Shakut Ai Lam Yan Hta, Kaman Lila Tai Mat Wa Ai Ten

Shakut Ai Lam Yan Hta, Kaman Lila Tai Mat Wa Ai Ten

Anhte ni yawng shakut nga ga ai, awng dang lam a matu, mying dan hkung na matu, lu su na matu, masha ni hta grau hkra ngu ai zawn re ni rai nga ai

Shakut ai lam yawng awng dang wa ai ten myit pyaw lam lu ai zawn, shakut shaja da ai lam ni yawng kamam lila rai mat wa ai ten ni hta mung myit yawn ra nga ga ai. Tsaw ai de du ai ten, myit tsaw nna, npu de nhkrat chye ai hku shadu kau chye mat nna, npu de du mat wa ai ten, myit daw myit hten nna, si na daram hkam sha nga ga ai, dai hta nkau mi bai rai yang, ntsa kaw na npu de hkrat mat na myit sawn nna hkrit nga ai ni mung nga nga ai, ndai lam ni gaw shinggyim sak prat a shingra tara lam masa rai nga ai  hpe yawng chye nga ga ai re.

Bai sawn sumru yu yu ga, sak prat hta, ading sha awng dang taw nga ai ni hte, hkrat sum taw ai masha ngu nnga nga ai shinggyim masha ngu gaw shakut ding yang rai nga ra ai, jaw nga ai, shakut nga ai te, awng dang lam ni hkrum wa na, hkrat sum lam ni hkrum wa na, hpa hpe mi mu mu, hkrum hkrum, ndai lam nigaw jahkring sha re ngu myit hta bang da sawn lu ra nga ai, ra marin ai lam ni, hkrit tsang ai lam ni hpe koi yen lu na matu, shakut ra nga ai, shyingra tara mabyim lam ni hpe ngang ngang hkam jan lu ai masha langai byim lu shaman shakyang shakut ra nga ai ngu n gun jaw shadum mayu nngai law.

Bi tsawra ai ramma ni, hpawt de ngu na shagu hta awng dang ai lam yan ni nga nga ai hpe n gun jaw mayu ai, tsaw ai lahta de du na matu nga yang, mayak lam amyu myu hpe hkrum katut tawt lai wa ra ai, tinang byim mayu ai lam hpe byim hkra galaw lu na matu nga yang, myit hkam sha lam ni hte nmai sak hkrng nga ai, pan dung yaw shada lam ni hte sak hkrung ra nga ga ai re, masha shagu gaw, tinang shakut taw ai ten nbyim wa ai ten myit daw myit kaji chye ai gaw shingra tara rai nga ai.

Npre nem ai langai a majaw yaw shada ban dung ni nmai jahten kau nga ai, yaw shada lam hten bya mat yang sak prat mung hten mat chye nga ai, dai ni hkrat sum nna myit kaji nga taw tim, hpawt de ngu ai ninghtoi ni hta mai kaja dik hkra shakut hkawm sha sa wa ga  shakut shaja ai ngu ai hpawt de na ninghtoi shagu hta awng dan ai lam yan ni nga nga ai, dai hta myit daw nga yang bandung hte tsan mat na rai nga ai, dai majaw tinang ra sharawng ai ban dung yaw shada lam hpe kaba tawn da nna, nshayawm ai myit masa sat lawan magam bungli ni hte shakut sa wa na nga yang ,hpawt de shagu hta awng dang ai lam ni gaw nang hpe la taw na teng sha rai nga ai ngu n gun jaw shadum ya mayu ai law

Bai langai bai tsun mayu ai hta anhte nang ngai ni yawng hta kalang lang lagawn chye ai akyang gaw kadai kaw mung nga nga ai raitim dai lagawn ai lam hta pyaw mat sai nga yang awng dang galu kaba wa na lam hte tsan mat chye ai hpe mung myit hta galoi mung dum ra nga ai, myit masin hta hpa magam hpe  yaw shada lam tawn tim, tatut galaw ai ten hta, shakut shaja ai lam, atsam marai ni nnnga yang hpa byim wa lu na nrai nga ai

Lagawn ai ngu gaw hpaji hkaja ai ten ni hta mung nhkrak ai zawn, bungli galaw ai ten ni hta mung nkaja nga ai, nkau jawng ma ni hpe mu ga na re, bawnu kaja nna sharin hkam la ai lam hta loi nga tim nkam shakut ai lagawn ai, dai majaw shanhte ni ningtawn ai lam nnga ai hpe mung mu ga na re

Bungli galaw ai hta hta, lagawn ai gaw, grai nan sawng dik ai kaw lawm nga ai, hkau na galaw ai wa nga yang hkau na htu nmai lagawn nga ai jawng sara nga yang laika sharin ai nmai lagawn ai dai zawn sha hpa hpe mi galaw galaw tinang galaw nga ai magam hta nmai lagawn nga ai, lagawn nga taw yang gaw dai magam lam awng dang na daram awng dang wa lu na nloi nga ga ai hpe mung dum ga

Nkau bai rai yang hkaja la na lam hta grai lagawn nga ma ai, sharin hka ja la ai ngu gaw, jawng ma ni a bungli sha shadu nga ma ai, kaja nga yang galoi mung hka ja la nga taw yang she rawt jat galu kaba wa na rai nga ai ,  dai majaw nang hka ja na nnga ai shani gaw si ai shani she re nga nna ga malai hku tsun nga ma ai rai nga ai

Dai majaw  sak prat hta awng dang rawt jat mayu yang lagawn nga nmai ai shakut shaja nga ra ai, kaja ai myit sawn lam nga na ra nga ti, dai lam ni hpe hkrang shapraw sa wa ai ten ni hta, sadi sahka , ngyan maria hta, n gun atsam ni ra nga ai, shakut nga ai ni yawng gaw lani mi awng dang wa na ni hkrai rai nga ai, dai majaw lagawn ai lam gaw, anhte nang ngai hpe hpang hkrat shangun chye ai lam re, dai majaw nang hkum lagawn ngu shadum n gun jaw dat let,

#youth

#rvakachinservice