Ramma Hte Prat A Mahtai ( Youth Program )

Ramma ten gaw, shinggyim prat a mangai ta hte ginhtawng ta lapran na kadun la ai ten ladaw hte bung nga ai, nga nna Wa Saradaw Kaba Fulton Sheen Tsun ai. Kaja wa mung rai nga ai. Ramma Prat ngu ai gaw, pu pu si si ai ten, ram ai ten, atsam marai rawng ai aten, manu dan ai ten ladaw nan rai nga ai. Shinggyim prat a mangai ta hte ginhtawng ta lapran kaw  du nga sai, anhte ramma ni yawng, tinang du nga ai, ndai ram dik ai ten hpe ,anhte  a prat, manu dan rawt jat galu kaba hkra, gara hku mahtai tam shakut shaja sak hkrung let, shawng  lam  prat hpe, tsawm wa lu na matu, gaw gap sa mat na ngu ai myit masa gaw, grai ahkrak nga ai.

Kanu kawa a shim lum ai makawp maga, yu lanu lahku, woi awn nga ai prat shawun kaw nna, byin dum. Kung dum let, ndum shami garan le wa magang sai prat re majaw, ramma langai rai wa magang sai ni, ndai mungkan a byim chye ai shingra tara hte shingra maka a mahkam hta, Pyen nnan sharin ai u kasha zawn, di hkrat hkrum na chyalu sha re hpe, tau hkrau nna, myit dum chye ra ai. Dai re majaw prat hpe, awng dang rawt jat galu kaba hkra, gaw gap sa wa lu na matu, prat a mahkrun ni hpe garan gachyan dat nngai.

Shawng nnan, ramma prat hta, ahkyak dik ai gaw, yaw shada ai pan dung madung langai mi nga nan nga ra ai. Moi kaji ten na zawn, prat a pandung hpe, langai hpang langai galai taw nmai sai. Pandung langai pyi, garai nlu madu shi ai sha, pandung law law hpe kalang ta, lu madu na matu, shakut tsam dat ai rai yang, dai pan dung gaw, tang du ging ai daram ndu ai sha, gara de mung nhkap nhkap, rai nna, lachyum npru ai prat, byim mat chye ai. Pan dung langai hpe lata la nna, dai lata awng sharawng myit majing hte shakut atsam dat , gaw sharawt la ra ai.

Dai tinang lata da sai pandung de, du lu na matu, galaw ang ai magam bungli, hpaji machye machyang ni yawng hpe, hka ja shakut ra ai. Dai tinang tawn da ai pan dung hpe, tinang a bawnu, myit nyan marai hta, ahkyak dik ngu nna, myit kri bang da ra ai.Byim mayu ai, chye mayu ai lam gaw, law law rai nga ai raitim, byim mai ai, chye mai ai madang gaw, anhte shinggyim masha ni hta, gip la nga ai. Tinang hte masan sa mai kaja ai pandung langai hpe, tawn da let, dai pandung kaw du lu hkra, shawng shakut shaja ra ai. Dai tinang a prat hta, ahkyak dik ai pandung hpe lu madu ngut ai hpang she, tinang madu la mayu ai pandung ni hpe langai hpang langai mai madu la ai.

Ramma prat hta, hpan shalat, sawn shalat kam ai myit masa kyang lai len hpe, gaw gap la ra nga ai. Ndai mungkan gaw, sawn shalat, hpan shalat, ai arung arai hte hpring zup nga ai mungkan re hpe, myit kraw kata hta bang da ra ai.Shinggyim masha ni a bawnu sawn dinglik lu ai nyan marai atsam ni hte gaw gap shatsawm jahtap, da ai mungkan rai nga ai. Dai re majaw, ramma ni a kraw dung salum hta, myit sawn hkap la da ra ai mabyim langai gaw, Ngai masha ni hte nbung hkra kaning re ai arung arai, myit nyan hpaji hpe, sawn shalat, hpan shalat lu na ngu ai, myit masa hpe,bang da ra ai. Sawn shalat hpan shalat mayu ai myit nga ai masha gaw, masha ni hta, dawn jan ai ni, bawnu nyan grau rawng ai ni tai lu nga ai. Sawn shalat hpan shalat chye ai a majaw shinggyim prat gaw, madang tsaw jat wa ai re hpe, dum shai let, shakut ra ai. Dai zawn sawn shalat, hpan shalat mayu ai myit masa nrawng ai rai yang, prat hta lu ai hpun, lu ai sha, ngu ai gahti gari madang hte prat hpe nga pra shalai kau mat na re hpe myit dum ga.

#crdu.k#youthprogram

#rvakachinservice.