Ngai Hpa Na Aya Ntsaw Shi Ai Kun ( Youth Program ) 26 April 2020

Bungli langai hta shang lu sai nga ai hte, aten ladaw langai na wa ai hte rau, shata shabrai jat ya na matu, magam gun shagu myit mada nga chye ai, tinang hte magam bungli galaw ai shaning bung nga ai wa, jan mau lu shada bung ai wa, aya tsaw mat nna, tinang gaw ngam taw nga ai zawn re ni, magam dap hta, hkrum sha chye nga ai. Ndai zawn mabyim ni hta, tinang gaw jaw ai shata kum hpa hte gin dan hkra galaw shakut nga taw tim, shi gaw hpa na aya tsaw mat ai, tinang hkum tinang ga san san chye nga ai, dai zawn, ga san shaw dat ai ten, shing nrai, shi hte ngai shingdaw dat yu yang, tinang a matu, masa lamyan amyu myu pru wa chye nga ai.

Byim chye ai mabyim masa ni law law nga tim, hkrak re ai langai gaw, tinang hta, aya tsaw mat ai masha shagu gaw, tinang hta, kaji mi sha mi rai rai, magam bungli galaw ai wa rai nga ai. Aga.... Shata shabrai hte gin dan ai magam galaw yang rai sai le, grau galaw nna, ngai na matu hpa lak lai wa na law nga nna, tsun chye nga ma ai. ndai mahtai hpe galai ntsun yang tsaw ra ai ramma ni hpe, magam gun masha hpan lahkawng nga ai hpe tsun dan mayu ai, Madu myit hte magam bungli galaw ai wa hte, mayam myit hte magam bungli galaw ai wa rai nga ai. Mayam myit hte bungli galaw ai wa gaw, shangun ai hpe galaw ai, gin dan ai ram sha galaw ai, magam bungli ndai hta grau kaja hkra gara hku bai mai galaw ya ai ngu ai lam ni hpe nmyit ai wa rai nga ai, Bai madu myit hte galaw ai wa gaw, bungli hpe lit nga ai hte ngut kre ai sha n-ga, tinang hpe shangun ai bungli hpe grau kaja wa hkra galaw shakut ai, bungli madu wa shangun ai hta grau dam lada hkra gun hpai shakut ai, magam bungli hpe lit la chye ai, tingkyeng magam bungli zawn myit da let, shakut shaja ai, ten na wa ai hte rau, bungli magam hta, n-nga n-mai masha zawn byim wa ai, dai hta, shkut shaja ai lam hpe mu wa nna, grau aya tsaw, grau lu lawm lam maga de bungli madu ni bungli bai jaw ai rai nga ai. Dai majaw, ningtawn ai magam gun masha byim hkra, galoi mung matsing da ra na gaw, magam gun kaja ni gaw, bungli shajan bai jat galaw na matu nmai lit li dum nga ai zawn, tinang a bungli shangut na matu, grau grau shakut nga ai lam rai nga ai. Tsawra ai ramma ni, tinang galaw ra ai hta, grau kaja hkra, grau galaw dat ai gaw, bungli magam hta, tinang hkum tinang gang shatsaw dat ai hte mung bung nga ai re. dai ten, bungli madu ni hku nna, ndai zawn re masha ni hpe, bungli galaw masha hku n-mu mat ai sha, tinang a kam hpa gring ai, magam gun manang langai hku mu mada wa chye ai. Bungli hta, kahtap na galaw chye ai magam gun ni hpe gaw, gawng malai hku pyi myit hkrum nga chye nga ai re. bungli madu ni gaw, ndai zawn ning tawn ai ni hpe, kam hpa nga ai hte, magam gun kaja ni hpe, jahkring hkring ngu na daram, shakawn ga, kum hpaw kum hpa hte, aya shatsaw ya ai lam ni mung, galaw ya chye nga ai re. Ndai gaw hpa hte bung ai i nga yang, kaji ten hta, jawng gawk kata, jawng laika sha n-ga, laga shamu shamawt lam ni kaw mung ning tawn ai lam hta, shagrau kum hpa jaw ai zawn rai nga ai, dai majaw nang bungli grau shakut nga ding yang, nang hpe ning tawn ai magam gun zawn sha mu mada magang sha rai nga ai. anhte ni malawng maga , myit sawn chye ai lam gaw, shata shabai jat ya yang she, magam bungli grau galaw na ngu ai lam rai nga ai. ndai gaw, n-galaw gring ai lam yan langai kaw lawm nga ai re, nshakut ai sha, bungli hpe man man sha galaw  nga ai wa hpe, man man shata shabrai hte, man man aya sha jaw na rai nna, shakut ai wa a matu, gring dan ai aya hte, shata shabrai gaw jaw na sha rai nga ai. Tinang hkum nan mung, bungli madu shara kaw shang yu mai nga ai. tinang ya galaw nga ai aya hta, magam gun langai shatsam dat sai nga yang, tinang gaw, shi kaw na kade ram myit mada na, tinang nga yang, man man sha galaw nga ai wa, shangun ai ram sha galaw nga ai wa hpe, shata shabrai ni, ahkaw ahkang ni shatsaw ya na i, kalang ram sha gaw, mai myit hkam la let, mai shakut nga ai ngu, ramma ni hpe n-gun jaw mayu ai. Ndai ram nga yang tsawra ai ramma kanau kasha ni hku nna, tinang gaw bungli magam hta, man man sha galaw nga ai wa kun?, kaja wa sha shakut shaja nga ai wa kun? tinang hkum tinang chye lu nga sai rai nga ai. Bai tinang hkum tinang san jep lu na matu ga shadawn nkau mi hpe tsun dan mayu nngai, ndai lam yan ni sha re ngu gaw ntsun lu nga ai, dai lam ni gaw,

