Zet Let Hkam Kaja Ai Ma Ni Byin Tai Hkra Lanu Lahku Pawn Ba La Ga

Anhte a Ma ni hpe kaji ten hta ngwi pyaw hkamja hkra tawn da ai rai yang prat ram wa ai ten hta Awng dang ai prat hpe lu la na sha rai nga ai.Dai majaw ngwi pyaw zet let ai ma ni byin hkra gara hku galaw ra ai ngu lam hpe anhte kanu Kawa ni chye da ra nga  ga ai.

Dai Ma ni hpe jahkring jahkra ngwi pyaw shangun ai lam nre sha shanhte a myit masin myit masa lam ni hpe gau ngwi ngwi gaw gap gaw sharawt ya yang she prat hta galoi mung ngwi pyaw ai prat hpe lu la na rai nga ai.

Anhte a Ma ni hpe dum nta shinggan de ginsup ai lam hpe nmai sawn kaji ai.Hpa majaw nga yang tsing du pa ntsa kagat ginsup ai,gau wat jawn chyai ai,hpun lung ai,ga hte gasup chyai ai lam ni gaw ma ni a matu kaja ai.Ndai zawn hpun,tsing nam pan ni a sama hte matut mahkai nga ai gaw Ma ni a myit grau rawt jat wa shangun nga ai re.

Shinggan de ginsup lagat ai lam ni gaw myit tau chye ai myit jawm pawng mayu ai myit tinang hkum tinang sharai hting hkang lu ai lam ni hpe jat wa shangun nna Ma ni a kanawn mazum lam hta grau nna kaja wa shangun nga ai.

Ndai zawn shinggyim kanawn mazum lam hta kaja ai Ma ni gaw Dat kasu jawng de grau du lu nna Nanghpam malu masha lu sha ai lam, daw sa dingsa mayu ai lam ni yawm koi gam lu ai hpe mu lu nga ga ai re. Dai majaw Ma ni hpe shinggan de kagat ginsup ai,lagaw leng jawn ai htingbu Ma ni hte ginsup ai lakyang ni gaw nga yang kaja ai re.

Sumla hkrung Game grai na hkra ginsup ai gaw Ma ni hpe pyaw shangun nga ai.Raitim Phone,TV,Computer Sacreen ni hte grai na hkra aten shama ai ni gaw myit ana a matu nkaja nga ai.Yu maram sawk sagawn ai hta ndai zawn Phone TV Computer ni hta nga yang Ginsup hpan ginsup ai,manawn manang,laika hti ai lam,hpung lam ni hta grau shamu shamawt ai gaw Ma ni hpe grau nna pyaw shangun ai hpe mu lu ga ai re.

Dai ni na prat hta nga yang grau nna sa di ra nga ai.Grau nna gaw dum nta masha ni hte shinggan de pru hkawm ai shaloi, malu masha shat rau jawm sha ai shaloi Phone lang ai hpe pat hkum ra ng ai.Lani mi hta Phone computer aten kade daram sha mai lang ai ngu ai hpe masat da ya yang grau kaja nga ai.

Shani shagu na prat hta chyeju tara hpe chye na nna sak hkrung nga ai Ma ni gaw grau ngwi pyaw hkam kaja nna kanawn mazum lam hta grau kaja ai hpe mu lu nga ai.Dai majaw kaja dik gaw tinang hkum nan mung langai ngai hpe chyeju dum dan ai lam,chyeju dum ga hpe myit lawm hkum lawm hte tsun shaga ai lam,Ma ni kaw nna langai ngai hpe galaw ya ai shaloi chyeju dum ai lam tsun galaw dan ai rai yang dai lam ni hpe ma ni len la galaw chye wa na rai nga ai.

Shana shat sha aten hta rai rai shana yup ra shang ten hta rai rai chyeju dum ai lam ni hpe tsun dan ai lailen ni galaw ya ra ai.  Bai langai gaw tinang hta nga ai madu lu ai lam ni a majaw myit pyaw myit dik ai chyeju dum chye ai myit ni nga wa hkra galaw shaman ya ra ai.Bai nta bungli ni galaw shangun ra ai.Ma ni gaw nta bungli galaw shangun ai hpe ra na gaw nre. Raitim nta bungli kaji kajaw hta rau jawm galaw ai rai yang dum nta masha ni hte maren re ai ngu myit hpe hkam sha lu shangun nga ai re.

Dai majaw ndai zawn nta bungli ni hta rau jawm galaw garum chye ai Ma ni gaw mayak manghkang lam ni hte hkrum kadup wa ai ten myit lam hta grau ngang kang nden ja ai hpe mu lu nga ga ai re.Galaw lagawn jin ai bungli ni hpe galaw ra wa ai ten tinang a myit hpe grau nna htinghkang lu ai atsam ni jat wa lu nga ai re.

