Si mani Myitsu Ma ni byin tai wa lu na matu galaw mat ai ladat ni

   Anhte Kanu Kawa nkau ni gaw kashu kasha ni hpe tinang a hting hkrawng sut gan arawng sa dang ni hpe jaw na malai shanhte prat ting akyu jashawn jai lang ra ai machye machyang ni,myit su myit kawp simani ai lai kyang ni hpe jaw mayu ma ai re.

   Kashu kasha ni ra sharawng ai lam hpe aput hpyi shagu loi loi hte nmai jaw ai.Anhte Kanu Kawa ni a matu grai wa nyak ai galoi ya na loi nga nna Ma ni aput hpyi shagu jaw galaw ya taw nga ai rai yang shanhte kaba wa prat ram wa ai aten hta hpa hpe mung ahkyak nda,manu shadan nchye wa na re.

   Nga manga yawng hpe majoi mai lu ai nga shadu wa nna prat hpe ahpa atang sha nga chye wa na rai nga ai.Gara Kanu Kawa mung Ma ni a myi man nsam ntsawm ai hpe tsang ma hkrai rai na re.Raitim shanhte masum lang hpyi aput yang kalang daram gaw galaw ya mai ngu tsun mayu nngai.

   Bai nna tinang a ntsa chyeju galaw ga ya sai ni hpe shanhte a chyeju galoi mung dum nga na hku sharin ya ra ai.Tinang a ntsa chyeju galaw ya lai wa sai wa a chyeju hpe  chye na hkra galaw nna tinang hkum nan mung chyeju madu hpe hkungga ai hte kanawn mazum chye ra ai.

   Dai hta nnga si mani ai lai kyang hte lata shakram ai,langai hte langai myi tum myi man nsam ni hte masat kum la ni hpe galaw chye hkra anhte a kashu kasha ni hpe sharin shaman ya ra ai.Shahte kasi la mai hkra anhte Kanu Kawa ni hkum nan mung masha shagu hpe atsawm alum ala rai shaga kanawn mazum nga ga.

   Chyeju tara ni a manu hpe galoi mung dum hkra galaw shaman ya ga.Bai Kaga masha ni hpe garan jaw garum chye  ai lai kyang ni nga wa hkra shaman sharin ya ga.Tinang hta nga ai hpe garan jaw alu jaw ai lam hta Ma ni hpe mung shanglawm garum alu jaw ai hku nna shanhte hpe mung garum garan jaw alu jaw ai lam hta pyaw chye hkra shaman sharin ya ga.

   Ndai zawn jahkring jahkring alu jaw garum ai lam gaw tinang a prat hpe grau nna myit dik shangun lu ai zawn kaga nhpring zup ai ni a matu myit tau ya chye ai myit ni rawng wa hkra sharin ya ra ai.Bai anhte a makau grup yin manaw manang ni hta mung tinang a Kasha ni hpe atsawm sha tsun sharin shaga chye ai ni rai yang grau kaja ai hpa majaw nga yang Ma ngu ai ni gaw  len la chye ma ai re.

   Rawt jat galu kaba wa ai prat hta ya prat na ma ni gaw myit ai lam mu ai lam ni law wa chye ai majaw langai ngai hpe chyeju dum ai shaloi laika pa hta ka masing nna masat chye ai lai kyang hpe mung sharin shaman ya ga.

   Bai nna Shanhte hte seng ai mahkra hpe tinang hkum nan galoi mung galaw ya ai lam hpe nmai galaw ai.Tinang kaji ai ten hkrum lai wa sai mahkrum madup hte prat hpe chye na wa hkra sharin ya ra ai.Lama ma nga wa yang shanhte hkum nan hparan chye hkra galaw shangun ra ai.Tinang kaw nna hkrai galaw ya ai rai yang shanhte a shawng lam prat hpe gara hku woi awn sa lu na nrai nga ai.

   Hkrat sum lam ngu ai gaw Awng dang lam a n gun re ngu ai hpe chye na hkra sharin ya na matu mung ahkyak nga ai re. Bai nra ai shajan lam ni hpe nmai hkan ya ai.Ma ngu ai ni gaw hpyi aput shaloi lu ai rai yang galoi mung hpyi aput na sha rai nga ai.Dai re majaw anhte kaba sai myit sawn chye sai ni chye ra ai kaja wa ra yang gaw galaw ya ga.

   Dai nrai yang gaw nra n ahkyak ai lam ni hta majoi jai lang jahtum wa na re.Kaji kajum Kadwi ni hpe hkungga manu shadan tsawra chye na matu lam madun woi awn sharin ra ai.Ndai hta anhte Kanu yan Kawa hkum nan mung tinang a Kanu yan Kawa hpe manu shadan hkungga yang she anhte a kashu kasha ni mung tinang hpe hkungga manu shadan chye wa na sha rai nga ai.

   Ma ni a kajum Kadwi ni hte tsan ai shing nrai kaga ga nga ai rai yang rau ai ten ni hta Kajum Kadwi ni kaw sa chyai woi let kajum kadwi ni hpe lagaw lata manat ya ai,gawn lajang ai zawn re ai lam ni hpe galaw shangun ra ai.Sumla ni hte gasup taw nga na malai tsawra myit hpang gara garen nga ai Kajum Kadwi ni hte alum ala rai nga na matu aten jaw ra ai.

   Dai majaw anhte Kanu Kawa ni hkum nan tinang Kanu Kawa ni hpe hkungga manu shadan tsawra dan yang she tinang a kashu kasha ni mung dai zawn hkam sha galaw wa na sha rai nga ai.

   Bai langai gaw Ja Gumhpraw hpe manu shadan chye hkra sharin ya ra ai.Ndai hta e Ja Gumhpraw hte seng nna Gumhpraw hpe gara hku masing jahkrat jai lang na,jan ai gumhpraw hpe gara hku mahkawng ra ai,kaga ngam ai Ka ang hkup hpe matsan mayan jam jau hkrum ai ra kadawn nga ai ni hpe jaw garum ai ngu ai lam ni hpe asak kaba wa ai ten du hkra galaw mawn wa na matu sharin shaman ya ra ai.

   Bai nna anhte a Ma ni hpe tinang a prat gara hku nna lai sa wa ai ngu ai mahkrum madup ni hte machye machyang ni hpe gara jaw ga.Tinang gaw sutsu ai Kanu Kawa kaw nna shangai shaprat sa wa ai rai yang mung tinang a kanu kawa ni sut masa lam hpe gara hku galaw ai, Ja Gumhpraw tam shakut sa wa ai lam,lama wa matsan ai prat kaw nna sa wa ai rai yang mung Prat a ruk yak jam jau lam ni hpe gara hku nna tawt lai sa wa ai,shakut shaja sa wa ai ngu ai lam ni hpe garan tsun dan ra ai.

   Dai rai yang she shanhte gaw prat a ntsa hkam la ai lam ni gau ngwi ngwi chye na kung hpan wa na sha rai nga ai.Bai nna tinang a prat mahkrum madup hte shingdaw nna Prat a lam hpe atsawm chye na hkra sharin ya ga.

   Lama na ra ai rai hpe nlu shagu shalu shakan ai Ma langai nga ai nga yang numbat langai mara shagun na gaw anhte Kanu Kawa ni hkum nna rai nga ai.Raitim myit gaw nmai daw ai,lama na grai na sawng ai nrai yang gaw lahta de tsun lai wa sai lam ni hte tsun sharin mai ai.

   Dai re majaw anhte kasha ni gaw manu dan simani zet let ai Kashu kasha ni byin tai wa lu hkra shakut sa wa ga law.

By; Munghkrang