Anhte A Shawnglam Myit Mada Shara Kashu Kasha Ni A Prat Shimlum Hkra gawgap Ya Ga (1)

    Tsawra hkungga ai kun dinghku kanu kawa ni e anhte kashu kasha ni hpe shinggan hkrit hpa lam amyu myu  sha n ga myit hkam sha lam ni hpe mung shim lum nga hkra galaw ya na gaw anhte kanu kawa ni a lit kaba nan rai nga mali ai.Anhte a kashu kasha ni a matu shim lum hte hpring zup ai hte myit simsa ai hku nna kaba wa lu na matu gaw anhte kanu kawa ni a lit kaba langai mung rai nga ga ai.Asak naw kaji ai aten kaw nna myit shim lum ai lam nlu ai kashu kasha ni hta asak kaba ram wa ai ten shinggan kaw nna mayak mahkak lam ni dip da ai hpe dang mangak lu na atsam hpring zup nlu nna myit ru pu hpa ai lam ni hpe hkrum kadup sha chye nga ai.Anhte a kashu kasha ni myit hkam sha lam gaw grai simani kya nga ai majaw anhte kanu kawa ni a lai shamu shamawt galaw sa ai lam mung simani ra nga ai.Masing sumting lam kaja ai ten re majaw anhte kanu kawa ni a shamu shamawt galaw sa ai lam shagu gaw Ma ni a matu galoi mung nlu malap ai matsing nga na sha rai nga ai.Dai majaw kya nya ai sumnung sumdi ai lai kyang ni hpe sha anhte kanu kawa ni jai lang sharin shaga ga.

    Akyu ara lam ni hpe aten shara hta hkan nna anhte a Ma ni hpe sharin shaga ai lam gaw Ma ni a matu grau nna myit shim lum lam lu nga ai.Shinggan kaw nna manghkang lam amyu myu a majaw kashu kasha ma ni myit hpe ningma kap shangun chye ai majaw shinggan de na manghkang ni hpe nta kata de nlawm pru wa hkra sadi galaw ra nga ai.Anhte Kanu yan Kawa ninggyet  Ga law hkat ai ten hta mung anhte a kashu kasha ni a shawng hta nbyin hkra madu jan madu wa lahkawng yang grai sadi ga ngu tsun mayu  ai.Ndai zawn rai dum nta kata madu jan madu wa shada ga law ninggyet hkat ai lam gaw Kanu yan Kawa hta manoi shamyet shanat nga ai kashu kasha ma ni a kya simani ai myit hpe hkrit kajawng mat wa shangun  chye nga ai re.Bai nna tsawra hkungga ai kun dinghku kanu kawa ni e shinggan na jasam ni hpe mung sadi maja ra nga ai.Hpa majaw nga yang jasam ni gaw ma ni hpe dingbai dingna jaw chye nga ai.

    Dai majaw shinggan de ni jasam ni hpe shana nga yup na matu hkap hkalum ai jahkring hkring sa du ai lam ni hpe mai byin yang nhkap la na matu sadi ra ga ai.Anhte Kashu kasha ma ni a myit hta shim lum lam nnga ai zawn hkam sha mat chye nga ai..Anhte kashu kasha ni hpe Kya nna simani ai hte tsun shaga sharin shaga ai lam gaw Ma ni hpe grau nna ga madat mara wa nna myit su ai kashu kasha ni byin tai wa lu na rai nga ai.Bai nna tsawra hkungga ai Kanu Kawa ni a anhte a Kashu kasha ma hpe hkrai (Shnr) shanhte hpe hkrai dum nta hta aten na na nmai tawn da ai.Hpa majaw nga yang anhte Kanu kawa ni makau kaw nga yang she Ma ni a myit hta myit hte hkum hkrang hpe shim lum lam hpe jaw ya lu nga ai re.Bai langai dum da ra na gaw Maw Car,Cycle zawn re ai kaw nna anhte kashu kasha ni  hpe nhkra machyi hkra sadi lakawn na mung ahkyak nga ga ai.Grau nna gaw anhte a kashu kasha ni hpe hkrit tsang ra ai shara ni de nwoi hkawm ai lam gaw kaja dik rai nga ai.Bai nna Nu Wa ni e Kashu Kasha ma ni gaw anhte kanu kawa ni a prat a mung myit mada shara tsawra dik ai ni re majaw  nta kata hta mung anhte kashu kasha  ni hpe hkra machye ai hkala chye ai arung arai mi hprap wan arung arai,tsi arai ni,latung sat tsi,shakya rai ni hte nta hta lang ai nhtu zen dau zawn re ai ni hpe mung atsawm shim ai shara hta tawn da nna anhte  a kashu kasha ni shim lam hpe manu shadan makawp maga sa wa ga.

by; John Mung Hkrang