 Ma ni a atsam marai ningja ni grau rawt jat wa lu na matu,tinang hkum tinang kam hpa lu wa na matu nta bungli ni hpe atsawm galaw shangun chye ra ai.Bai nna dum nta masha ni yawng hte Bat mi hta yawm dik lahkawng lang daram sha gaw shat rau jawm sha woi ra ai.Ndai zawn jawm sha ai lam gaw Ma ni hpe kaja ai ningmu nga wa nna Nanghpam jai lang ai lam nbyin shangun ai sha dum nta masha ni shada da grau nna shim lum simsa lam hpe lu la na rai nga ai.

Bai nna garum shingtau chye ai lailen hpe sharin ya ga.Kaga masha ni hpe garum chye ai ni gaw grau nna myit pyaw lam lu nna matsan  dum garum shingtau chye ai myit ni grau rawng wa nga ai.Dai majaw Ma ni a myit hta kaga masha ni hpe matsan dum tsawra garum shingtau chye ai myit ni rawng wa hkra galaw ya ra ai.

Anhte a Ma ni gaw galoi mung  pyaw nga na gaw nre yawn ai,ra ai hpe nlu ai ten myit kadun ai ni mung nga na re dai ni hpe atsawm sha htinghkang lu na matu anhte kanu kawa ni n gun jaw lam madun woi awn la ra ai.Ahkyak ai gaw Ma ni hpe tsawra shawang myit hte ka up da ai shawang hta nga kaba wa lu na matu grai ahkyak nga ai re.

Bai nna myit ngwi myit pyaw ai Ma ni byin tai na matu gaw kanu kawa ni hkum nan mung myit ngwi myit pyaw hte nga na mung ra nga ai.Ma ni masha kaba ni galaw ai lam ni hpe yu la len la chye ma ai.Dai majaw Ma ni hte ga shaga mani sumsai pyaw ai nsam hte tsun shaga na grai ahkyak nga ai.

Bai nna Ma ni tsun ai hpe mung myit galu hte madat ya nna shanhte tsun ai ahkyak la ya shanhte nga ai majaw myit pyaw ai ngu ai lam ni hpe tsun dan ra ai.Anhte Kanu kawa ni Ma ni shut ai galaw hkrum yang pawt chye ma ai raitim Ma ni kaja ai hpe galaw ai,langai ngai hpe awng dang ai sai nga yang shakawn shagrau masat ya na malap nga chye ga ai re.

Dai majaw Ma ni hpe sung sung li li shagrau ai n gun jaw ai kumhpa jaw ai lam ni galaw ya yang grai kaja nga ai.Ndai lam ni gaw Ma ni a matu kaja ai majaw hpang de bai galaw na matu shanhte hta n gun lu wa na sha rai nga ai. Bai nna Ma ni hpe shakawn shagrau na ahkyak ai zawn shanhte  shut wa ai shaloi  dinglun  ai lam hpe mung hkap la chye hkra sharin ya na grai ahkyak nga ai.

Ndai shut ai lam hpe yu sharin sharai la chye nna hpang kalang grau kaja ai hku nshut hkra galaw na ngu ai myit masa hpe sharin bang ya ra ai.Dai zawn tsun ai ten mai byin yang matsan dum ai nsen hte tsun yang grau kaja ai.Hpang kalang ndai zawn nshut yang gaw masat shagrau ya na mung nmai malap ai.

Ma hta lama ma manghkang nga wa yang tinang hkum tinang hkam hpa manoi ai atsam galaw lai di lu ai atsam rawng ai ngu ai lam hpe tsun n gun jaw sharin ya ra ai.Dai rai yang she Ma ni mung mahkrup madup nga wa nna mayak manghkang lam ni hpe hparan lu ai tsam ni lu wa na rai nna loi loi hte myit daw ai lam ni nnga wa na sha rai nga ai.

Kaja nga yang Ma ngu ai ni gaw shinggyin ga zawn rai nga aten naw re majaw anhte kanu kawa ni Ma ni hpe gara hku byin mayu ai ngu ai lam hpe ladat jaw ai hte galaw sharin la mai nga ai re. Anhte Kanu Kawa ni  sharin shaga up hkang ai lam shut ai taw ai majaw Ma ni a myit hta ningma kap wa ai hkap la ai lam ni njaw wa ai rai nga ai.

Dai majaw anhte a Ma ni hpe myit ngwi myit pyaw ai zet let ningtawn ai Ma ni byin tai hkra gaw lahta de tang madun lai wa sai lam ni hpe hkan sa shakut sa wa nga ga law.

By:Mung Hkrang