Shinggyim wuhpung wuhpawng a rudi npawt Kun dinghku

Tsawra ai Nu Wa Hpu nau ni anhte Kun dinghku hpe woi awn taw nga ai kun dinghku kanu kawa ngu ai ni  gaw shinggyim wuhpung wuhpawng hpe mung woi awn taw nga ai ni sha rai nga ai.Anhte a salum gaw anhte a sak hkrung lam a ningpawt ru di rai nga ai zawn shinggyim wuhpung wuhpawng a ru di sai lam mung kun dinghku nan rai nga ai.

Dai zawn sha Nawku hpung,Mungdan langai a ru di ru pawt nhpang gaw kun dinghku nan rai nga ai.Dai re majaw Mungdan langai,wuhpung wuhpawng langai hte Nawku hpung rawt jat galu kaba wa lu na matu gaw anhte kun dinghku langai hpra a galaw sa ai masing langai hta sha madung rai nga ai re.

Hpang de na shinggyim wuhpung wuhpawng langai a rawt galu kaba na lam gaw dai ni na ramma ni a nga sat nga sa shakut ai lam hta sha madung rai nga ai re. Kashu kasha  ramma ni a hpaji sharin ai ten, kaja ai sat lawat hte hkawm sa ai lam, tinang hkum tinang up hkang hkawm sa lu ai lam, Nanghpam tsa chyaru lu sha ni hpe koi gam ai lam,ndai zawn re ai lam ni hpe kun dinghku a kanu kawa ni hku nna kasi kaja hte atsawm yu lajang lam madun woi awn ya ai rai  yang seng ang ai shinggyim wuhpung wuhpawng  gaw rawt jat galu kaba wa na sha rai nga ai.

Ndai lam ni nnga yang tinang myit hpe machyu let myit ra ai lam hpe chyu hkan galaw hkawm ai wuhpung wuhpawng byin tai wa na rai nga ai.Hpang de shaning law law hta byin pru wa na shinggyim wuhpung wuhpawng gaw ya ten na ramma ni a sat lawat nga  sa lam hta she madung rai nga ai re.

Kun dinghku ngu ai gaw dinghta ga na sumsing lamu kaji zawn tsawra shawang matsan dum chye ai lam hpe gawgap ya ra ai.Anhte a myit ngwi myit pyaw nga pyaw lu na matu gaw tsaw ra shawang matsan dum chye ai lam hpe gawgap nna langai ntsa langai kaja tengman simani ai hte kanawn mazum ai lam gaw madung rai nga ai re.

Karai kasang a sharawng awng ai lam hpe  jai lang hkawm sa ai rai yang madu jan madu wa langai a ntsa langai tsawra hkungga kam shamyet nga na sha rai nga  ai.Dinghku a kanu kawa lahkawng yan a shada da tsun shaga ai lam hte nga sa lam ni gaw anhte a kashu kasha ni a matu n-gun tai shangun mayu ai hte maren kaja simani let tsawra myit hte hpring zup ai kasi kaja hkrang ni hpe madun chye ra ai re.

Anhte a kashu kasha ramma ni hpe shada da hkungga hkat nna Madu Karai Kasang hpe hkrit hkungga ai hte makam masham lam hta hkan sa na matu lam madun ya ra ai.Ndai nga sat nga sa lam ni gaw shanhte a prat hpe mung, masha law law hte kanawn masum ai lam hta mung madi shadaw ya lu ai re.  Anhte Kanu kawa ni sharin lam madun ai lam gaw madang tsaw nna kaja tsawm htap ai lam ni rai ra ai re.

Dai zawn sharin shaga lam madun ai hpe lu da sai kashu kasha gaw kaba ai lit magam ni hpe mung gun hpai lu nna shanhte a hkrang kasi ni gaw masha ni hpe tengman kaja ai lam ni hpe madun ya lu na re. Dai shaloi gaw shanhte a prat hpe ngang kang ai shakum hte makawp maga da chyalu rai sai majaw n hkru nkaja ai lam hpe aloi sha koi gam lu na re.

 Kun dinghku dum nta rit kawp tara hpe hpri shingna zawn nshaja tawn ai sha myit nyan htau li htau la myit ni, tsawra shawang myit hte yu lajang woi awn ra ai.  Tsawra shawang myit hte up hkang ai hpe kashu kasha ni hku nna mung sharawng awng ai hte hkan sa na sha rai nga ai re.

