Shi Hpe Sha Tsawra Htum ( Youth Program )

Shiggyim masha jet yang gaw, prat mi hta grai tsawra ai masha langai gaw, nga chyalu rai na re. Dai zawn re ai masha ni hta, nkau mi gaw, jet ai tsawra myit, hpring tsup ai masha hte, nhkrum lu shi ai majaw, tinang hte kahtan rum, gam maka bung ai masha hpe nmu shi ai majaw nga nna, sum tsaw shi hkun, sha n-ga, tawn da ai ni grai law nga ai. Myen ga malai hta, “ sum tsaw hkying mi, madu wa langai’’ nga tsun da ai ga hpe myit n-gun la nna, shing jawng ai myit hte  tawn da chye ma ai.

Dinghku shang nga sai ni hpe yu dat ai shaloi, jet ai tsawra myit hte la hkat sai ni nga timung, lam amyu myu a majaw mabyim amyu myu hta hkan nna, nla yang nmai mat ai majaw, kanu kawa, ni shadut shagwi ai a majaw, ja gumhpraw ra marin ai majaw, hpaji chye magrau grang, hkum gawng shingyan tsawm htap ai majaw nga nna, dinghku shang sha ai ni mung, grai mu lu nga ga ai. Masha shagu gaw, hkum gawng shingyan tsawm htap ai hpe sha ra sharawng chye ma ai. Raitim, gawng shingyan tsawm htap ai lam gaw, prat tup rau nga nlu nga ai.Prat tup grin nga lu ai gaw, myit masa kyang lai len tsawm htap ai lam sha rai nga ai.

Anhte ramma ni yawng prat a matu myit masin hpraw san ai, jet ai tsawra myit hte hpring tsup ai, galoi raitim, grin nga lu ai tsawra myit hpe tam la lu na matu, ahkyak kaba ni nga ai. dai ni na ten, anhte a makau grup yin hta, asak naw kaji ai brang ji, hkawn ji ni, lam amyu myu hku nna, hten za mat ai ni hpe mu lu nga ga ai. Hpa majaw nga yang nkaja ai majaw, internet chatting a majaw, nang hpam tsi mawan a majaw, pyaw hpa lam ni hpe hkrai hkan tam ai majaw, hten za mat ai rai nga ai.Tsaw ra ai ramma ni,internet kaw na nkaja ai lam hpe ntam ai sha, tinang a prat rat jat galu kaba lam a matu, hpaji machye machyang lam ni hpe, hka ja akyu jashawn ai rai yang, lani mi hta, hpaji machye machyang kung hpan ai ni tai wa lu na rai nga ai.

Tsawra ai Ramma ni, tinang a prat a matu manang  tam ai shaloi, myit masin kyang lai len kaja ai, nkaja ai, hpaji chye ai, nchye ai, grau nna, makam masham nga ai, n-nga ai hpe shawng masam maram yu ra ai. Myit sawn sum ru ai lam nnga nna, tsaw ra myit langai hte sha, machye machyang nga nna tsaw ra myit majing nlawm ai rai yang ngwi pyaw simsa ai, hpring tsup ai prat hpe, gaw gap lu na nre hpe tau chye da ra ai.Hpaji sharin ai ten hta, sum tsaw hpe nawku nga ai rai yang, tinang a prat hpring tsup na daram, nhpring tsup lu nna, lam shagu hta hkrat sum mat chye ga ai. Dai majaw tinang a prat hta galaw mayu ai lam hpe madung da shakut sa wa ga ngu mayu ai re. Tsawra myit hte seng ai mau mwi langai hpe garan kachyan mayu ai.Moi kalang mi hta, grai hku hkau ai manang lahkawng nga ai da. Shan na mying gaw, Johnny hte susan da Jonny gaw, susan hpe grai tsawra wu ai. Susan mung shi a prat hta, hku hkau dik gaw, jonny sha nga ai. Susan gaw hkum hkrang gawng shingyan grai tsawm htap ai rai tim, myi lahkawng maga nmu ai re. Johnny gaw dai hpe chye da ai raitim, shi hpe matsan dum ai myit hte, grai tsawra nga ai. Dai majaw lani mi hta johnny gaw, susan kaw sa nna, nang hpe ngai grai tsawra ai, matsan ma grai matsan dum ai, dai majaw nang hpe hkungran la nna atsawm sha, yu mada gawn lajang mayu mat ni ai, ngai tsaw ra dik ai gaw nang langai sha nga ai. ngu tsun ai shaloi, susan gaw nang ngai hpe tsawra nga ai gaw ngai chye ai, raitim ngai gaw, myi nmu ai re majaw, myi mu wa ai shaloi she, mahtai jaw na, sarawun tsun ai myi tum galai bang yang kaja wa na re da . Dai ten du hkr la ya rit ngu bai htan tsun ai. Johnny mung shi myit pyaw yang rai sai ngu myit let, myit hkrum ya mu ai.