1. Bungli grai law ai ten hta, bungli dap de jau jau sa nna, bungli ni lawan wan ngut hkra galaw shkut ai lam.2. Bungli shangut ai ten du hkra, bungli hta, hpang hkrat chye ai wa,3. Tinang galaw dat ai bungli gaw, shang nnan lang hta, nkaja shi ai nga yang, ndai hpe, n-lagawn ai sha, hpang kalang bai shakut shaja na matu, jin jin rai nga ai lam, tinang galaw dat ai lam hpe mai kaja tsawm htap hkra byim mayu ai wa. 4. Bungli magam hta, masan sa na matu, bungli hte seng ai sharin dabang ni lung ai wa,5. Bungli shajan ni nga wa ai ten ni hta mung,aput angun ai lam nnga ai sha, lit la galaw chye ai wa ngu zawn re lam yan nkau mi hpe tsun dan mayu ai. Tsawra ai ramma ni, sak prat hta, Give and Take ngu ai Give ngu ai jaw ai magam hte, Take la ai ngu ai hta shawng sa ai rai nga ai. dai majaw jaw ya ai lam ni nga yang, hkam la lu ai lam ni gaw nga chyalu rai nga ai. Tinang gaw lu la mayu ai rai yang, tinang shawng jaw ra ai, dai zawn sha, aya tsaw mayu yang, bungli magam hpe shakut shaja na ra nga ai zawn, aya tsaw lu wa yang she, shata shabrai ni tsaw wa lu na rai nga ai. dai majaw tsawra ai ramma ni, aya tsaw yang she, magam bungli shakut na ngu ai gaw, njaw ai lai masa langai re, dai majaw, madu hkum hpe san jep yu na ra nga sai re, sak prat hta, masha shagu magam bungli galaw nga ga ai, byim wa masa, tsaw ai nem ai lam ni nga tim, teng nga ai lam gaw, tinang hkai ai nli gaw, tinang shu la lu na lam sha rai nga ai. dai majaw tsawra ai ramma ni a prat hta, magam bungli galaw nga ai shagu awng dang ai magam hpe lu madu lu mu ga ngu yaw shada let.

#youth

#rvakachinservice