Nawku Hpung Shiga July 26

Laos mungdan, Hka madim kaba kapaw wa nna tsin yam hkrum nga ai masha ni the rau myit n pyaw yawn hkyen lawm nga ai lam wa sarabyin tsun shana dat ai shaiga

Hka n gun the myit hprat wan la na matu gaw gap nga ai Laos mungdan na hka madim kaba langai kapaw wa ai majaw asak si hkrum, hkala hkrum, dum nta shamat kau hkrum nga ai tsin yam hkrum masha ni the rau myit npyaw yawn hkyen lawm nga ai lam wa sarabyin tsun shana lam galaw dat nga ai.

Wa sarabyin a malai Vatican amu madu Cardinal Pietru Parolin ta masat htu nna lai wa sai bat lahkawng ya shani, Laos mungdan asuya hte Laos Saradaw ni hpang de shagun dat ai chye nan laika hta lahta na zawn, tsin yam hkrum nga ai masha ni the rau myit npyaw yawn hkyen laawm nga ai lam wa sarabyin Francis tsun dat ai rai nga ai.

Laos mungdan San Sai ngu ai ginwang hta myit hprat wan la na matu Korea mungdan company kaw nna gaw gap ding yang rai nga ai hka madim kaba lai wa sai bat lahkawng ya shani kapaw wa nna masha law law asak si hkrum, hkala hkrum lai wa ma ai the masha marai 6,000 jan daram mung, dum nta kata byin hkrum mat wa ma ai re, nga nna Laos shiga dap kaw nna tsun shana lam galaw da nga ma ai.

Wa sarabyin a laika hta, “tsin yam hkrum nga ai ni yawng the rau ja ja myit yawn lawm nga ai, grau nna asak si hkrum lai wa sai ni a matu akyu hpyi ya nga ai, dum nta masha ni si hkala hkrum mat ai majaw, shing nrai tam nmu byin nga ai majaw myit tsang yawn hkyen hkrum nga ai ni yawng hpe mung wa karai kasang shalan shabran lam jaw ya nga u ga,” nga nna wa sarabyin akyu dat ya nga ai.

Marang kaba htu ai the hka tung wa ai majaw ya na zawn madim kapaw ga mat ai re, nga nna madim gaw gap nga ai Korea Company kaw nna Reuters shiga dap de tsun dat nga ai ma ai.