Lani mi hta johhny gaw susan hpang de sa nna, myi tum alu jaw na masha nga sai ngu tsun ai shaloi, susan grai myit pyaw let, kabu nga nu ai. Dai hpang ga lajang nna, myi tum n-nan galai bang la lu nna, myi mu mat nu ai. johnny gaw susan myi mu sai re majaw, mai byim ai daram mawn sumli ai hte, myi set set la nna, susan hpang de sa nna, shi hpyi da ai mahtai hpyi dat nu ai. Dai shaloi susan gaw, nang hpe ngai ntsaw ra ai, gara hku na mung nhkungran lu ai ngu bai htan ya wu ai. Jonny gaw tsun ndang hkra yawn ai myit hte, grai hkam sha mat let, ngai na myi tum hpe atsawm sha yu gawn lajang ya u yaw, ngu tsun da nna, grai tsan ai shara de, pru mat wa ai da, Kade nna yang susan gaw, shi a myi tum alu jaw ai , johnny re lam chye ai shaloi, grai hkam sha mat nna, yup nlu, sha nmu rai nna, hpang jahtum shi a prat jahtum ra mat ai da. Tsawra ai ramma ni, ndai zawn byim ai lam gaw, jet ai tsawra myit rai kun? hku hkau tsawra ai lam gaw jaw ai kun? sung sung myit yu ra nga ga ai.

Matut nna, ngai grai tsawra dik ai wa a lam, tsun dan mayu ai, shi hpe ngai grai tsaw ra ai, dai tsawra myit hpe, hti ga nga yang, hti nlu na daram, rai nga ai. Shi hte shaning ten law law, sadi dung ai myit hte tsawra lai wa sai, raitim, lani mi ten, shi hpe tsawra myit hta grau ai, nye prat a matu, shim lum ai tsawra myit hpe jaw lu ai wa hpe, ngai tam la lu sai. Shi hpe nye prat htum hkra, matut mahkai tsawra nga na ngu lata la ni ai. Hpa majaw nga yang shi gaw hkum gawng shingyan tsawm htap ai, myit sum nung shing di nna, shagrit shanem ai hte, ngai hpe galoi mung n-gun jaw ai hte, garum ya ai. Nye ntsa tawn da ai shi a tsawra myit, ap nawng sak jaw machyi hkam ya ai shi a tsawra myit ni gaw, kadai mung njahten lu ai tsawra myit ni rai nga ai. Dai majaw shi a tsawra myit kaw nna, lawt nlu na daram, ngang grin ai tsawra myit hte grai tsawra mat ni ai.

Ngai grai tsawra wa a mying gaw, lahta kaw na mau mwi hta myi lahkawng maga  nmu ai wa hta, grau ai, shi hkum hkrang asak aprat yawng hpe ap nawng kau ya ai du hkra, anhte hpe tsawra nna, hkye hkrang la ai “ Madu Yesu ’’ nga ai wa rai nga ai. Tsawra ai ramma ni, na prat hta, nang grai tsawra dik ai wa hpe tam mu sai kun? myit yu ga… Aten naw nga ai shaloi, masha shagu gaw, madu yesu hpe hkap la tsawra kam sham na grai ahkyak nga ai. Dai rai yang chyu sha, Madu Yesu ngai hpe tsawra ai zawn, nanhte hpe mung tsawra nna, ra ia lam shagu hta garum ya na rai nga ai ngu n-gun jaw karan kachyan ya dat ga ai.

Crd Arrsa(moguk).

#youth

#rvakachinservice