Kaja Ai Kanu Kawa Ni Tai Ga

Kaja Ai Kanu Kawa Ni Tai Ga

              Hkristu tsawra hkungga ai kun dinghku kanu kawa ni e anhte mungkan ni rai nga ai Kashu kasha Ma ni hpe tsawra manu shadan rawt jat galu kaba kung kyang zet let ai Ma ni byin shangu mayu ai rai yang Ma ni a shawng hta madu jan madu wa shada ga li ga law hkat ai lam hpe koi gam ga ngu tsun mayu nngai. Tsawra ai Kun dinghku Kanu Kawa ni e anhte nga sa tsun shaga ai lam jaw tengma yang she Ma ni gaw kanu kawa ga madat na rai nga ai hpe anhte yawng chye da dum nga ra ga ai.Dai majaw Ma ni Kanu yan Kawa a ga hpe madat shangun mayu yang shanhte a shawng hta anhte sadi ra ai lam ni grai nga nga ai re.Dai hta Ma ni a shawng hta malut hkayawm hte tsa chyaru  nanghpam lu sha ai lai kyang ni gaw nkaja ai lai kyang nan rai nga ai. Ma ni a hkamja lam a matu mung nkaja ai zawn anhte Kanu kawa ni hpe mung hkungga manu shadan na nrai nga ai.Dai majaw Ma ni a hkam ja lam hpe tau ya ai hku nna shanhte a shawng hta nmai lu ai .Mai byin yang tsep kawp tawn da ai gaw grau kaja nga ai.Kanu yan Kawa ni nanghpam lu sha ai rai yang anhte a kashu kasha ni mung dai hku sha hkan galaw na rai nga ai.Dai majaw anhte kanu kawa ni hku nna Ma ni a prat nanghpam malu masha koi gam ai,Ma ni a kasi kaja Kanu kawa tai mayu ai,anhte tsun sharin ai hpe madat shangun mayu ai lam hte Ma ni tsawra hkungga ai kanu kawa tai mayu ai rai yang gaw ndai lam ni hpe anthe koi nan koi gam ra ai.Bai nna ya prat dep hpaji ni hpe lang shachyen ya mai ai.Raitim TV,internet,phone lang ai lam law jang gaw ma ni a matu hkamja lam hpe hkra chye ai majaw aten masat lang shangun ai gaw grau kaja ai ngu tsun mayu ai.

             Anhte kashu kasha Ma ni hpe pawt marawn tsun ai lam gaw tsang ra ai lam re.Ma ni hpe jaw kaja ai hku lam madun mayu ai rai yang pawt marawn ai lam hpe mung anhte koi gam ra ai.Bai langai gaw anthe a Kasha ni hpe kaga Ma ni hte shingdaw tsun ai lam gaw anhte kanu yan kawa hpe tsawra hkungga ai lam yawm wa shangun chye ai re.Bai nna anhte kanu kawa ni law malawng galaw chye gaw Ma ni hpe tinang a ga nmadat yang Kayet ai lam hpe mung mai byin yang koi gam ra ai.Ndai zawn galaw ai gaw shanhte a myit ningma lu wa shangun nna kanu yan kawa hpe nju ndawng wa chye ai re.Bai nna tsawra hkungga kun dinghku kanu kawa ni e anhte dum sa di ra ai lam langai gaw anhte kashu kasha ma ni a shawng hta kaga masha ni nkaja lam hpe shatan nhkan tsun ai lam ni koi gam ra ai.Ndai zawn tsun ai lam gaw Ma ni na ai lam law wa jang anhte kanu kawa ni hpe yu kaji wa shangun chye ai hpe anhte dum chye ra ai.Dai hta n ga amyu lam,makam masham lam hte seng nna garan ginhka tsun jahpoi ai lam lai kyang ni hpe anhte Kashu kasha Ma ni a shawng hta n galaw hkrup hkra sa di nga ga.Lahta de tang madun lai wa sai ni hpe hkan shatup ai rai yang anhte Kanu Kawa ni hte Ma ni a lapran kaja ai kanawn mazum lam lu nna Kaja ai Kanu Kawa tai wa na sha rai nga ai.

By : John Mung Hkrang