Kun Dum Nta Masha Shada Galoi Mung Kanawn Mazum Lam Kaja Hkra shakut nga Ga!

Tsawra hkungga nu wa ni  e mungkan hta tinang a matu lam magup hpe galoi mung chye na ya nna tsawra makawp maga ya lu ai gaw tinang dum nta masha ni sha rai nga ai.Kaning re ai masa lam hta raitim tinang maga galoi mung tsap ya nga ai,kaga masha ni tinang a lam hpe kade mi nkaja ai hku mi tsun tsun tinang hpe n gun jaw shalan shabran ga tsun ai ni gaw tinang dum nta masha ni sha rai ng ai. Ya na zawn tinang a prat a matu lam magup rai nga ai dum nta masha ni hte kanawn mazum lam hpe galoi mung kaja ai hku nna zinghkang lu tawn na matu hte grau nna kaja na matu gara hku galaw ra ai ngu ai lam hpe tsun dan mayu nngai.Myi man hkrum rai nna rau tsun shaga ai lam rai nga ai.Ndai lam hpe anhte nkau ni myit hta grai wa n ahkyak ai ngu  hkam la sawn la re.Raitim anhte kun dinghku nkau hta gaw dum nta masha shada madu jan madu wa shada rau myi man hkrum rai tsun shaga ai lam aten lu ai nkam shaga hkat ai lam ni byin chye ai re.Dai majaw tsawra kanu kawa ni Grai n ahkyak ai lam shingnrai dum nta masha ni kaga ga shada tsan gang taw nga ia ten ni hta sha phone hte matut mahkai shaga ai,laika hte ka shagun hkat ai lam ni galaw mai nga ai.Dai nrai yang tinang a dum nta masha ni hte rau dung jawm mung jahta shaga chyai ai lam ni galaw ra nga ai.Ndai zawn galaw ai lam gaw tinang a dum nta masha ni hte grau nna hku hkau kanawn mazum lam grau nna kaja wa ai re.

Bai nna gaw Ga shaga ai shaloi simani ai hte tsun shaga ai lam rai nga ai.Tsawra nu wa ni e dum nta masha shada mi raitim kalang marang gaw myit kadun pawt mayu pawt ai lam myit hta atsawm nnga ai lam ni nga wa yang gaw ga nsen hta pawt ai marawn ai nsen ni lawm wa chye nga ai re. Raitim ya na zawn masin jasat pawt nsen hte ntsun hkrum shi yang tinang wa shi shara kaw rai yang ngu myit sawn myit tau yu mai nga ai.Anhte a jahkring mi na pawt ai majaw tinang a tsawra ai dum nta masha ni myit npyaw myit hkra machyi ai lam hpe nbyin hkra anhte koi gam ra ai.Bai nna tsawra hkungga nu wa ni e anhte gara hku hkam sha taw nga ai ngu ai hpe atsawm asan sha tsun dan ra ai.Kade daram dum nta masha shada re ngu tsun yang tsun masu ai hpe tawt lai mai ngu nmai hkam la ai.Kaga wa hpe mung mara nmai shangun ai zawn tinang mara galaw ai rai yang mung galaw da ai ngu atsawm asan brang lang tsun dan nna hpyi nem ra ai.Dai hta n ga tinang gara hkum hkam sha ai ngu ai lam hpe tinang a dum nta masha ni hpe makoi da,ip da ai lam nnga ai sha tsun dan ra ai.dai nrai yang chye na shut ai lam ni law wa jang dinghkum nta masha shada kanawn mazum lam ga garan wa chye nga ai re. Dai majaw tsawra hkungga ai nu wa ni e Ya tsun lai wa sai lam hpe galoi mung sadi da galaw sa wa ai rai yang tinang a kun dinghku dum nta masha shada grau nna galoi mung kaja ai kanawn mazum lam hpe lu la na sha rai nga ai.

By: John Mung Hkrang