Tsawra Chye Hkra Sharin Ra Ai

Tsawra Chye Hkra Sharin Ra Ai

Awng dang rawt jat galu kaba mayu ai a matu gaw, tinang a makau grupyin hta nga ai, tinang hte ni htep mu mada kanawn nga ai ni a ntsa e, hkungga tsawra lu na matu ra kadawn nga ga ai re, kaja wa sha hku hkau tsawra nga sai lam gaw, lam yan nrai nga timung, shi mung shi lam hte shi, tinang mung tinang a lam hte tinang  ngu nchye dat, nchye masu hkawm sa nga taw yang, tinang hte seng ai makau grupyin hta nga ai ni hte mung, tinang a magam bungli dap ni hta mung, matut manoi taw ai ni hte mung, hkungga tsawra lam nga lu na matu, sharin hkamla na ra nga ai ngu shawng nnan e tsun mayu nngai law

 

Shinggyim makau grupyin hta, sak hkrung nga sa ra ai anhte shyinggyim byin tai sai hte rau langai hkrai san rai nga nmai nga ga ai, shani shanang ni hta lu sha lu na matu, gat dut sha ai nga yang, tinang dut shabra na gun rai ni a matu, laga jasam ni hte ganawn mazum ra nga ga ai re, tinang a matu, ra kadawn ai shang gumhpraw ni lu na matu, jinghku nre ai jasam ni hte, tsun shaga kanawn mazum ra nga ga ai.

 

Tinang a shat tinang tam sha she re wa kadai hpe yu na nga ra na ngu zawn re ga ni law law na ga na sha rai nga ai, dai ga gaw rai taw zawn gaw nga taw tim, dai zawn tam sha lu na matu, shinggyim masha shada da n ganawn mazum ai sha nmai nga ai langai sha n ga, kanawn mazum ra nga ga ai, ndai hta myit sawn sumru yu dat yang, tsawra na hta,loi ai lam gaw, nju ai lam rai nga ai, npawt madung shaingra masa hku na mung tinang a myit hte, nhkrum shagu, ra kadawn lam ni byin wa shagu, nju ndawng ai myit gaw, shi chyu shi shang wa chye nga ga ai

 

Shi myiman hpe yu yu, Mungkan ting shi galaw shat sha taw zawn, nsam ja ja ai wa, grai yu nlu na zawn re nga ga ni tsun chye na re, shi chyu shi byin pru nga ai dai myiman nsam hpe, madu a myit hte shabung dat yang, nra kadawn ai nju ndawng myit ni shang wa chye nga ga ai, kaja wa sha, laga wa a ntsa, nra sharawng nju ndawng ai lam ni, pawt sindawng ai lam ni shang wa ai lam gaw, mai kaja ai magam nrai nga ai, dai myit jasat ni gaw, ngang wa yang madu a ntsa jam jau jaw lu nga ai hpe dum ga ngu shadum n gun jaw mayu ai

 

Anhte shani shagu yu nga ai jamna hpe yu yu ga, mani nna yu yang jamna hta mani dan nga ai, pawt pawt re yu yang jamna kaw mung pawt pawt re sha mu lu na re, dai zawn sha, nju ai tsampu tsampa myit ni law wa ai shaloi, manu dan ai ngyan marai ni, ma-a tai mat chye ai hpe mung shadum n gun jaw mayu ai law. Tinang a myit kraw kata na byinpru wa ai nju, nra sharawng ai lam ni a majaw sha, tinang a hkrang nsam hta, htoi tsawm ai nsam ni nnga ai mabyin hpe, makau grupyin ni mung let let e, maram hkrup wa ai hte rau, jawm pawng ai lam ni  hten za mat wa nna, shinggyim ganawn mazum lam ni mung mahkri shawn lam ni yawm wa na rai nga ai dai re majaw tinang a makau grupyin hta nga ai manaw manang jinghku ni hpe nra sharawng ai myit masa lam ni shang wa shagu ndai lam ni hpe sadi tawn let, koi yen kabai kau lu hkra shakut sa wa ga ngu nna mung ga saw dat mayu nngai

 

Dai majaw tsawra hkungga manu shadan ai myit masa hpe galai bang shangai la ra nga ai. Nju ndawng ai myit gaw, ra kadawn lam ni law law hpe npawt da let, sak hkrung ai re majaw, nga npyaw shangun ai sak prat hpe sha jaw lu nga ai,  Tsawra lu ai myit masa gaw, ra kadawn lam ma hkra hpe npawt da nga ai majaw, myit maju jung lam hpe simsa lam jaw ya lu nga ai, kraw salum kata kaw nan sim sa lam hpe jaw ya lu nga ai, Mungkan hta nju ndawng ai myit ni hkoi seng wa sai nga yang, sim sa tsawmhtap lam gaw pu tsawm wa na rai nga ai, dai re majaw, tsawra ai ramma ni a sak prat sak hkrung lam shagu, hkying ten shagu hta, ntsawra chye shi ai nga yang, tsaw ra chye hkra shakut hkawm sa wa saga ngu ga saw dat let,  

 

#youth

#rvakachinservice

 

 

Add new comment

3 + 3 =