Prat ngu ai gaw kabu gara ai shiga shachyam shabra gat hkai na matu manu dan ai aten ni rai nga ai, nga nna Wa sarabyin Francis tsun dat nga ai shiga

Prat ngu ai gaw kabu gara ai shiga shachyam shabra gat hkai na matu manu dan ai aten ni rai nga ai, nga nna Wa sarabyin Francis tsun dat nga ai shiga

Prat ngu ai gaw sak jaw na matu kumhpa re,  myit hkyi lit li ai myit ni hte nga pra nga na matu nrai, kabu gara ai shiga shachyam shabra gat hkai na matu manu dan ai aten ni she rai nga ai, nga nna Wa sarabyin Francis tsun dat nga ai. Oct 20 ya, World Mission Sunday ngu ai, Sasana Laban Missa hkungga mungga hta lahta na zawn Wa Sarabyin tsun lai wa ai lam rai nga ai.

Kabu gara ai shiga shachyam shabra gat hkai na hkawm sa nga ai sasana magam gun ni hpe lak san akyu hpyi ai lam galaw na matu mung, kabu gara shiga gat hkai na nawku hpung a sasana myit hpe bai shangang shakang la ai lam ni galaw na matu mung yaw shada let, ndai Sasana laban hpe masat galaw na matu 1926 ning hta Wa sarabyin Pius XI kaw nna ndau Masat da ya lai wa ai rai nga ai.

Sasana laban shani Wa sarabyin Francis hkaw tsun ai hta, “Hkristian ni gaw galoi mung shamu shamawt nga ra ai, masha shagu gaw kaga masha ni kaw nna lama lama lu la na hpe madaw myit mada chye ma ai, raitim mung Hkristian ni gaw dai hku nrai tinang madaw kaga masha ni hpang de pru hkawm sa ra ai, Madu Yesu hpe hkap la hkam sham ai ni gaw, tinang tsawra hku hkau ai masha ni a lapran hta sha nrai, yawng mayawng hpang de du dep hkra pru hkawm sa ra ai. Dai zawn pru hkawm sa ai ngu ai hta galaw ra ai lam langai sha nga nga ai, dai gaw masha shagu hpe tinang a sape nrai, Madu Yesu a sape shatai na matu rai nga ai. Madu Yesu a hpang hkang nang ai sape gaw, sape langai tai nga lu ai shi a kabu gara ai nam chyim hpe kaga masha ni hpe gam garan jaw nga na rai nga ai. Dai zawn gam garan jaw ai lam hta, masha ni hpe adip arip di nna dip gamyet la ai, hpung htak hpung gale shangun ai masa hku nrai, kasi kaja madun sake hkam nga sa ai hku nna she rai ra na rai nga ai. Anhte a sasana magam gaw, mungkan ga a awu asin maza mala re ai, nsan seng ai nbung ni hta kaput rawng nga ai masha ni hpe san seng ai bungli katsi jaw ya na matu re, sakse hkam nga sa ai, shaman chyeju tai ya ai, shalan shabran lam jaw ya ai, shadaw shangang ya ai, Madu Yesu a tsawm htap mai kaja ai lam ni hpe jahtoi shaleng ya na matu rai nga ai. Prat ngu ai gaw sak jaw na matu kumhpa re,  myit hkyi lit li ai myit ni hte nga pra nga na matu nrai, kabu gara ai shiga shachyam shabra gat hkai na matu manu dan ai aten ni she rai nga ai, dai re majaw magrau grang ai myit marai ni the shawng de sit nawt pru sa nga ga” nga nna Wa sarabyin Fracnsi hkaw tsun lai wa ai lam Vatican shiga dap kaw nna shana dat nga ai.         

https://www.vaticannews.va/en/pope/news/2019-10/pope-at-world-mission-day-mass-life-as-mission-and-as-gift.html