Shingyim Wuhpung Kata Na Ramma !

Shingyim Wuhpung Kata Na Ramma

Masha langai a sak hkrung bawng ring lam, masha langai a hten za hkrat sum lam ni yang, masha langai a ngalu kaba wa ai lam ni,masha langai a hkam jan lu ai atsam hte, sak hkrung lu ai ningja lam ni yawng gaw, shi a, kanawn mazum ai shingwang kata a ntsa, madung nga ai lam langai mung rai nga ai.

Ramma shagu nye mang hkang ngai lu hparan ai, madu hkum madu lit la lu ai, ngai sha, nye prat a hkaw hkam nga nna, da ting sak hkrung chye nga ga ai, kaja wa nga yang, tinang hkrai myi di chyip hparan lu na matu, shakut nga let, lam dam nga ai  ramma ni, manghkang ni a npu, lip hkrum nga ai ramma ni law law rai nga ai.Shinggyim  wuhpung wuhpawng ngu ai hpe hkrit na nga nra ai zawn, kabai da mung nmai nga ai, makau grupyin hta tinang a lam kaja tsun ai ni nga ai zawn, nkaja tsun ai ni mung law law rai nga ai, dai hta madu myit n gun atsam marai n ngang kang taw yang, dai tsun jahpai ai lapran kaw byawng lawm mat na rai nga ai

Jaw ai masa lam langai gaw,ngai ngu ai masha langai hpe, ngai hpe tsaw ra ai wa, ngai hpe ntsaw ra ai ni gaw, hkrang shapraw dat nga ma ai tinang kaja yang, baw nshamu ai nga tsun tim, tatut hta tinang kaja nga tim, htawt shamu mat ai baw ni law law rai nga ai lam dum hprang let shakut sa wa ga ngu n gun jaw mayu ai.Tinang hpe tsawra ai wa gaw, tinang hpe amyu mi mu wa ai ten, tinang hpe ntsaw ra ai wa gaw myu mi mu mada nga na sha rai nga ai, laga masha wa tinang hpe hkrang shatsawm hkrum taw nga ai nga yang, anhte ni gaw, laga ni hte kanawn mazum ai lam hpe grai sadi ra na re ngu shadum n gun jaw mayu ai.

Jamna hte bung ai masha ni...Masha langai ngai kadai ngu chye na matu, laga langai wa ra nga ai, lam nan chye hkawm ai ma langai lam hkawm ai nga yang galaw chye ai hkrang hpe sadi mu ga na rai nga ai, lagaw lahkam lahkawng masum htawt yang hpang de bai nhtang yu yu re ai akyang, shi hpe yu nga ai , lahpawt dum n gun jaw ai nga yang matut hkawm na, gataw mat tim, bai rawt hkawm chye ai akyang ni nga nga ma ai, hpang kaw yu ai masha nnga yang, dum kau dat chye ai rai nga ma ai. dai maji ni gaw, shanhte a manu hpe kanu kawa ni a myit kata tam chye nga ma ai. Masha langai hku nna, tsa lam shadang hpring sak hkrung lu na matu, tinang hpe hkap la ai wuhpung langai kaja wa teng sha ra kadawn nga ai, tinang hpe kam  nna, hkap la lu ai wuhpung kata hta, anhte ni gaw, madu hkum madu kam ai lam nga ai ni, tinang a manu hpe chye nna, manu nga nga sak hkrung lu ai atsam nga ai ni byim wa lu na rai nga ga ai.

Masha Lapran Na Masha Langai... Anhte ni ra ai raitim, nra ai raitim, hkap la ai raitim, nhkap la ai raitim, anhte ni gaw wuhpung wuhpawng kata hta, matut sak hkrung ra na rai nga ga ai dai wuhpung wuhpawng kata kaw na sak hkrung let pru mat wa na ngu gaw nmai byim ai re majaw, gara hku man ap hkurm ra na ngu ai ladat ni hpe tam ra na re ngu shadum n gun jaw mayu ai.

Masha Shagu Hta Nga Chye Ai Hkrit Myit....Shyinggyim kanawn masum lam hta, Ngai Kadai Rai ngu ai hpe makoi magap da chye ma ai, madung lam yan gaw, ngai ngu ai masha hpe nra sharawng na tsang nna, ngai ngu ai lam hpe nshaw madun ma ai, dai rai yang, kanawn mazum lam hta, makoi magap lam hte, myimam gaup da chye ma ai, ngai ndai hku tsun yang shi ra na kun?, ngai ndai galaw dat yang shi pawt mat na kun?,nye lam ni tsun dan yang, ngai hpe shi kam sana nrai nga ai ngu ai hkrit myit ni hte, makoi magap da ai mungkan hta sak hkrung hkawm sa nga ma ai, dai hkrit myit ni a majaw, anhte ni gaw wang lu wang lang nrai mat ai hte, pyaw ai lam, jet ai tsawra myit ni a lam ntsa nlung lu nna, bawng ring rawt jat lam ngu ai hpe mung tat kau ra mat nga ai hpe dum hprang shangun mayu nngai kaja ai lam ni sha madun let kanawn mazum ai ten, lani mi ten, ngai ngu ai masha dan dawng wa ai shaloi, mang hkang ni chye byim nga ai hpe dum ra ai

Jet Ai Lam Gaw Mdung Re ngu ai hta gaw, Tinang hpe kaja wa wang lu wang lang bawng ring shangun na kanawn mazum lam gaw makoi magap da ai lam nnga jet ai ngai ngu ai masha langai hku jaw jaw sak hkrung nga sa ai lam rai nga ai Tinang a myit sawn lam, hkam la ai lam, kam ai lam ni hpe jaw jaw jahkrat madun nna, kanawn mazum ai lam gaw, langai hkrai hte sha nlu galaw lu nga ai tinang maga jet ai tara hku asan sha, hkrang madun ai shaloi hpang langai wa mung, madi shadaw garum hkrang madun ra na rai nga ai, byim wa ai lam yawng gaw kaja ai hku sha hkam la shangun ai nrai nga ai, jaw ai shut ai, kaja ai nkaja ai ngu gaw nga na rai nga ai, madu hkum nan mung shi a mabyim masa lam chye ma rai nga ai, ratiim madat ai wa a chye na ya ai lam gaw shi hpe n gun byim shangun nga ai.

Shada hting htawng kam let hkungga ai lam ni, chye na hkap la ai lam ni nga ai wuhpung wuhpawng hta, masha langai gaw, jet ai bawng ring rawt jat wa lu na rai nga ai, ndai wuhpung hta nga ai ngai a matu, shinglum ai, wanglung wanglang lu nga ai ngu ai myit langai gaw, masha shagu hpe jaw ai mabyim masa hte, jaw jaw nga nga magrau grang ai myit hte sak hkrung lu na matu, n gun jaw ya lu nga ai, ndai zawn lu nga ia shinggyim wuhpung langai gin shalat lu mu ga

#youth

#rvakachinservice