Shada da chye na ya ai lam hte kam hpa shamyat shanat hkat ai lam gaw Dinghku a ahkyak kaba lam re

               Tsawra hkungga ai Kun Dinghku Kanu Kawa ni e anhte tinang a ningrum ningtau ni a lai sai ten ni hpe hkap la ra nga ai.Anhte madu jan madu wa lahkawng jawm pawng let kun dinghku langai gaw gap da ai ngu ai gaw shawng lam hpe rau sha gaw gap na ngu ai lachyum rai nga ai nrai ni,anhte shawng lam hpe rau sha jawm hkawm sa gawgap na nga jang gaw langai hte  langai a lai wa sai ten na lam ni hpe malap kau na ra nga ai re. Bai nna, tinang hkum tinang galoi mung rawt jat galu kaba hkra shakut nga ra ai.Ndai hta anhte gaw tinang ningrum ningtau kaw nna tinang hpe galoi mung myit nhtum hkra nga sa nna,anhte kun dinghku hpe galoi mung ngang grin hkra shakut nga ra ai.Tinang hkum tinang rawt jat wa hkra shakut hkawm sa nga ai gaw anhte kun dinghku hpe grau nna hprinem nga pyaw shangun nga ai rai nga ai.

             Dai majaw anhte kun dinghku num ni kun dinghku de ai hpang majoi mi hkrup mara anoi abya rai nnga ai sha,asana wan tsawm tsawm htap rai nga na,dum nta hpe nga pyaw mayu na zawn rai hkra galaw shatsawm ai,nsen pyaw ai hte tsun shaga na ra ai zawn,la ni mung dum nta a sut masa lam hpe kaja ai hta grau kaja na hkra,bungli galaw shakut mayu ai myit galoi mung rawng nga na ra nga ai.Grau nna gaw madu jan madu wa lahkawng langai hte langai a ntsa galoi mung sadi dung tsawra nga na gaw grai ahkyak nga ai.Tsawra hkungga ai kun dinghku kanu kawa ni e anhte ningrum ningtau jan ni mung tinang a ningrum wa yaw shada lam myit mada lam ni hpe mung n gun jaw ga,manghkang lam ni hkrum wa ten hta rau sha nga tsap ya hkat ra ai,Mayak mahkak lam ni hpe mung myit galu kaba hte madat ya nna hpaji jaw la hkat nga ra ai.Anhte hte kun dinghku hta shada da chye na ya ai lam hte kam hpa shamyat shanat hkat ai lam gaw anhte dinghku hta grai nan ahkyak nga ai re.Anhte sumtsaw sumra ten ni hta gaw nhpri nem ai ten hkrum wa ai hte myit sawn lam shai hkat wa ai ten hta hka na bra na ngu ai gaw loi nga ai raitim,kun dinghku de madu jan madu wa ngu byin wa sai kaw nna gaw loi loi hte hka bra na ngu ai nmai byin sai rai nga ai.

            Madu jan Madu wa lahkawng hkrum wa na mayak mahkak lam ni yawng hpe rau sha jawm lai di let kun dinghku shawng lam de hkawm sa ra nga ai. Bai nna anhte madu jan mi rai rai madu wa mi rai rai tinggyen ahkying aten ngu ai mung nga gring nga ai.Dai tinggyeng aten hta manghkang lam ni hpe hparan lu na matu myit sumru ai lam,hpaji lama ma hpe sharin hkaja ai lam hte hkring sa la ai ten ni galaw la ra ai,Dai ten ni hta ningrum kaw nna chyena ya nna shang je bat ai lam n galaw ya ga,bai nna tinang a mayak mahkak lam ni hpe tinang a ningrum hpe tsun bawngban ai lam ni jahkring hkring galaw ya ra ai,shaloi she langai hte langai grau grau nna chyena kamhpa ai lam ni grau law jat wa lu na rai nga ai.Bai anhte shinggyim masha shagu gaw shut ai lam hte nlawt lu ai ni hkrai rai nga ga ai majaw mara ndat ya lu ai Manghkang kaba ni hta lai nna kaga kaji kajaw re ai lam ni hpe gaw mara dat ya hkat let malap kau ra ai.Dai re majaw tsawra hkungga kun dinghku kanu kawa ni anhte kun dinghku galoi mung ngang grin ngwi pyaw nga lu na matu hpa masa lam hta rai tim tinang kun dinghku hpe ningshawng jaw let anhte madu jan madu shada da hkungga manu shadan let tsawra kamhpa shamyat shanat let anhte kun dinghku hpe gaw de sa wa  ga law.

 

By; John Mung Hkrang

 

Add new comment

5 + 8 =