Tinang a ningrum a gawng kya ai lam,sari sadang arawng sadang hpe tsun jahpoi ai lam ni hpe anhte koi gam ga!

Tsawra hkungga ai kun dinghku kanu kawa ni e anhte a kun dinghku hta madu jan madu wa langai hte langai galoi mung agrin ginrun nga lu na matu gaw langai hte langai mara raw dat ya hkat ai lam rai nga ai.Dai majaw lahkawng myit rum hkum rum rai gaw de da ai anhte a dinghku hpe galoi mung shim lum simsa nga pyaw hkra gaw gap la matu gaw Madu jan madu wa lahkawng yan a ahkyak kaba lit nan rai nga ai.Kun Dinghku de ai na wa magang tsawra myit ni katsi wa nna jasam zawn rai wa ai dinghku ni hpe mung anhte mu lu nga ai.Sumtsaw sumra nnan byin ai ten kaw nna zawn salum gumhtawn ai lam ni nnga mat wa ai lam ni byin wa yang shawng de na zawn pyaw hpa hte hpring ai tsawra myit ni bai lu na matu anhte a dingku hta shakut la nga ga.Anhte a masin pawt singdawng ai lam ni gaw langai hte langai a masin salum ni hpe tsan gang wa shangun chye nga ai dai majaw marai langai masin pawt taw nga ai ten langai wa gaw ga n shaga ai lam,bai htang pawt marawn ai lam ni n galaw yang grau kaja nga ai.Tinang gaw jaw ai hpe kade mi chye da tim maga mi kaw masin pawt taw nga yang gaw hpa n shaga ai sha zim rai nga ai lam gaw lahkawng yan a matu grau kaja ai masa lam rai nga ai.Bai nna tinang a ningrum a gawng kya ai lam,arawng sadang hpe tsun jahpoi ai lam ni hpe anhte koi gam  na mung ahkyak nga mali ai re.Anhte shinggyim masha shagu gaw gawng kya ai lam nga ai re majaw dai hpe ndinglun njahpoi na matu ahkyak ai.

Kalang marang tsun ai gaw hpa manghkang nnga ai raitim ja hkring hkring jahpoi ai lam gaw maga wa ai matu hkra machyi ai lam ni nga wa chye ai re.Bai nna tsawra hkungga ai nu wa ni e kun dinghku hta Madu jan madu wa shada da ningshawng jaw hkungga manu shadan ai lam hpe galaw na matu mung nmai malap ai.Tinang grau ai ngu nammak law hpa myit hte hpring ai kun dinghku gaw ngang gring na matu nloi la nga ai.Dai majaw madu jan madu shada da ningshawng jaw ya ai lam gaw makam myit hpe grau rawng jat wa shangun nna tsawra shawang myit ni grau law htam wa shangun nga ai re.Bai nna tsawra ai kun dinghku kanu kawa ni e anhte a dinghku hta magam bungli a majaw madu jan madu wa shada shani ting ting nmu hkat ai lam ni na wa jang lapran sumprat ni nga wa chye ai dai majaw jahpawt shat,shana shat sha ai ten ni hta madu jan madu wa rau dum nta masha ni hte shat jawm sha ai lam ni mung galaw ra ai.Ndai zawn galaw ai a marang e madu jan madu wa shada da mung dum nta masha ni yawng hte mung grau nna shim lum ganawn mazum lam hpe lu nna dinghku mung grau alum ala simsa na sha rai nga ai.Bai nna dinghku hta madu jan madu wa lapran asan brang lang tsun shaga ai lam nga ai mung tsawra myit hpe ngang grin shangun nga ai.

Dai majaw manghkang lam ni madu jan madu kanawn mazum lam,lahkawng maga na jinghku jingyu ni a lam,bungli lam hte ja gumhpraw lam ni hta asan brang lang tsun bawngban hkat ai lam gaw anhte dinghku hpe grau nna ngwi pyaw lam hpe jaw ya lu nga ai re.Dum nta langai kun dinghku langai hpe rau sha jawm gaw gap let myit masin tsan gang ai lam nnga ai sha shimlum nga pyaw hkra anhte dinghku hpe gaw de ga.Kun Dinghku ngu ai gaw nmu lu ai sindun sumri tsawra shawang myit hkum sumhpa hte gawda ai re majaw ndai tsawra myit sindun sumri tsawra shawang myit ni hte ngang gring hkra shakut nga ga law.

By; John Mung Hkrang