Ramma Ni A Kraw Hpaji Hpe Sharawt Ya Ga

Ramma Ni A Kraw Hpaji Hpe Sharawt Ya Ga
2010 ning June jahtum bat na HR Management & Training Journal hta ramma hte seng nna, Dr. War War Maung a ga- ngau hpe hti hkrup ai.shi a ga nhpaw hta, “ Ramma ni gaw dinghku, mungdan hte shinggyim wuhpung wuhpawng a gam maka re. Ramma ni hpe du wa na aten hta magrau grang zet let, atsam marai hte, hpring ai ningbaw ningla ni byin wa na matu, mungdan ni gaw lam magup hku nna, shaman shakyang, shakung shahpat sharawt ai lam ra ai. Seng ang ai mungdaw mungdan a amyu sha lam yan sut masa hte ding yang bawng ring ai lam hpe matut manoi hkang zing makawp maga na gaw, ya kaba wa nga ai ramma ni a lit nan rai nga ai nga nna, ka da nga ai hpe mu lu ai.
Shi matut tsun ai hta, mungdan langai a bawng ring rawt jat galu kaba wa na matu ra ahkyak lam langai gaw, bungli hkum hkum tsup tsup lu ai lam re, nga ai, Ramma ni a bungli galaw lu na ahkaw ahkang hta hkan nna, shingjawng mayu ai myit, shakut mayu ai myit ni hte, ning nan gyin shalat ai lam ni paw pru wa ai a marang e, myit nyan hpaji atsam marai ni zet let wa na hpe n-gun jaw ai lam byim shangun nga ai. Dai ni na aten hta, mungdan langai gaw tinnag mungdan a ban prat ningnan na ram ramma ni, kraw hpaji wunawng wuwa hpe tang du kaja ai lai ladat ni hte shaman shakyang, jahpan shalat ya ai hku nna, mungdan a bawngring lam hpe gaw sharawt ra nga ai nga ai, dai ni na aten gaw nhprang rai ni hpe npawt tawn ai sut hpaga kaw nna, masha hpe npawt tawn ai sut hpaga ( sh ) machye machyang hparat hpe npawt tawn sut hpaga de galai wa sai. Nhprang rai npawt tawn ai sut hpaga gaw hten run ma ai hpe byin shangun mai ai raitim, masha npawt tawn ai sut hpaga gaw hten run ai lam hpe nbyin shangun ai. Htap mi hta htap mi rawt jat galu kaba dam lada wa shangun ai. Dai hta n-ga laklai rai nnan galaw ai lam hte gyin shalat lu ai atsam nga ai bungli n- gun ni hpe ding yang shalat nga na matu ra nga ai. Rai yang she mungdan a shng jawng lu ai atsam hpe rawt jat shangun lu na rai nga ai, nga ai. Dai majaw mungdan a ningbaw ni, wuhpung wuhpawng a ningbaw ni hku nna du na aten a kraw hpaji atsam marai ni grau grau kaja wa hkra daw dan masing jahkrat ra nga ai hpe tsun ai. Myit kraw hpaji atsam grau kaja zet let wa na matu hkan sa galaw ra ia lam 12 hte mung shadum n gun jaw mayu ai.
1.N-gun rawng ai lu sha hpe ram ging hkra chye sha ai ramma grupyin byin na matu.
2.Hkamja lam hpe makawp maga ai hkum hkrang shamu shamawt gin sup lam hpe hkan sa ai ramma grupyin byin wa na matu.
3.Kanu kawa hte sara/ma ni a bau rem sharin achyin ai lam hte ramma ni hkam la hkan sa ai lam nga nga na matu.
4.Nanghpam lusha koi gam na matu
5.Ramma ni mung bungli galaw mayu ai myit, shakut mayu ai myit hte ningnan byin nga ai hpaji ni hpe hka ja sharin la mayu ai myit nga nga na matu.
6.Makau grupyin hta ginsup pa, hkum hkrang shamu shamawt ginsup na aten lu na hte, laika machye machyang ni hti la mai ai Enabling environment byin pru shangun ra ai.
7.Kraw hpaji atsam kaja na matu, prat hta hkan nna gyin shalat ai lam hpe n gun jaw ai hpaji hte hkam ja lam jasat ni, lai ni ra ai.
8.Du na ban ningnan a matu myit kraw hpaji atsam kaja hkra sharin achyin ai hte sharin hkamla ai ladat ni mung grai ahkyak ai rai nna, htap htuk manu na ra nga ai
9.Bungli galaw masha gat lawk a ra ai hta hkan nna, byin pru wa ai gat lawk ni paw pru wa na matu, hpaji lam yan karum madi shadaw ya ai lam hpe, ding hkrai wuhpung hte asuya dap ni kaw nna jawm jahpring shatsup ya lu ra ai.
10 Bungli galaw masha gat lawk hta ra ai hte maren, kup tsup ai masha ni byin pru wa na matu, sawk sagawn ai lam ni, jawng ni, dakkasu ni a sharin matsun ni, sharin lai ladat ni prat dep bawngring nga na matu, dingyang galaw nga ra na rai nga ai.
11.Lak lai ningnan rai galaw shapraw ai hpe n gun jaw ai jasat ni jahkrat masat ra ai. Ga shadawn kraw hpaji atsam gun rai ahkaw ahkang hpe masat masa galaw ai madun poi shing jawng poi ni hpe galaw ai lam.
12 Gat lawtk shiga ni hpe dam lada hkra galaw ai lam ni rai nga ai.
Shingrai tinang a mungdan, tinang a sut masa wuhpung wuhpawng hta myit nyan atsam marai kaja ai masha ni shang lawm ai wuhpung wuhpawng byin lu na matu hte dai myit nyan atsam wunawng wuwa hpe, tang du ai hte dangdi lu ai atsam hpring tsup ai hku nna jai lang akyu jashawn chye ai lam gaw, awng padang a matu ra kadawn dik ai lam rai nga ai, nga nna ka da ai hpe bai hti shalai dat ai rai.
Crd : Malen Pyen U ( 2010 Yangon Buga Hpung Magazine ) .