Akyu Hpyi Ai A Chyeju ( Youth Program )

Tsaw Ra Ai Ramma Ni..Hkristan hpung masha tai na, masha shagu gaw, kashin kamun hkam ra nga ga ai. Hpa majaw nga yang, kashin kamun hkam ai a marang e, dai masha ni gaw, nnan bai shangai hkrum ai hte, Madu Karai Kasang hte rau, hkawm sa hpang ai masha ni tai wa ai, hkristan hpung masha langai a akyu hpyi ai ning pawt ning hpang gaw, kashin kamun hkam ai a marang e, hpang wa sai rai nga ai.Dai hte maren, kaja tatut hta, anhte hkum nan Karai Kasang hpang de aja wa myit lawm hkum lawm rai nna, nhtang gayin wa ai hte karai kasang hpe ap nawng daw jau ai magam bungli ni hta, gun hpai na matu, myit shatawng da let, jet ai lai nsam hte, sharawng shara rai gun hpai ai mung akyu hpyi ai a ningpawt rai nga ai.

Karai Kasang a chyeju gaw, anhte hpe akyu hpyi ai asak hpe jaw ya sai re majaw, anhte mung karai kasang hpang de akyu hpyi sit shang galaw ai lam gaw, anhte a asak aprat hpe, karai kasang hte rau, nnan hkahkim hkum din lu na matu rai nga ai. Dai re ai majaw, tinang nawku hpung kaw nna, anhte a asak aprat hpe, karai kasang hte, grau ni htep hkahkyin hkum din lu na matu, yaw shada let, masat tawn da ya ai, shani shagu na akyu hpyi ga ni hte, nawku daw jau ai lamang  ( Missa Hkungga ) ni hta e, tsun ai akyu hpyi ga ni a lachyum hpe, moi shawng de chye na ai rai tim, nchye na ai rai tim, anhte hpyi dat ai akyu hpyi ga ni hta, anhte a makam masham hpe shadan shaleng ai lam hte, nam nak lachyum sung ai ga si ni law law lawm ai rai nga ai.

Karai Kasang a chyeju shingnip lahpyeng hta, nga ai anhte ni, karai kasang hpe kam shamyet, machyu ai lam hta, rawt jat wa lu na matu, ndai zawn re ai akyu hpyi ga ni gaw, anhte hpe jahpring jasup ya nga ai. Bai nna, dai kyu hpyi ga ni hte rau, shani shagu na anhte a asak hkrung ai hkrun lam hta, Karai kasang hpe kam shamyet machyu yang gaw, anhte a prat, rawt jat wa lu na matu yaw shada let, galaw sa ai magam bungli ning pawt ning hpang shagu hta, lak lai ai akyu chyeju hkam la lu na rai nga ai. Dai hta nga, akyu hpyi ai gaw, karai kasang anhte hpe jaw ya ai, makam masham hpe, gaw gap ai hta, daw hpum daw nu kaja tai ya nhtawm, dai makam masham hpe, nmat mat na matu, shangang shaking ya ai kri amdung mung rai nga ai majaw, anhte prat hta, ra kadawn ai prat a daw sang langai rai nga ai.

Mungkan ntsa hta nga ai anhte shinggyim masha kadai mung, Prat Majan a matu, akyu hpyi ai hpe lak nak langai zawn, akyu ja shawn ra nga ai. Bai nna, anhte a prat hta, tatut hkrum sha ai jam jau jam hkau lam ni hte, anhte a myit kraw kata, kaja wa hkam sha ai lam ni hpe atsawm chye na hkawn hkrang hkra, myit maju jung let, karai kasang hpang de, kam hpa manoi manat sit shang akyu hpyi yang gaw, teng sha karai kasang a shaman chyeju hpe hkam la lu na rai nga ai. Ndai lam hte seng nna, yawhan a kabu gara shi ga 15 :7 hta, “ Nanhte ngai hta noi nga nna, nye ga mung nanhte hta noi nga ai rai yang gaw, nanhte hpa hpyi mayu yang hpyi mu, hpyi ai hte maren madat ya na ra ai ‘’’ nga nna, Madu Yesu Hkristu tsun da ai.

Dai re majaw anhte a asak aprat hta, akyu hpyi ai gaw, anhte hte rau galoi mung, nga ai karai kasang hte ni htep lu na matu, anhte a myit masin hpe sharawt dat ya nga ai. Shingrai anhte mung, Karai Kasang a makawp maga lam woi ya ai chyeju hpe hkam la lu na matu, karai kasang hpang de kam sham ai hte, akyu hpyi shakut shaja na gaw, ahkrak madung rai nga ai. Akyu hpyi shakut shaja ai Ramma langai gaw,  prat hta byim wa ai mabyim, (  Kaja ai raitim, nkaja ai raitim,) Karai kasang lajang ai lam re ai hpe atsawm sha, chye na hkap la lu ai hte, hpa mi byim wa tim, karai kasang a myit ra sharing ai hku, lam shagu hta, nden marai hte gwi gwi sak hkrung hkawm sa lu ai chyeju hpe lu la na rai nga ai`

Hpang jahtum hku nna, karai kasang jaw ya ai, akyu hpyi ai lam hpe, anhte a prat hta, manu shadan jai lang chye ra ai. Hpa majaw nga yang anhte ga, shinggyim masha rai nga ga ai majaw, jahkring hkring anhte a dinghkrai myit hte, madu machyu ai myit ni hpe chyu, madung tawn let, asak hkrung hkawm sa chye ga ai. Dai hta n-ga, kalang lang rai jang, karai kasang jaw ya ai, chyeju ninggun atsam hpe malap kau nhtawm, tinang galaw lu ai, magam bungli kaji kaba mahkra hpe, tinang a n-gun atsam hte chyu, galaw lu ai shadu nna, karai kasang hpe kam sham manoi mana tai lam hta, gawng kya mat chye ga ai. Shingrai, dai gang kya ai lam gaw, hpang de makam masham, lam yan hta, anhte hpe, ladat amyu myu hte, hkalem kau chye ga ai. Dai re ai majaw, ndai lam ni hpe, anhte a tatut asak hkrung hkawm sa ai prat hta, galoi mung myit dum myit hprang ra ai hpe, n-gun jaw mayu nngai. Anhte  a hkristan asak aprat hta, akyu hpyi ai gaw, karai kasang jaw ya ai chyeju kumhpa kaba nan rai nga ai. Dai chyeju gaw, anhte hpe karai kasang hte pawng hkawm nna, matut mahkai ai lam hta, nshut nshai re na matu ra kadawn ai myit marai atsam hpe jaw ya nga ai.

#youthprogram

#crdbumtautum

#rvakachinservice