Ramma Hte Woi Awn Ai Ladat ( Youth Program )

 

Ningbaw ai lam ngu tsun dat yang, yawng gaw tinang hte nseng ai ngu ntsa lam shadu da chye nga ga ai. Kaja wa nga yang ningbaw ai lam ngu ai gaw, shinggyim masha yawng hte seng nga ai, madung lam yen masa gaw, hkum ngau shagu madu a sak prat a matu, madu hkum nan woi awn lu na, ra ahkyak nga ai a majaw rai nga ai. kaja wa tatut magam hta mung, ya sha tsun ai madu hkum hpe madu woi awn lu ai lam gaw yak htum rai nga ai, ramma shagu woi awn ai lam hte seng nna, mahkrum madup kaji kajaw nga na rai nga ai.

Kaji ten gawdin ginsup ai shaloi bai laga ginsup hpan ni gasup ai shaloi hkan woi awn  na lit hpe jaw hkrum ai zawn, lit mung la ga na rai nga ai, dai zawn kaji la ai magam bungli ni kaw na, grau kaba ai magam lit ni de du hkra, ningbaw woi awn kaja nga na ra ahkyak la nga ai. dai zawn woi awn kaja ni nga yang she, awng dang wa lu na rai nga ai. Dai ni na nampu hpawt ni na ningbaw ningla ngu ai ga gaw grai nan lachyum rawng la nga ai, sak kaba wa nna, masha kaba tai wa ai hta, lam shagu hta, myit madang tsaw ai arawng lu ai wa byim tai yang she, nam chyim rawng wa lu na rai nga ai. prat hpe woi awn sa wa na ramma ni gaw, masha wa hta, baw langai  galoi mung jan taw nga yang she, ngyan marai, machye machyang ni grau rawng taw nga yang she, masha yawng hta, grau ai sak prat hpe gaw gap sa wa lu na rai nga ai, dai zawn sha, gara wuhpung, gara mung dan hpe yu yu, ningbaw kaja yang she, hpang hkan nang ai ni a sak prat pri nem tsawm htap wa lu na rai nga ai. Bai tsawra ai ramma ni ningbaw kaja ni hta nga gring ai npawt ra kadawn lam ni hpe mung tsun dan mayu ai. ningbaw ngu ai wa gaw,gwi gwi galaw ai lam hpe, myit ntsang ai wa, masha ni lawt ga tsun taw nga ai ten, galai shai ai lam hpe hkam la gwi ai wa, Ningbaw ngu ai wa gaw, myit tau chye ya ai hte, mara dat ya chye ai wa bai ningbaw ngu ai wa gaw, masha wa hpe lam madun lu ai wa, lam yan kaja de du hkra n gun jaw lu ai wa, ningbaw ngu ai wa gaw, lit la ai lam, lit hkam gwi ai lam hpring nga ai wa, ngu zawn re ni hte hpring ra nga ai.

Bai Myihtoi nyan law ai ningbaw ngu ai hta, ningbaw kaja langai gaw, myihtoi nyan machye machyang mung hpring tsup na ra ahkyak nga ai. tatut ya ten tinang a makau grupyin ni hta, gara lam yan ni gaw, masha ni myit shang sha taw nga ai kun, gara masa ni gaw, ramma ni a ntsa, lit kaji kawa byim shangun nga ai re, bai nna, tinang a mung dan hta, ramma ni gaw, kaning zawn re shara ni hta n gun lu nna, mungdan madan shagu hta aten hpe gara hku jai lang nga ai ngu ai lam ni hpe chye na da gring nga ai, anhte myen mung hta, ramma ni gaw, telephone hpe ban sa shara langai hku jai lang ai law nga ai, facebook kaw ga shaga na, sumla mara na, tinang gara du taw nga ai lam ni hpe chye shangun na, game ginsup na ndai zawn re lam yan ni hpe aten jaw ai lam 100 % 80 lahta ram nga nga ai, mungdan shagu ni hta gaw, shanhte a prat rawt jat wa lu na matu sharin hpan ni hpe  internet lam yan ni hte jai lang let hpaji la nga ma ai. Anhte myen mung dan hta gaw tsaw dep wa ai prat masa a dam hpe laja ai hku hkam ra na rai nga ai, dai hpe ningbaw tai ai ni gaw, gara hku lam madun woi awn na ngu ai mung ahkyak la nga sai re, dai hta tinang lam madun ra na ramma ni gaw, kaning re ai lam yen ni hta aten lahpawt lama byim taw ai rai, shanhte a ja gumhpraw ni hpe gara hku jai lang nga ai rai ngu hpe chye tawn da ra nga ai, akyu nnga ai shara, lahpawt lama byim na shara ni hta jai lang taw nga yang lam yen masa hpe tsun dan let, lam shading sharai ra nga ga ai, tinang a ramma ni hpe lam madun ya ai lam gaw mai kaja ai akyu ara galaw ai lam langai rai nga ai, dai hpe shinggyim masha ni yawng chye na da yag, lam madun na ningbaw kaja ni law htam wa na gaw teng sha rai nga ai.

