Sum Ai Tara A Manu Ni

Sum Ai Tara A Manu Ni

Hkrat Sum Ai Lam hpe nang hkrum sha yu nni ngu san yang, baw gum mahtai jaw na gaw teng sha rai nga ga ai, mabyim lam gaw, sak prat hta, shara ra mi kaw gaw, dai hkrat sum lam ngu hpe masha shagu hkrum sha ga ma ai majaw rai nga ai. Dai hta tsawra ai ramma ni, awng dang taw nga ai ni ngu mada yu ra ai masha ni a sak prat hta mung, shan hte ni Sum ai tara lam hpe hkrum katut wa ai ni hkra rai nga ai

Kadai mung, “ Sum Ai Pra ” hpe pyaw len myit shingran da mayu ai ni gaw nnga ai, anhte nang ngai yawng gaw, “ Awng Dang Ai Sak Prat ” hpe myit mada nga let shakut nga ga ai ni hkrai rai nga ai, Hkrat sum lam mabyim hpe hkrit let awng dang lam nnan hpe ra sharang nga ga ai, teng teng nga yang, sum ai tara ngu gaw, anhte ni hpe, tsaw wa na sak prat de, ganawng ya lu ai lam yan langai mung rai nga ai, sum ai ni hpe awng dang ai lam yan ntsa de, bai shading ya lu ai, nam nak rawng ai manu langai rai nga ai ngu shadum n gun jaw dat mayu ai.

1.Hkrat sum lam gaw, sak prat manghkang nrai....hkrat sum lam mabyim gaw, koi yen nmai ai sak prat a mahkrum madup langai re, Asum hte hkrum katut ai ni yawng madu hkum madu, manu nnga ai wa ngu ntsen ai myit sawn lam ni shang wa chye ga ai raitim, hkrat sum ai ni shagu, manu nnga ai wa, nshakut ai wa ngu nmai tsun nga ai dai asum tara gaw, sak hkrung lam a daw chyen langai rai nna, hkrat sum lam hte,hkrum katut wa ai lam gaw, mang hkang nrai nga ai, mang hkang kaw na hkrat sum ai anhte ni gaw, awng dang lam a matu, lam yan nnan langai kahtap ntam mat ai sha, loi loi hte asum jaw kau ai myit a majaw mung rai nga ga ai hpe dum sa wa ga , bai awng dang mying gumhkawng ai ni hta, bung pre ai kumla masa langai nga nga ma ai, dai kumla gaw shanhte ni gaw, asum law law hpe hkrum kadup wa ai raitim, myit ndaw nhten ai sha, asum njaw kau ai lam rai nga ai Hkrat sum lam mabyim a hpang hta, lam yan nnan langai ngai hpe kahtap tam sa let, shakut shaja sa wa ra nga ga ai, dai rai yang jahtum hta, mau hpa awng dang lam ni lu na rai nga ai

2.Hkrat sum lam gaw, atsam nnan marai hpe jaw ai... Hkrat sum lam gaw, myit kya ai ni hpe, kalang ta dang nna, galau lu nga ai, dai hta myit marai ngang kang ai ni a matu, lang law law hkrat sum ai lam hta, atsam nnan marai ni rawt jat wa nga ai

3.Hkrat sum lam gaw, lam yan nnan lata na madi madun nga ai...myit sawn lam langai hpe hkrang shapraw lu na matu anhte ni daw dan lam jahkrat ra nga ai, masha law malawng gaw, tinang a daw dan lam ni hpe bai, ntsen chye nga ga ai, jashut galaw hkrup na matu, myit tsang chye ai shyinggyim myit ni rai nna, daw dan lam ni hta, ntsen ai lam byim ai lam gaw, shut ai ngu nmai tsun nga ai, daw dan ai ten ni hta, awng dang lam de tau yu ai lam hku lata nga tim, dai lam yan gaw, jaw ai, shut ai ngu nna kadai mung tau nchye nga ga ai. lamana tinang lata dat ai lam yan gaw shut sai ai rai yang, hkrat sum lam hte nshut nshai hkrum ra na rai nga ai, awng dang mu mada ai ni hta mung, shut ai lam de hkawm sa let, hkrat sum lam hpe lang law law hkrum sha nga ga ai, dai hta e hkrat sum lam gaw lam yan nnan kaja langai hpe kahtap lata galaw sa na matu, madun ya nga ai kum la rai nga ai , hkrat sum lam gaw awng dang lam de du shangun ai laga lam yan nnan langai de madung lu nga ai sum ai tara nnga na nmyit mada awng dang ai ngu gaw nnga nga ai re

4 Hkrat sum lam gaw hkrit ai myit hpe koi yen  nga ai...anhte a sak prat hta hkrit tsang ai lam ni gaw, hkrat sum lam hte matut manoi chye nga ga ai, sum ai lam hpe hkrit ai majaw masha law law wa shanhte a myit sawn yup mang ni hpe hkrang shapraw ai lam hta ngwi nga ma ai Sum ai myit gaw pat gang da nna, anhte ni gaw tinang a prinem taw nga ai kata kaw na le na hkrit nga ga ai dai shingwang kata na nle pru wa yang hkrit hkang tsawm htap ai awng dang lam ni hte naw tsan na sha rai nga ai Hkrat sum lam mahkrum madup hta, shaman da nga ai ni hta, gwi gwi galaw na matu, nhkrit nga ma ai,

5. Hkrat sum lam ngu gaw ahkaw ahkang langai rai nga ai. hkrat sum lam hte jahten  ningmu myit masa lam ni gaw gin run chye nga ai “ jahten myit masa “ ni hpe koi yen kau nna, kaja ai ningmu myit masa ni rawt jat wa lu na matu, myit maju jung shaman ra nga ai mai kaja aimaga de yu chye ai lam gaw, hkrat sum lam lam yen hpe ngang kan ai hte bai nhtang sawn yu let, hkrum katut wa ai mayak lam ni hpe tawt lai lu ai lam rai nga ai

Asum ni hpe man up hkrum katut nna, lu la wa ai awng dang lam gaw, nang hpe grau kung kyang wa shangun ai atsam ni nga ai, hkrat sum lam gaw anhte ni gara shara kaw shut nga ai hpe madi madun nga ai, dai majaw awng dang ningtawn ai ni gaw, hkrat sum lam ni gaw, awng dang lam a matu, ra kadawn ai shinggang da lam ni rai nga ai

6. Asum kaw na awng dang ai lam de.. hkrat sum lam ni hpe sak prat a adaw achyen langai hku hkap la da chye ra ai, sum ai tara lam gaw, nang hpe atsam ningja marai nga ai wa hku sharin ya na ra ai, awng dang lam de sa na hkrun lam gaw, galoi mung yak hkak jam jau nga ai hkrum lam hta galau chye ai mayak ni gang dang ai lam ni mung hkrum na sha rai nga ai, galau wa ai ten hta, bai rawt sa na lit gaw nang ngai ramma ni a lit nan rai nga ai

Hkrat sum lam ni ngu gaw, chyang mang ai summwi ni zawn sha rai nga ai dai chyang mang ai summwi ni a hpang hta Awng Dang Lam ngu ai jan shingkang nga nga ai nre i ngu gam garan dat let.

Youth

Nnye Seng Tu