Tinang Tsawra manu shadan ai ni hpe Kaja dik ai hpe sha jaw lu hkra shakut ga

Tsawra hkungga ai Nu Wa ni anhte manu shadan tawn da ra ai ni hta  Kanu Kawa ngu ai gaw tsaw dik kaw nga ai re.Kanu Kawa,Kani Katsa,Kagu Kamoi,Kashu kasha,kahpu kanau ningrum ningtau jinghku jingyu ndai yawng gaw anhte yawng a matu manu shadan ra ai ni hkrai rai nga ai.Tinang manu shadan tawn da ai ni hpe kaja dik hpe sha jaw ga.Kaja dik ngu ai hta Ja Gunhpraw manu laja dik arung arai hpe tsun mayu ai gaw nrai nga ai.Kalang marang anhte hta bungli grai law grai kyin nrau ai aten ni nga na ga ai.Ndai zawn ten ni hta anhte law malawng gaw Kun Dinghku hta bungli shing nrai ja gumhpraw shang na lam ni hpe grau madung da ning shawng galaw ai lam hpe anhte galaw chye ga ai.Tsawra ai nu wa ni e kaja nga yang bungli gaw galaw galaw rai nna law wa ai lam rai nga ai.shi hpe n jahkring dingsa bungli gaw anhte hpe sha wa shangun chye nga ai.

Dai zawn sha gumhpraw ngu ai mung dai zawn sha rai nga ai ja gumhpraw grau shang magang grau jai lang magang grau jai lang wa jang gaw grau lu mayu wa nna ja gumhpraw a hpang hkan shachyut nang mat ai majaw kun dinghku dum nta masha jinghku jingyu ni hte galai kau ra ai ni mung anhte mu yu na ga ai. Nkau ni tsun chye ma ai Kanu kawa ni a nta sa na nga jang gumhpraw mung lawm madi shadaw lu yang she nga sawn la chye ai ni mung lawm nga ga ai re.Raitim Kanu Kawa ni a ra ai lam hpe jahpring jazup ya ai shaloi ja gumhpraw hte galaw ya lu ai lam nga ai zawn ja gumhpraw nlu tim tsawra shawang myit ni hte jahpring ya lu ai lam ni law law nga ai re.Ja Gumhpraw jaw jang she kaja dik ai hpe jaw ya lu lam nrai nga ai zawn manu dan dik ni hpe mari ya yang she kanu kawa hpe kaja dik ai hpe jaw ya ai lam mung nrai nga ai re.

Anhte kaw nna kanu kawa ni a matu galaw ya ai lam ni yawng hta kaja dik byin tai hkra galaw ya mai nga ga ai re.Ga shadawn kanu kwa ni asak kaba u gut gu wa ai ten ga shaga mayu yang tinang gaw n gun jaw lu ai raitim bungli ni hpe tawn da nna myit lawm hkum lawm hte madat ya ai,kanu kawa ni kawa kaw nna nhkrum ai na sai jinghku jingyu ni hte hkrum mayu yang kanu kawa myit pyaw hkra rau jawm jahkrum hkawm ai lam ni galaw ya mai nga ai re.Anhte a kanu kwa ni hpe kaja dik shanhte hte htap htuk dik,shanhte sha mayu ai lam ni hpe galaw jaw ai lam ni mung galaw ya mai nga ai.Hpa mi rai rai kanu kawa kashu kasha ni hpe masha shagu gaw tinang byin mai made kaja dik ni hpe sha jaw mayu ai hkrai rai nga ai.Dai kaja dik a matu jaw dat ai ja gumhpraw tsawra shawang myit ni gaw manu dan ai hkrai rai nga ai.Dai zawn sha shanhte hpe jaw dat ai ahkying aten kalang marang myit ra hkan ya ai nchye na ya ai ten shagrit ya ai,myit ra nrai tim kam sharang ya  ai ndai lam ni mung tinang manu shadan ai ni hpe kaja dik ai lam hpe jaw ya ai lam ni rai nga ai.

By : John Mung Hkrang