San pra ai masha nnan marai (5) bai dang dat sai shiga

San pra ai masha nnan marai (5) bai dang dat sai shiga

Lai wa sai Laban, Oct 13 ya shani San Peter pa kaba hta nawng ya ai Missa hkungga hta, Wa Sarabyin Francis kaw nna San pra ai masha nnan marai 5 bai dang dat sai rai nga ai. San pra ai masha nnan marai (5)  gaw Cardinal John Henry Newman, Mama Giuseppina Vannini, Mama Mariam Thresia Chiaramel Mankidiyan, Mama Dulce Lopes Pontes, hte Marquerite Bays ni rai ma ai.

“Anhte a makam masham hkrun lam hta tsang ninggam (3) nga nga ai, dai gaw Kabu gara ai shiga hta mu lu ai mang gang kap ai masha ni galaw lai wa ai, “jahtau marawn ai, hkawm sa ai, chyeju dum ai” ngu ai hpan (3) rai nga ai” nga nna San pra ai masha dang da ai Missa hkungga mungga hta Wa sarabyin Francis hkaw tsun lai wa ai.

Wa sarabyin tsun ai hta, “Shanhte a mang gang ana hte dai ana a majaw masha uhpung kaw nna jahka da hkrum ai lam ni a majaw mang gang kap ai masha ni kaw nna lachyen ginghka lam n galaw chye ai Karai kasang hpe jahtau marawn lam galaw ma ai, Karai Kasang mung shanhte a jahtau marawn ai nsen hpe na madat ya sai rai nga ai. Dai zawn sha anhte mung shamai shatsai ya mi ga matu Madu hpe hpyi jahtau ra ga ai, ung ang ai myit, hkrit tsang ai myit ni hpe shamai shatsai ya na matu, mungkan sut gan ja gum hpraw ni hpe ladu shalai marin myit dun ai myit ni hpe tsi shamai ya na matu, phone hpe ladu shalai lang ai, phone hta rawng ai ginsup hpan lam ni hta ya tai ai lam ni kaw nna tsi shamai ya na matu Madu hpe anhte hpyi jahtau ra ga ai. Nam bat lahkawng ngu na makam masham hkrun lam ning gam gaw ‘shamu shamawt hkawm sa ai’ ngu ai lam rai nga ai. Mang gang kap ai masha ni hku nna Madu a man hta tsap nga ai aten mai tsai wa ma ai nrai, shamawt hkawm sa wa ai aten hta she shamai shatsai lam lu la ma ai rai nga ai. Dai zawn sha makam masham hkrun lam hpe anhte hkawm sa ra ga ai. Anhte a lagaw ni hpe sharawt nna tinang a prat kaw nna pru wa ra ga ai, makam masham ngu ai gaw shagrit shanem ai myit the ta tut hkawm sa ai prat rai nga ai. Anhte a hpu nau ni hpe garum lakawn la lam galaw na matu anhte pru hkawm sa ra ga ai. Masum ngu na ning gam gaw chyeju dum ai lam rai nga ai. Bai gin htang wa nna chyeju dum ai lam wa galaw ai mang gang kap ai masha wa hpe she ‘na a makam masham nang hpe hkye la nit dai’ nga nna Madu Yesu tsun ai rai nga ai. Anhte a jahtum ban dung madung gaw shamai shatsai hkrum lu na matu chyu sha nrai, Madu hte hkrum kadup na matu she rai nga ai. Shi madu chyu sha anhte a prat hpe hkum tsup ai prat tsawm htap ai prat shabyin shatai ya lu nga ai. Ya dai ni san pra ai masha tai wa ni kaw na marai (3) gaw Mama ni rai ma ai. Ma ma prat ngu ai gaw masha ni hpe tsawra ai hte daw jau let sak hkrung ai makam hkrun lam prat rai nga ai. Bai San pra ai masha tai wa sai yu maya num sha rai nga ai Marquerite Bays hku nna mung anhte a shani shagu na akyu hpyi ga ni gaw n gun atsam kaba rawng nga ai ngu ai lam hpe shadum ya ai. Ndai masha ni zawn sha anhte mung myit daw myit hten myit kaji nga ai masha ni hpe n gun tai ya lu ai, nhtoi tai ya lu ai ni byin tai hkra garum ya rit ngu Madu kaw akyu hpyi ga” nga nna Wa sarabyin hkaw tsun lai wa ai lam Vatican shiga dap kaw nna shana dat nga ai.                  

https://www.vaticannews.va/en/pope/news/2019-10/pope-canonization-mass-st-peters-newman.html