Sadi Dung ai hte sha Kaja ai ningrum ningtau rai sai kun?

Tsawra hkungga ai nu wa hpu nau ni e dai ni a shinggyim wuhpung wuhpawng hta ningrum ningtau a ntsa nshut ai,tsa chyaru nlu sha ai,hpan da n gasup ai hte grai kaja ai ningrum byin taw nga nna tinang a ningrum hpe n gup aga kyang lailen hte dangsha mai ai ngu hkam la ni mung nga nga ai hpe mu lu nga  ga ai.

Anhte makau hta byin nga ai chye ai hta ningrum ningtau wa gaw sadi dung ai,tsa chyaru mung nlu sha ai,shata shagu lu ai ja gumhpraw hpe mung yawng ap ai.Raitim manghkang gaw ga law ninggyet hkat shagu lata lawm kayet adup ai.Dai hta sha n ga masha shawng hkan shara nlata gaya jahkrum pawt kayet adup ai lam ni galaw ai hpe mu lu ga ai.Hpa majaw kayet ai law ngu san yang ningrum ningtau jan hpe sharin shaga ai re ngu tsun chye ai.Shi tam jaw ai hpe sha nga ai re,dai majaw shi ga madat ra ai,shi ga nmadat ai,shi tsun ai hku nbyin ai,shi hpe ninghkap ai majaw ngu mara shagun let  ningrum ningtau jan hpe adup kayet ai lam galaw ai hpe mu lu ga ai.Ndai zawn ningrum ningtum jan hpe gumhpraw hte mari ai zawn myit let kanawn mazum hkrum nga ai ni anhte mungdan hta law law mu lu nga ga ai.

Bai nna bungli galaw ai shara rung,shawa hte kanawn mazum ai lam hta grai kaja ai,raitim dum nta masha ni hpe gaw kachyi mi pyi nhkam sharang lu ai,ningrum ningtau jan hte kashu kasha ni hpe galoi mung pawt ai lai len hte sha kanawn mazum ai,Ma ni nga yang shanhte a kawa hpe hkrit ai majaw nga shara pyi nnga ai zawn nga hkam sha shangun nga ai.Raitim ningrum ningtau jan tsun ai gaw ningrum ningtau wa gaw sadi dung ai da, shi hta gawng kya ai lam gaw masin pawt ai  hte kanawn mazum ai lam sha re nga hkam la ai hpe mung mu lu nga ai.Tsawra ai nu wa ni e ningrum ningtau kaja langai a kasi madang ngu ai hta la re majaw grau ai yawm ai ngu nmai galaw ai zawn num re majaw grau ra ai yawm ra ai ngu ai lam mung nbyin gring nga ai re.Ningrum ningtau wa hku nna mung tinang tam jaw ra ai raitim tinang a ningrum ningtau jan hpe hkungga manu shadan ai hte kanawn mazum na grai ahkyak nga ai.Ngai tam jaw ai sha nga ai ngu myit la let adup zingri ai lam gaw grai nan grit nem ai myit masa nan rai nga ai.Bai nna dai ni na prat hta Sadi dung ai tinang a ningrum ningrau jan hte sha prat tup rau jawm pawng kanawn mazum nga ai hte sha gaw ningrum kaja ngu nmai tsun nga ai.Hpa majaw nga yang ningrum ningtau jan galaw ai hpe dung sha kap nga ai tinang a atsam nkam shaw la ni hpe mung anhte mu lu nga ga ai.Dai zawn sha ningrum ningtau jan mung ningrum ningtau wa hte sha prat tup rau pawng nga ai hte sha gaw ningrum ningtau jan kaja ngu nmai sawn la nga ai.Dai majaw tsawra ai kun dinghku kanu kawa ni a kangka ai ningrum ningtau tai lu hkra shakut nga ga.

By: John Mung Hkrang