsun nga ai. magam gun shaga ai ni hku nna, shawk shawn laika law law hta na, tinang a shawk shawn laika pa hpe myit lawm ai hte, hti lu na matu, ka na ra nga ai. Bungli langai lu mayu ai nga yang, tinang a bungli shawk shawn lai ka pa hpe ten la jahtuk let hkyen lajang lam galaw na matu shadum n-gun jaw mayu ai law.

5..Follow Up Ngalaw ai... Ndai lam yan a majaw, bungli nlu ai mung mai byim nga ai, bungli shawk shawn pa mara ngut ai nna, ten ladaw langai du hkra tinang hpang de, tinang shawk da ai company kaw na bungli hte seng nna, shiga langai ngai nlu ai ten, tinang maga hku mi rai rai, email hku na mi rai rai, telephone hku mi rai rai, tinang a bungli shawk shawn pa hte seng nna, bungli lu na matu, ahkaw hkang nga nnga mai san nga ai re..    Bungli shawk ngut sai nga nna,tinang maga mung dai lam a ntsa, malap mali nga kau dat ai zawn rai nga yang, nang a bungli lu lam ahkaw ahkang yawm mat wa chye ai re. Bungli shawk ai ramma law malawng gaw, bungli shawk ngut yang, tinang a lit ngut sai ngu sha shadu kau chye nga ai, tinang a magam bungli ahkaw ahkang hte seng nna, mai byim masa nga nnga san na, nra ai shadu kau chye dat nga ai re. kaja wa nga yang, dai shadu da ai lam ni shut ai ngu mu mad lu nga ai, ndai zawn san ai lam gaw, ndai bungli a ntsa, laga bungli shawk masha ni hte, nbung pre ai myit shang sha lam nga ai ngu ai hpe hkrang shapraw ya ai kum la langai mung rai nga ai, bungli lu na matu, ndai lam yan ni mung nang hpe garum ya na re ngu tsun shadumm ya mayu nngai law.

6.Bungli jahkring hkring htawt ai lam.. Ndai lam yan mung, bungli lu na lam hta, mang hkang chye jaw nga ai, awra company kaw bungli ladaw laning mi, ndai company kaw bungli galaw ladaw shata kru, hpang company hta bungli galaw ladaw laning mi jan ngu zawn re ai jahkring hkring htawt sit ai ni mung, bungli madu ni nra sharawng chye nga ma ai, Tinang hta du yang mung dai zawn hpang shara langai de htawt na re ngu masat kau chye nga ai re.Bungli magam masa lam kung kyang ai ni gaw, masha langai gaw shi sak prat hta, shawoi nga yang bungli shara masum ram htawt sit chye nga ai lam tsun ma ai, dai rai yang, tinang a ya tatut sak prat hta, nang bungli shara kade htawt sit ngut sai kun, san jep yu na ra ahkrak nga ai tinang gaw asak 20 grupyin ram sha rai nga ai, raitimung bungli  gaw shara masum hkan htawt sit ngut sai nga yang nang myit yu ra na teng sha rai sai ngu shadum ya mayu ai , Nang a bungli jahkring hkring htawt sit ai akyang gaw, hpang bungli langai lu na matu ahkaw ahkang hte, rawt jat kalu kaba wa na lam hta, dut dang chye nga ai lam hpe galoi mung myit dum ra nga ai, ndai akyang gaw bungli madu ni nra sharawng ai lam yan langai re majaw bungli lu na matu, yak chye ai masa lam yan langia rai nga ai ngu gam garan ya let,

#youth

#rvakachinservice