Bai nna,Kashu kasha ni hpe shakawn shagrau ga ni tsun shaga ya ra ai. Shanhte a prat hpe byin mai ai darawm myit pyaw hpa hpe galaw ya ra ai.Kanu kawa ni a tsawra shawang myit hpe dan dan leng leng madun dan ai a marang kashu kasha ni a myit masin hpe simani  wa lu na rai nga ai re.

Kashu kasha ni a shut mara ni hpe atsawm tsun dan sharin shaga ai sha n-ga tsawra shawang myit kaba hte shakawn shagrau ai lam ni hpe mung galaw ya ra ai.Nnshawp nkap nkaja ai lai kyang ni anhte a kashu kasha ni hta ndu wa lu hkra,shanhte hte mungkan a lapran ngang kang ai shakum hpe shanhte kaji ai prat kaw nna nan galaw makawp maga da ra ai.

Anhte kashu kasha ni a shawng lam hta kaja pyaw na matu hte ta tut na ten ni nga pyaw lu na matu gaw kanu kawa ni a li dik ai lit ni rai nga ai.Dai zawn sha kun dinghku hpe nga pyaw hkra mai byin ai darawm lit la ra ai re.Ndai lam gaw Ja gumhpraw lu su ai hte ja gumhpraw tam chye ai hta na  grau sari sadang rawng nga ai re.

Kashu kasha ni kaji ten hta nga pyaw ai kun dinghku dum nta hta nga kaba wa ai lam hpe galoi mung myit dum nga shangun ra ai.Dai hku rai yang she kashu kasha ni gaw shanhte nga lai wa ai dum nta gaw sumsing mungdan hta  lai nna simsa nga pyaw dik hku nna myit dum hkam la nna shanhte hkum nan kun dinghku de wa ai shani mung kanu yan kawa a kasi kaja lam ni hpe bai galaw wa na rai nga ai.

 San seng San pan hte atsawm sha rai nga chye ai, ndai lam ni gaw dinghku langai hpe up hkang woi awn ai lam hta nlawm yang nhpring zup nga ai re.Kun dinghku kanu langai gaw tinang a prat hta alak mi ahkyak ai ndai lam hpe galaw nga  ra ai majaw kasha ni a hkum hkrang bawngring lam,myit masin  san seng simani ai lai kyang lam ni hpe lam madun sharin ya ai lam nnga yang mung yawn hpa shut ai lam langai tai wa chye ai re.

Ladu shalai bu hpun mawn sumli ai lam ni hpe koi gam ra ai raitim hkum hkrang nsam gaw san seng san pan ai hte nga chye ra ai.Kun dinghku kanu kawa yan hte dum nta masha ni yawng san seng san pan nna yu pyaw yu htuk nga chye ra ai.Kun dinghku kanu kawa ni gaw rit kawp tara hkrak hte nga ai lam hpe ra sharawng ai,tinang a sari sadang hpe makawp maga ai lam ni hte atsawm sha up hkang chye ai atsam marai nnga ai rai yang  anhte kun dinghku hpe  ngwi pyaw ai kun dinghku gara hku mung nlu galaw na rai nga ai.

Anhte kun dinghku law malawng hta kun dinghku kanu ni gaw laika hti ai lam, machye machyang hte hpring ai ningmu ni lu la na lam,madu wa hpe madi shadaw garum na matu hte kasha ni a myit masin myit masa hte ni kahtep ai lam ni hpe aten nau njaw lu ma ai re.

Dai majaw kun dinghku kanu gaw gau ngwi ngwi dinghku bungli ni hpe grai pu ba ai hte galaw taw nga nna shi a atsam marai,aten hte myit shang sha ai lam ni gaw dai bungli hta hten za mat chye nga ai re.Kun dinghku hpe woi awn taw nga ai Kanu Kawa ni gaw grau kaja ai hku nna nga lu na matu tinang dinghku hta grau htap htuk ai myit nchyan shaw let kun dinghku hpe gawgap la ra ai.

Dai majaw tsawra hkungga ai nu wa hpu nau ni Lahta de tang madun lai wa sai hte maren shinggyim wuhpung wuhpawng,mungdan,Nawku hpung langai ngwi pyaw rat jat wa lu na matu gaw nang ngai anhte yawng ai kun dinghku gaw ahkyak dik rai nga ai majaw ngwi pyaw kun dinghku gawgap na matu nambat langai ahkyak dik nan re ngu tsun garan dat lu nngai.

Mung Hkrang