Kashu Kasha Ma ni hpe Gayet adup sharin shaga ai lam hte Njaw ai lam hta Myit ra hkan ya ai lam hpe koi gam ga

Tsawra hkungga nu wa ni e anhte a kashu kasha ni hpe sharin shaga ai shaloi lata du kayat adup sharin shaga ai lam koi gam ra ai. Raitim kachyi pyi nkayat mai ai ngu tsun mayu ai lam gaw nre ai zawn galoi mung kayat taw ai ngu ai hpe mung tsun mayu ai rai nga ai.Tinang shangai shaprat tawn ai kashu kasha ni myit nsu ai ten kayat sharin shaga ra ai ngu anhte naw kam nga ai.Raitim kaman majoi mara kata lata lawm kayat adup ai lam hpe gaw anhte koi gam ra ga ai.Anhte nkau kanu kawa ni gaw n gup hte ntsun taw ai sha lata du kayat ai,ni htep arung arai ni hte kabai bun kayat re ai lam ni galaw ai lam ni nga nga ai re.

Dai zawn galaw ai lam hpe anhte kanu kawa ni koi gam yang kaja na re ngu tsun shadum mayu nngai.Anhte Kanu Kawa ngu ai ni gaw Kashu Kasha ni shawng nnan na lam madun sharin sara ni re hpe anhte myit dum ra na ga ai. Dai majaw tsawra ai nu wa hpu nau ni e Mazut matsai ai kanu kawa kaw na pru wa ai kashu kasha ni mung mazut matsai ai laikyang  shi hkrai kap wa galaw wa chye nga ai re.Bai nna anhte shangai shaprat da ai kashu kasha ni hpe ndai zawn mazut matsai ai hte kanawn mazum sharin shaga ai lam gaw kashu kasha ni hpe myitsu shangun mayu ai hta  myi man kaji shangun mayu ai lam gaw grau law nga ai.Dai majaw tsawra hkungga kanu kawa ni e tinang shangai shaprat da ai kashu kasha ni hpe sharin shaga nga jang shanhte hpe anhte gaw jet tsawra shawang myit kaba hte jaw kaja ladat hte tsun sharin shaga na matu anhte myit sawn sumru yu nna tsun sharin shaga ga ngu tsun mayu nngai.Bai nna tsawra hkungga nu wa ni e anhte a kashu kasha Ma ni hpe shara shut nan myit ra hkan ya ai lam hpe koi gam chye ra ai.Anhte Kanu kawa ni hku nna kashu kasha Ma ni hpe myit ra hkan ya ai lam gaw galaw byin mai ai lam gaw rai nga ai.Raitim shut njaw ai myit ra hkan ya ai ladat mung nga ai re.

Dai ni gaw masha kaga ni a arung arai hpe ra sharawng ai nga yang hkan galaw ya ai,nmai byin manu laja dik ai lam ni hpe hpyi aput wa ai ten ga shadawn Shangai nhtoi poi hkan Mawdaw mari ya rit nga wa yang tinang gaw sut su lu taw nga ai nga tim nmai hkan galaw ya ai.Bai nna hkum npyaw ai machyi ai majaw jawng nsa ai nga yang gaw mara nrai tim hkamja lam mung nga ai lamu marang mung kaja ai jawng nkam sa ai majaw hkrap aput nga ai hpe n yu gwi ai majaw myit ra hkan ya ai,ra sharawng ai hpe nlu ai majaw hkrap marawn nga ai hpe ahkang jaw taw nga ai lam ni matsa mawa matsai nga ai hpe Ma she re gaw ngu dat da ai lam ni gaw myit ra hkan ya ai lam gaw shut ai lam nan rai nga ai.Tinang Kanu Kawa ni hpe pyi sumnung singdi lam nnga ai Ma gaw makau grup yin hte shinggyim uhpung uhpawng a ntsa simani sumnung singdi na ngu ai gaw nmai byin na rai nga ai.Dai majaw tsawra ai nu wa ni e anhte a kashu kasha ni hpe myit ra hkan ya na nga jang atsawm sha shawng myit yu ra ai.Shanhte ra ai lam hpe galaw shangun jaw dat ai rai yang tinang a kashu kasha ma ni gara hku byin wa na tsawm gaw rai na kun ngu ai lam hpe myit sawn yu ra ai. Anhte a kashu kasha Ma ni a shawng lam prat tsawm htap hprinem na matu gaw anhte Kanu Kawa ni  a lata hta sha rai nga ai.

By : John Mung Hkrang