Ramma Ni Lam Yan Jaw Na Matu ( Youth Program )

Yup Mang Mang U

Ramma Jet yang, yup mang mang chye ra ai.Yup mang ngu ai hta, yup taw let, mang taw ai baw hpan hpe tsun mayu ai nrai nga ai, tinang a prat shawng lam a matu, yup mang tawn da chye na matu hpe tsun mayu ai rai nga ai.Dai hta, tinang ra sharawng ai yup mang ni hpe tsawm htap hkra, hkrang shapraw lu na matu mung ahkyak la nga ai re. Ngai lani mi ndai zawn byim nan byim ra na ngu ai yup mang shingnrai pan dung dai teng sai nga yang, ntat kau ai sha, hkrang shapraw na ra nga ai. Dai majaw, tinang a matu mung, makau grupyin ni a matu mung, mai kaja ai yup mang langai ngang kang sai nga yang, galoi nhting nut ai sha, hkrang shapraw na matu hkum hpang hkrat, tawn kau da na mung hkum myit, ja gum hpraw tam na matu, madung tawn da ra ai ten rai taw tim, ahkaw ahkang lu ai aten ni hta, kaji kaji la let, yup mang ni hpe, gwu ngwi ngwi hkrang shapraw mai nga ai. Yup mang ni law law mang u, Kaja dik ngu ai yup mang hpe, lata shaw u, Nhpring dingsa hkrang shapraw nga u.

Hkyen Lajang U.

Masha ngu ai gaw, galoi mung ndai asak prat kaw sha, hkring taw na nrai nga ai. Yang chye ai hte maren, asak ni mung kaba wan a, tinang a hkrang nsam ni mung galai wa na ni gaw, shinggyim masha a shingra tara rai nga ai hte maren, grai ngalai shai shi yang, galaw da galaw gring ai lam ni, byim mayu ai lam ni galaw lu na matu, tau nau hkyen lajang ai lam ni galaw ra nga ga ai. Myit masa lam ni hpe mung, galai shai ra ai. Shawng lam prat a matu, ja gumhpraw ni mung, hkyen lajang ra ai. Byim wa chye ai akyu lam yan ni yawng hpe hkam jan lu na matu hkyen lajang ra nga ai hte, tinang shakut nna, byim wa ai lam ni yang, mai kaja akyu ara ni hpe mung, masa jaw jaw hte jai lang chye na matu hkyen lajang ra nga ga ai. Madu lu ai lam law wa ai hte rau hkrat sum na lam ni mung shi chyu shi byim wa nga ai re Dai majaw, lu madu tawn ai lam ni, shakut da ai lam ni, hkrat sum wa ai ten, lam yan masa hpe hkap la let, nnan kaw na hpang lu hkra, lajang da ra ai ni mung law law rai nga ai. Dai re majaw, ramma prat hta shaku tai hte n-ngut shi nga ai. Shawng lam hte  tinang sak kaba wa na matu hpe , tau hkyen lajang da ra nga ai. Bai nna, Tinang woi awn sa wa, kun dinghku a matu, ja gumhpraw hte, tinang yu lakawn ra na ni hpe, ja gum hpraw maga shajin da ra ai. Hpa ni lajang shachyip da tim, tsun nlu ai ndai mungkan ga a majaw, pri nem ai shara kaw na, hkrat sum wa nga chye ai majaw, myit masa maga hku, mai byim ai datam nhkrat na matu, shajin da ra ai ngu n-gun jaw mayu n-ngai.

Pan Dung Ni Tawn Da U

Ngai Lani mi hpa byim ran a ngu ai ngang gring ai yaw shada lam ni tawn u. Dai pan dung hpring wa na matu, myit hta galoi mung bang da let, tinang du mayu ai pan dung de, mai kaja ai hku du lu na matu, gara maka hku kaw na mi rai rai, galoi raitim sa lu na matu jin jin rai ra nga ai. Ramma prat ngu gaw ten ladaw, langai mi rai nga ai majaw, dai ramma prat ten hta, Ngang gring ai yaw shada pan dung ni tawn da chye na ahkrak nga ai. Dai rai yang sha lachyum rawng ai ramma prat byim tai wa nna, pan du lu madu lu na rai nga ai law.

Garum Na Hkum Lat U.

Kadai mung nang hpe garum ya na matu lit nla nga ai. Tinnag galau yang tinang rawt dung ra na sha rai nga ai.Dai majaw kade na garum ai lam hkum la, tinang a atsam marai sha, jet taw yang shi chyu shi garum na nga wa na sha rai nga ai. Nhpyi nmai hpyi kau dat sai nga yang mung, lu yang lu na, nlu yang mung nlu na, dai ten hta, tinang hpyi ai wa a garum lam nwa wa ai ten, hkum pawt ndai ai hta sha n-ga chyeju dum dat u, hpa majaw nga yang, shanhte a majaw tinang gaw, mayak ni hpe, manang wa a garum lam nlawm ai sha, lu hpran dat ai a majaw rai nga ai. Dai majaw,Mai byim ai daram tinang hkrai shakut hkawm sa u,

Hkam Sha Lam Hpe Hting Hkang U

Ma kaji ten hta, lu mayu ai lam nlu yang hkrap ai, dai zawn masha kaba byim wa tim, lu mayu ai lam nlu yang hkrap mayu wa ai.Byim mayu ai ni nbyim wa yang, mungkan ga hpe ninghkap mayu wa ai. Ngai dai ram she galaw wa, hpa majaw hpa nbyim wa ai kun? Ngu na hkam sha chye nga ga ai. Dai ten myit hkpe hting hkang ra na re. Mung kan ga, kachyi mi galai shai dat ai the, shinggyim prat ni hkra mchyi wa chye nga ai re. Nkaja ai ni byim wa yang, grai hkam sha nna, mai kaja ni byim yang mung, grai nan kabu chye nga ai hte tinang a prat hpe, malap kau chye nga ga ai.Dai majaw hpa lam ni hpe mi galaw galaw, awng dang ai mi rai rai, hkrat sum ai mi rai rai, hkam sha lam hpe, hting hkang chye ra nga ga ai.Dai majaw du mayu ai pan dung du lu na matu, hkam sha lam ni hpe hting hkang chye ra nga ai ngu n-gun jaw mayu ai.

Galaw Mayu Ai Hta, Galaw Gring Ai Hpe Galaw U

Ramma ngu ai gaw, galaw ra ai lam ni law nga ai zawn, galaw mayu ai lam yan ni mung law nga ga ai. Dai hta hpa chye byim ai i nga yang, myit ung ang mat chye nga ga ai.Dai majaw myit masa hkrak tup chye jahkrat ra nga ga ai. Lam yan masa jaw na mung ra nga ai. Galaw mayu ai gaw ahkrak ai kun? Galaw gring ai gaw jaw ai kung? Ngu ai hpe gin hka chye ra nga ga ai. Galaw mayu ai ni law nga nna, galaw gring ai hpe chye nga tim, galaw dat ai ten, yaw shada lam nnga, nmyit mada da ai hkrat sum lam ni byim wa chye nga ai.Dai majaw galaw mayu ai hpe hpang de tawn kau da nna, Galaw gring ai hpe madung da gawlaw sa wa ga, dai rai yang sha pri nem ai prat hpe lu madu lu na rai nga ai.

#youth

#rvakachinservice