Hka Ja Ra Sai Laili Laika ( Youth Program )

Masha langai a myit masa bawng ring lam hte, U-hpung u-hpawng langai a nga sat nga sa, htung hkying rawt jat lam ni hta, machye machyang hpaji gaw, grai ahkyak nga ga ai. “ Masha langai a prat hta, kanu, kawa, kaji, kawoi ni tsun sharin shaga ai hta, nhkum zup lu ai machye machyang ni hpe, laili laika ni hta, matut  n-na, hkaja la ra ai” ngu ai ga matsun ni mung na yu na ga ai. Hpaji machye machyang n-hkum zup lu ai prat hta na, kanu kawa ni gaw, kashu kasha ni hpe, tinang chye da ai daram tsun dan, hkai mawoi dan ai raitim, prat madang tsaw let, ding yang rawt jat galu kaba nga ai mungkan a hpaji machye machyang ni hpe gaw, anhte a kanu kawa ni tsun dan nlu nga ai. Dai majaw prat hta hkan nna, makau grup yin rawt jat galu kaba wa ai hpaji ni hpe, lu chye dep hkawn lu na matu gaw, laili laika hti hkaja ai lam gaw, grai ahkyak nga ai.

Lai sai ten ni hta, hpaji n-hkum zup lu ai raitim, tsang 10 awng, jan mau gup da lu yang, akyu grai rawng nga ai. Raitim ya na p rat hta, tsang 10 hte sha gaw nmai, jan mau gup da tim, matut manoi hka  ja ai lam nnga yang, akyu  nrawng nga ai. Ya prat hta, Computer, Internet, Facebook, Wechat, amyu myu rai nna, mai sau laika hta grau lawan ai, manu laja ai, lang manu ai, prat madang  tsaw ai jak arung arai  law law nga nga ga ai. N-kau mi gaw, ndai zawn re ai jak arung arai ni hpe grai chye jai lang chye nga ma ai. Grai mung madang tsaw ai, aten dep shi ga ni hti la lu ai, chye la lu ai. Raitim n-dai jak arung arai ni gaw, masha a matu akyu rawng ai lam ni hpe jaw ya lu ai zawn, n-rawng ai lam ni mung law law nga ga ai. Teng man ai shiga lawm ai zawn, nteng ai ni mung law law rai nga ai. Dai majaw jai lang chye ai ni a matu gaw, akyu grai rawng ai zawn, jai lang shut ai ni a matu gaw, akyu loi pyi nrawng ai hta n-ga, masha a hkum hkrang, myit masa hte, htung hkying lai len ni hpe jahten kau ya chye nga ga ai. Dai majaw ndai jak rai ni gaw, shadawn sharam let, jai lang chye ra nga ai. Awng dang ai masha shagu gaw, laili laika hti ai lam hpe chyu madung dat ga ai. Jak arung arai ni hte, internet, facebook ni hpe ra ai hku na sha, akyu jashawn jai lang nga ma ai. Prat a matu kaja wa, hka ja ai lam hta, manu ai gaw, laili laika hti ai lam madung rai nga ai.

Hpaji hka ja ai lam ngu ai hta e, sharawng shara hte, laili laika hti mayu ai myit gaw ahkyak nga ai. Dai majaw laika hti hka ja mayu ai myit masa hpe, shawng gaw gap la ra ai. Magam lam shagu hta, sharawng ai myit masa hte, shakut ai myit masa nrawng yang gaw, akyu rawng ai lam nnga ai sha n-ga, awng dang lam mung lu na nrai nga ai. Masha n-kau mi gaw, laika hti hka ja ai lam hpe, akyu nrawng ai, aten shama ai, hti da ai laika ni  hpe bai malap ai, ngai hti ai laika hte, ngai galaw ai magam lam ni n-htuk ai ngu tsun chye ma ai. Kadai mung ningnan galaw ai magam lam shagu hta, ning pawt hpang la na matu gaw grai yak nga ga ai. Dai hte maren sha laika hti chye ai myit masa gawgap la lu na matu mung, nloi nga ai. Masha shagu hti ai laika hte, mying kaba ai laika hta, akyu rawng ai hkrai sha gaw, yawng nrai nga ai, akyu rawng ai ga si ni, hpaji ni sha mung nlawm nga ai. Raitim laika shagu gaw, akyu rawng ai lam manu dan ai lam, teng man ai lam ni chyu rai nga ai. Dai majaw nkau mi gaw, sharawng shara hte, ka matsing ai lam ni, galaw chye ma ai. Bai nkau mi gaw, loi loi hte sha bai jai lang akyu jashawn lu na matu, laika buk ni hta, ka mahkret matsing chye ma ai. Gara hku mi rai rai, laika hti mayu ai myit masa ding grin rawng nga yang sha pyi, anhte a matu akyu rawng nga saga ai.

