Zet Let Pyaw Hpa Kanu Num Ni A Prat

Zet Let Pyaw hpa Kanu num ni a prat

                Zet let pyaw hpa Dinghku kanu ni a prat ngu ai lam hte seng nna tsawra hkungga ai nu wa hpu nau ni hpe garan kachan ya na nngai.Tsaw ra hkungga ai Dinghku Kanu num ni e ya prat Num La maren mara rai hkawm taw nga ai prat hta Dingku Kanu san san byin ai hpe grai grit nem ai ngu mu mada chye ma ai.Dinghku Kanu rai yang nta bungli shinggan bungli galaw taw nga ai prat dep kanu ni lapran dum nta kaw Ma rem Ma yu let nga ai hpe lagawn hpa ngu bai shadu chye ma ai.Raitim tinang a kasha hpe tinang nan rem hkang lu ai,dum nta hpe mung tinang nan yu makawp maga lu ai dinghku kanu jet jet ni a shaman chyeju ni hpe shinggan bungli hte re ai dinghku kanu ni chye na na nrai nga ai.Tinang a prat kade daram gam kaja ai hpe nchye ai dinghku kanu ni a matu nga pyaw zet let ai hte nga sa lu ai lam ni hpe tsun garan gachyan ya na nngai.Shaman chyeju a majaw dinghku kanu tai lu ai rai nga ai.Tinang kasha hpe tinang nan yu gawn lajang lu ai gaw daini na prat hta gara dinghku kanu ni aloi sha nlu wa nga sai re.Bungli maga mi Ma maga mi hte yak taw nga ai ni hpe yu tinang kade daram gam kaja ai ngu ai hpe yu nna apawt a ngun nga ai lam ni hpe jahkring kau mai sai.Nta shangun jahpan masha,Ma rem masha ni hte Ma ni hpe tawn da ra ai majaw dum nta na arung arai ni mat na tsang nna myit htep nnga ai lam ni byin nga ai dinghku kanu ni hpe yu yang hpring zup ai pyaw lam lu ai kun? tinang a dum nta hpe tinang hkum nan reng hkang lu nna tinang ai kasha ni a prat hpe mung tinang nan kaja dik ai hku hkrang shapraw ya lu nga ai re.Bai nna Dinghku Kanu ngu byin tai lu ai hpe arawng la chye ra ai.Kaja nga yang Dinghku kanu nta madu jan ni gaw shinggan de bungli galaw ai ni hta grau pu ba ai rai nga ai.Shinggan de bungli galaw taw nga ai ni gaw masat da ai aten bungli ngut jang nta wa nna hkring sa nga lu ai raitim Nta madu jan ni gaw Jahpawt nhtoi nsan shi ai  kaw nna shana yup ra shang ai ten du hkra n hkring nsa bungli galaw nga ai ni rai nga ai.Nta madu jan ni gaw nta madu wa tam ai ja gumhpraw hte atsawm sha nta nga ai ngu tsun ai ni hpe lani mi daram sha pyi shara galai ga ngu tsun yu u.shaloi gade daram ba ai lam hpe chye na na rai nga ai.Dai re majaw nta madu jan dinghku kanu ngu ai gaw dum nta masha ni yawng a matu lu na sha na ra mara hpe yu lajang ya nga ai wa re majaw dinghku nta masha ni a matu nnga nmai nan rai nga ai.Dum nta langai a ra mara yawng gaw ja gumhpraw hte  sha n hpring zup nga ai  zawn ja gumhpraw nga tim kaga ra ahkyak ai lam ni yawng hpe jahpring shazup ya nga ai gaw nta madu jan dinghku kanu nan re majaw anhte kanu num ni arawng la ga ngu tsun n gun jaw mayu ai.Bai nna tsawra ai nta madu jan dinghku kanu num ni e ngai gaw dum nta kaw she nga ai gaw nga nna byin mai ai hku hkrup mara rai nga nmai nga ai san² seng² tsawm htap hkra nga na mung kundinghku kanu langai hta lit nga ai re.Dum nta masha ni nta bai wa ai ten nta madu jan dinghku kanu gaw  asan a pyaw rai nga yang she shanhte mung myit asan nga na rai nga ai.Bai nna masha hkum langai a myit asan simsa na matu gaw tinang hkum nan a shingan lam ni mung san seng nga ra ai re.Nta bungli ni a majaw hka shin na aten nrau ngu nbyin na matu hka shin jasan japan na ten lak san masat da ra ai.Ten shagu gaw masha ni a matu hkrai asak hkrung nmai nga ai tinang a matu mung myit ra nga ai.Bu hpun palawng mari gat sa ai lam ni mung galaw ra ai.Masha ngu ai gaw galoi mung asan apan rai nga yang she tinang hkum tinang nan mung kam na rai nga ai.Tinang hkum tinang kam hpa ai lam nga ai  nta madu jan dinghku kanu ni gaw kaga myu shayi ni hta grau tsawm htap nna n gun rawng nga ai lam ya nan sak se madun ga.Bai nna nta madu jan law malawng gaw nta bungli ni galaw nna pu ba ai majaw shana yup ten du ai hte makau kaw na ningrum ningtau wa hpe hpyi ahkyak nla hkra kalang ta yup pyaw mat ai ni nga nga ai re.Zet let pyaw chye ai dinghku kanu kaja gaw nta madu wa hte alum ala ganawm mazum chye na mung grai nan ahkyak ai rai nga ai.Dum nta masha ni dum nta hta nga pyaw,nta madu wa aten du yang dum nta de wa mayu ai myit ni nga wa hkra nta madu jan dinghku kanu ni galaw lu nga ai.Nta madu jan dinghku kanu ni a lit gaw jahpawt nhtoi htoi ai hte dun ye,si shat shadu nga manga rai hkrut hte sha gaw nngut nga ai,dum nta masha ni nga pyaw ai nta,tinang hkum nan mung myit ngwi pyaw sim sa ai shara byin tai lu na matu galaw la ra nga ai re.

