Sak Prat Awng Dang Lam A Nanan Gaw Kraw Kata Na Myit Hkrang Hta

Sak Prat Awng Dang Lam A Nanan Gaw Kraw Kata Na Myit Hkrang Hta

          Anhte ni gaw awng dang mayu ga ai, awng dang ai sak prat hpe myit mada nga ga ai, sut masa lam ni hta, awng dang ai wa, shingni shingwang hta ningtawn ai wa ni byim mayu nga ga ai. Mung masa lam, hpaji lam,shinggyim shingwang ni hta awng dang mying gumhkawng mayu ga ai, yu maya anhte shinggyim masha ni ndang di lu ai lam ni hta mung lak lai ai hte awng dang mayu ai lam ni gaw shyinggyim a myit masa shingra tara nan rai nga ai re

Ndai lam yan ni hta awng dang taw ai ni gaw gara hku hpang na awng dang wa ma ai kun ngu ai lam hpe yu yu yang, awang dang mayu ai kraw kata na myit ngu ai lam rai nga ai, sut masa lam hta awng dang taw ai wa langai wa, ngai kaji ai ten kaw na ndai zawn awng dang sut su wa lu na matu galoi mung yup mang shingran da ai re nga nna tsun da ai dai hpe yu yang shi a awng dang lam gaw shi a yup mang shingran myit sawn ai lam kaw na hpang wa ai lam hpe mu mada lu nga ai

Awng dang ai ni shagu gaw  sak prat mayak  mang hkang ni hte hkrum nan hkrum nga ai galaw shakut ai lam ni hta hkrum ra na mayak lam ni, mang hkang ni hpe hkrum kadup tawt lai lu na matu gaw awng dang lam hpe shanhte a myit sawn shingran kata hta, kau chyen maga hku na galoi mung adum jum tek da lu nga aimajaw mung rai nga ma ai. Shadu ai hku byim chye ai lam hpe yu yu yang,  kraw kata myit hta shara la da ai nang a myit sawn ai lam ni gaw nang kade daram awng dang na, gara hku hkrat sum na hpe dawdan lam galaw ya taw nga ai nnga nna mung tsun da hpe mu lu ai. tsun mayu ai gaw awng dang mayu ai myit katu sharawng nga ai wa hta, awng dang na matu law nga ai, hkrat sum mat sana kun ngu myit ung ang taw ai wa hta, hkrat sum na lam law nga ai, tsun mayu ai gaw, masha gaw myit hta mu mada ai hte maren byim chye ai masa lam ni mung nga nga ai majaw rai nga ai.

Anhte nang ngai shagu hta Awng Dang Lam ahkaw ahkang gu dek nga ga ai sak prat shara shagu ni hta, sak prat a ten ladaw langai mi hta, Awng Dang Lam Asi Apu hpe masha shagu hkam sha lu nga ga ai. Ang Dang Lam gaw nam nak lachyum sung la ai rai nga ai hte, nang gara shingwang gara shara hta ningtawn awng dang mayu nga ai kun? dai lam ni gaw nang a lata ai lam hta madung rai nga ai re, gara shingwang hta gara hku mi awng dang mayu ai raitim, galaw ra na gaw nang ra sharang ai awng dang lam a matu, htap lahkawng ram gaw shakut shaja ra na re, hpa n galaw, hpa n shakut nna gaw lak lai ai awng dang lam lu na nre hpe gaw galoi mung dum ga.

Hkam sha lam hte awng dang lam ngu ai hpe mung tsun dan mayu ai. Sak prat hta lu su nna awng dang taw ai lam kun mying gumhkawng ai mung masa woi awn ai wa kun shing nrai awng dang ai yungwi shadang wa kun ndai gaw gawng shingyan awng dan ai lam rai nga ai.Nkau bai rai yang sanpra ai ni a myit masin simsa lam kun dinghku a pyaw ai lam, ra sharawng tsawra ai lam shing nrai sak prat a hkam jan lu ai myit ni hpe lu madu mayu na rai nga ai, dai lam ni gaw myit hkam sha lam awng dang ai lam rai nga ai, gawng shingyan , myit masin ni gara hku mi rai rai, nang gaw sak prat hta gara lam yan hpe lu madu awng dang mayu ai kun dai hpe mung myit sawn yu nga ga ngu n gun jaw shadum mayu ai.

Asum njaw dingsang nang nsum shi nga ai, nahte a myit ni hta myit n gun ngu ai nga nga ai awng dang ai ni a kraw kata na myit byim mayu ai lam gaw Byim U Ga ngu ai atsam nan rai nga ai, dai zawn katu ai ngang gring ai myit marai ni gaw anhte hpe awng dang na lam de du wa lu shangun nga ai re. Bai sak prat awng dang lam hpe manu shadan nga ai ramma ni gaw awng dang lam a zaw ga hpa rai ngu san chye nga ma ai dai awng dang lam a zaw gaw awng dang mayu ai lam hpe katu ai lam rai nga ai awng dang ai ni gaw kaning zawn re ai arung arai ni jai lang ma ai kun shanhte a madung lak nak gaw ja gumhpraw hte masha ni a madi shadaw ya ai lam nrai nga ai dai gaw hpa rai nga yang nshayawm kau ai atsam marai lak nak jai lang ai lam rai nga ma ai re.

Tsawra ai ramma ni anhte a hkum dek hta awng dang ai lam ban dung gu dek hta nga nga ma ai dai ban dung ni hpe myit masin kraw kata hta dawk bang da let atsam marai hpring hpring hte galaw shakut sa yang awng dang ai lam hpe teng sha lu madu wa lu na re, myit masin hpe tsaw tsaw da let shakut hkawm sa ai ni gaw, tatut sak prat hta grau awng dang ai sak prat hpe gaw gap sa wa lu nga ma ai dai majaw myit masin kata hta mawmawn myit sawn da ai lam ndang di lu yang, gara kaw wang dang wa lu sana ngu gam

#youth

#rvakachinservice