Laika hti mayu ai  myit hte hka ja nga ai masha langai gaw, matsing ai mi raitim, nmatsing ai mi raitim, akyu rawng ai lam gaw, tinang hkum tinang nmu mada ai sha, kaja wa laika hti hkaja ai a apu asi ni, tinang a machye machyang hta, nli tum zawn rawng nga ga ai. Dai nli tum hpe bai rawt jat bawng ring kalu kaba wa hkra, matut manoi hka ja ai lam hpe, galaw yang gaw, apu asi ni hpe anhte hkum nan hkam sha lu na ga ai. Dai zawn laika ni hpe, hti hka ja ai masha langai a prat gaw, kalang lang, ndum shami lak lai ai akyu ni hkam sha ai hpe, hkam la lu ga ai.Dai hta n-ga lak lai ai rawt jat galu kaba, awng dang lu ai hpe mung, mu lu nga ga ai. U-hpung u-hpawng hte, shawa daw tsa hta, lak lai ai kyang lailen ni hte, lak lai ai hte mu mada lu ga ai. Ga shadawn,… kanawn mazum lam ni hta, lak lai ai hku woi awn sa let,  myit yu sawn yu ai hte, daw dan hparan chye ai, Tsun shaga ai hta si mani chye ai, Jaw ai njaw ai akyu rawng ai nrawng ai lam ni hpe, garan ginhka chye nga ai. Myit masa lam ni, bawng ring galu kaba wa ai. Tinang a bandung shadaw hpe tawn let, shakut chye wa ai.

Hpaji hka ja ai wa hte  hka ja ai lam nnga ai wa gaw, grai shai nga lu ai. Hpaji hka ja ai lam n-nga ai wa gaw, magam lam shagu hpe myit lu ai hku galaw chye ai. Tinang a matu chyu myit ai zawn, tinang galaw ai magam lam, rawt jat, awng dang na lam hpe, ntam lu ai, lu ai hte sha, myit dik nna, ang ai daram sha galaw chye ai, shadawn sharam hte sha nga chye ai. Hpaji hka ja ai wa gaw, magam bungli shagu hpe, myit yu sawn yu ai hte, galaw chye ai. Masha ni a matu galoi mung, madung tawn let , tinang a hka ja da ai laika hpaji ni hpe, jai lang akyu jashawn chye nga ai.

Dai majaw kaja wa teng sha, laika hti hka ja ai wa a prat gaw, akyu nrawng ai, manu ndan ai ngu ai gaw nnga ga ai. Bawnu ni hta nrawng ai, nmatsing ai rai tim, kaja wa dai akyu ni gaw, anhte hpe n-mu mada ai hku, akyu jaw nga ga ai.Anhte mung dai hpaji ni hpe ndum shami, jai lang taw nga ga ai. Anhte tsun shaga, galaw hkawm sa wa ai lam ni yawng hta, anhte a mahkrum madup hte machye machyang hpaji ni hpe jai lang taw nga ga ai. Dai re majaw, tinang a prat grau nna, galu kaba bawng ring wa lu na matu gaw, laika hti hka ja ai lam hpe, sharawng shara rai ra nga ga ai, Dai hta n-ga, hti la lu sai laika ni hpe mung, ahkaw ahkang lu ai hte rau, tatut jai lang lu hkra mung shakut ra ai.Dai rai yang, laika hti hka ja ai lam a manu dan ai lam gaw, tinang a matu chyu nrai, kaga masha ni a matu mung, manu dan akyu pru ai lam gaw, dan dawng wa lu nga ga ai law

#youthprogram

#crdpeterlahtawzawawng(miv)

#rvakachinservice.