                               Bai nna dum nta masha ni hpe hkamja lam hte  htuk hkrak ai malu masha ni hpe tinang hkum nan shadaw jaw lu ai gaw arawng la hpa nan rai nga ai.tinang nan gyin shalat shadu ai shat maw shat mai ni hte dum nta masha ni rau pyaw pyaw sha mat nga ai ya prat hta kalang ta sha mai ai malu masha ni gaw hkamja lam hte nhtuk nga ai.Dai majaw tinang tsawra ai dum nta masha ni hpe tinang hkum nan hkamja lam hte htuk hkra shadu jaw lu ai gaw dum nta masha ni a matu kaja ai zawn nta madu jan hkum nan mung myit pyaw hpa lu ai majaw jet ai nta madu jan tai ai hpe pyaw pyaw hte arawng la ga ngu tsun garan gachyan mayu ai.Nta madu jan ngu ai kun dinghku kanu ngu ai prat hte sha nga sa ai hku na wa jang lagawn wa chye nga ai.Dai shaloi nmu nhkrum ai na sai num sha manang ni hte hkrum shaga pyaw let  shayi num sha prat hpe bai dum hkam sha lu tam la mai nga ai.Dum nta bungli ni hte tinang a myi man Chyam na bai yu na nrau ai nga ai ni gaw  pyaw hpa dinghku kanu prat hpe nra ai ni rai nga ai.Nta madu jan dinghku kanu gaw dum nta masha ni yawng a kam hpa shara langai re ai zawn hkam sha lam hpe tsun dan na manang mung rai nga ai.Kashu kasha ni  jawng hta hpa byin ai lam hpe tsun dan ai.Ningrum ningtau wa bungli hta byin ai lam hpe tsun dan na,ndai zawn tsun dan ai lam hpe tinang hkrai sha madat ai re majaw salum kata lama mi hkam sha taw nga na re.Dai majaw tsun dan ai ni hpe hpaji jaw ai lam hparan ya ai lam ni galaw ngut jang gaw salum hta nzing da ai sha malap kau ra nga ai.Nta masha ni tsun dan ai yawng hpe salum kaw sha zing da ai rai yang ana byin wa na tsang ra nga ai.Bai nna tinang tsun ra tsun mayu ai lam hpe dum nta masha ni hpe tsun dan ra ai.Masha ngu ai gaw myit shalan shabran ya ai hpe ra ni rai nga ai tinang hkum tinang shalan shabran na matu nga yang tsun yang she chye na re nga ai hkrai rai nga ai.Dai re majaw tsun dan yang she chye na ni hpe tsun dan ra ai.Masin salum hta zing da nna hkam sha nga ai rai yang hpang jahtum tinang hkum tinang sha jam jau jaw ai lam ni byin wa chye nga ai .Dai majaw tinang hkam sha ai lam ni hpe mung dum nta masha ni hpe tsun dan ga ngu let tsawra hkungga ai nta madu jan kun dinghku kanu ni yawng ngwi pyaw zet let ai dinghku kanu ni rai nga ga.

By : John Mung Hkrang