Myit sawn lam kaja ai ningbaw ningla nkau ni gaw, shanhte hkawm sa shangun mayu ai lam hpe  ndum shami hta woi sa lu ai atsam ni nga nga ai, nkaja ai akyang lailen langai hpe kaja ai akyang langai hte  malai bang ya ai ladat langai mung rai nga ai, gara hpan mi raitim shawng nnan lang gaw galaw ai masan nsa nga ai, yak taw na sha rai nga ai ga shadawn  game ginsup ai lam hpe jahkring nna, laika hti ai lam ni hpe galaw shangun ai, shawng nnan game ginsup ai lam gaw myit shang sha ai, pyaw ai lam hpe hkam sha na rai nga ai, kaja wa nga yang  prat a matu, akyu nnga ai, mara ni sha law nga ai re ndai laika hti ai ngu ai hta gaw, shawng nnan lang gaw lagawn lamawn ai lam ni nga na re, raitim matut na hti u, gau ngwi ngwi myit shang sha wa na rai nga ai, pyaw wa ai lam ni hku hkam sha wa lu na rai nga ai, mai kaja ai magam bungli langai mi gaw, nnan daw yak ai raitim hpang daw de shaman ai law wa yang akyang langai hku tai wa na rai nga ai, hpang akang tai wa yang, ngalaw nmai ai madang du hkra byim wa na rai nga ai, dai rai yang ndai amu magam hta kung kyang wa na, bai akyu nga ai hkrai galoi mung galaw wa nna, sak prat mung galai shai rawt jat wa na gaw nshut rai nga ai, dai majaw kaja wa sak prat hta hkawm sa nga ai ten, ningbaw kaja ngu ai grai nan ahkyak la nga ai dai majaw ramma ni hku nna, tinang a sak prat hpe gaw sharawt u, hpang hkan nang kaja byim hkra shakut ra ai dai zawn hkan nang kaja byim yang she, du wa na ten ni hta ningbaw woi awn kaja byim wa lu na rai nga ai.

Htawm hpang de woi awn na ramma ni hku nna, ningmu dam lata na ra ahkyak shang lawm nga ai, dai ni mung dan a masa, shinggyim kanawn mazum lam, sut masa lam, hkam kaja lam, mungdan shagu na ramma ni hpa lam hta n gun law taw ai, gara shara ni hta, n gun da ting nga ai kun ngu zawn re ni hpe mung chye tawn da na ra nga ai. Ndai hta ga shadawn langai hte tsun mayu ai gaw, ramma ningbaw ni hku nna, mung dan kata laika dum ni, mungdan shagu na laika dum ni a lam ni hpe chye tawn da ra na ngu shadu mu mada ai, mungdan shagu hta, ndai laika ni ngu gaw shinggyim wuhpung wuhpawng ni hta gara hku akyu jaw ai, mung dan shagu hta laika yu hti ai hpaji ngu gaw gara hku ngu zawn re ni hpe chye da hka ja gring nga ai, raitim tinang a makau grup yin hta hkrang shapraw sa wa sana nga yang, shingra masa hpe  yu nna hkrang shapraw sa wa na ra nga ai.

Bai tsawra ai ramma ni ahkaw ahkawng ngu ai nga ai, rai yang ramma ni hku nna, ndai shara kaw myit yu mai nga ai, tinang hta gwi gwi galaw na atsam hpring taw yang shakut na ahkaw ahkang nga ai, ndai mung tinang kaw she madung rai nga ai. gwi gwi galaw ai ni yawng a matu, hkrat sum ai lam ni nga ai zawn, ahkaw ahkang ngu ai asi apu ni mung nga nga ai re, ra ai hku jai lang na ahkak nga ai, ya yawng a shawng hta tsap nga ai ni, awng dang nga ai ni yawng mung, nang ngai zawn sha ramma prat kaw na hpang wa ai ni chyu rai nga ai.dai zawn sha shanhte ni mung lai sai ten ni hta, shut ai lam ni nga chyalu rai nga ai, dai shut ai lam ni hpe mahkrum madup hku la rai mai kaja ai hku bai galaw let, awng dang nga ai ni rai nga ai.

Bai dai ni na ramma ni hku nna, tinang gaw gara shara gin lam hta shang lawm hkrang shapraw na rai ngu ai ahkyak wa nga ai, dai majaw ningbaw nbyim shi ai ten, hpa shawng byim na ra nga ai i nga yang, hkan nang kaja tai na ra ahkyak nga ai. hpa majaw nga yang, tinang gaw hpang hkan nang kaja ngalaw ga na gaw, ningbaw woi awn kaja tai na loi yak nga ai. tinang gaw bum ntsa na tsawm htum ai yu mada hpa langai nbyim shi yang, bum npu hta nga ai nam sum wum kata hta  tsawm htum byim hkra shakut u, dai rai yang she tinang gaw masha wa hta lak lai taw na rai nga ai

 

Ningbaw kaja hte, shawang myit ngu ai hpe yu yu yang mung, tinang galaw ai bungli shagu gaw, dai shawang myit  kaw na sa wa ai lam masha shagu myit sawn hkrup na rai nga ai, dai majaw hpa magam bungli mi galaw galaw shawang myit tawn da let, galaw yang gaw, asi apu nii hkam sha lu na teng sha rai nga ai,ndai shawang myit ngu ai hta mung, kaja ai shawang myit hte nkaja ai shawang myit ngu nna garan nga ai hpe mu lu nga ai ai majaw ramma ningbaw ni hku nna, gara lam yan ni hta mi rai rai kaja ai shawang myit tawn da let, magam bungli galaw ai lam ni gaw, mai kaja ai magam bungli galaw nga ai hte bung nga ai shawang myit hte maren, kam maka gaw akyu jaw nga ai ngu gam garan ya let.

#youth #rvakachinservice

 

 

 

 

 

 

 

Add new comment

1 + 0 =