Ramma Hte Nang Hpam Malu Masha ( Youth Program )

Ya na zawn rawt jat , galu kaba nga ai prat hta e, mungkan ting hta, nga ai ramma ni law malawng gaw, chyam mayu ai myit ni, ta tut galaw mayu ai myit ni, grai rawng chye ma ai. Tinang a kanu kawa, sara sarama ni gaw, tsa chyaru, salik, nang hpam malu masha ni hpe, nlu sha na matu, pat shingdang ai shaloi e, ramma law malawng hte gaw, shanhte ni nchye ai sha, nmu ai shara hkan e, lagu lagan galaw chye ma ai.

Asak a-prat ram ai ramma ni gaw, ramma rai wa sai hte maren, manaw manang ni law wa ai. Dai manaw manang ni hta na, manang n-kau myi gaw, nang hpam malu masha chyelu chye sha ai ni mung lawm chye ma ai.Manang ni hte pyaw poi ni galaw ai, party ni galaw ai hkan e, nam hpam lu sha mung, lang chye ma ai. Tsa chyaru, salik ni lu ai gaw, nang hpam lu sha lang chye ai a ning pawt rai nga ai. Ramma ni gaw, nang hpam malu masha langai ngai hpe maju jung mat sai rai  yang, dai hpe dawm kau na matu grai yak chye ma ai re.

Ramma law malawng gaw, nang hpam malu masha a mayam tai wa ai a ningpawt gaw, hpaji nchye ai a majaw hte, manaw manang a majaw, ni mung rai nga ai. Tsa chyaru, salik nam pat  4 lu sha chye lang ai ni gaw, tinang myit lawm ai majaw hten sa mat ai rai nga ai. Nkau myi tsun chye ma ai gaw, manaw manang  a majaw re ai nga tsun ma ai. Jaw ai daram gaw jaw ma ai. Raitim ning pawt gaw tinang sha re ai, tinang kam jang she lu ai baw re ai.

Dai ni na n-nan kaba wa ai ramma ni law malawng gaw, hpaji hpe htum hkra nlung shangut ai ramma  ni mung grai nga ma ai. Buga mare hkan e nga ai ramma ni gaw, asak aprat naw kaji ai kaw na jawng le mat ai ni law law nga ma ai. Jawng le nna, kan bau bungli ni gawlaw ai, ja gumhpraw ni tam chye ma ai. gumhpraw chye lang ai hte gaw, malu masha ni mung hkum wa sai. shan hte a matu tsa chyaru, salik ni chye lu ai gaw, arawng la hpa rai ai ngu chye myit ma ai. Tsa salilk lu chye ai kaw nna hpang jahtum gaw, nampat 4, ya ma ni du hkra chye lu chye wa ai. Dai hpang e gaw, nang hpam malu masha a mayam ni tai mat ma ai.

 Kun dinghku langai myi hta, nang hpam malu masha lu sha ai ramma langai myi nga ai rai yang gaw, dai kun dinghku hta ngwi pyaw simsa ai dinghku gara hku mung nlu nga ai. Nang hpam lu sha ai wa gaw, hpang jahtum, dinghku nta hta, nga ai arai ni hpe lagu dut sha ai madang du hkra rai wa ai. Nang hpam lu ai majaw, dai wa gaw, mungkan ga kaw pra ai, grai sum ai. Kanu kawa ni mung, shi hpe kam hpa lam ni yawm mat na. Bai nna wu hpung wu hpawng hkan, poi shingra hkan e, shi hpe sara njaw ai lam ni, kam hpa ai lam ni mung yawm mat na re.

Dai ni na ramma ni law malawng hte gaw, tinang a prat bandung shadaw n-nga ai majaw, dai hku sha nga len mat nna, hpang jahtum gaw, nang hpam lu sha ai ya ni rai mat ma ai. Bai nna ramma ni a prat hta, mayk mahkak lam ni, myit ru myit tsang ai lam ni hpe, lam amyu my hku pru lam ntam let, hpang jahtum nang hpam malu masha hte sha pru lam tam chye ma ai.

Ramma ni yawng, nang hpam lu sha ai a mayam kaw na lawt lu na matu gaw, ( 10 Awareness ngu ai tinang hkum tinang bai myit yu ra ai. Ngai ndai nang hpam lu sha lu ai gaw, nkaja ai nga myit rawng ai hte ( 2 ) Fault-self ngu ai tinang gaw nkaja ai lam de sa wa nga ai ngu ai hpe mu ra ai. ( 3 ) Acceptance ngu ai tinang gaw shut ai hpe mu ra ai. ( 4 ) Reflection ngu ai hpa majaw  ngu ai ga san ni san ra ai.Gara hku na ngai gaw kar ni ya tai wa ai kun ngu ai tinang hkum tinang bai myit sawn sum ru yu ra ai. ( 5 ) Decision ngu ai myit daw dan chye ra ai. Ngai ndai nang hpam malu masha lu ai gaw, nkaja ai, na wa jang nanghpam lu sha a mayam tai wa na ra ai. Dai majaw ngai ya kaw na gam ra sai ngu ai, myit daw dan ra ai. Ngai kar ni dawn ai tsi gawk hakn, tsi rung hkan sa dawn ra sai ngu ai, myit daw dan ra sai. Myit daw dan ai hte sha nhkum tsup shi nga ai. ( 6 ) Action ngu ai ta tut hkan galaw sa ra ai. Tinang myit daw dan ai hte maren hkan galaw jang she, nang hpam malu masha a mayam kaw na lawt lu na re.

Dai ni na aprat hta e, ataen hte maren rawt jat galu kaba nga ai majaw, ramma ni a matu hka ja la ra ai lam ni, law law nga ai. Tinang shakut ai hte maren, tinang a prat hta, rawt jat galu kaba ai lam ni law law lu ai ten hta, tinang a prat, wuhpung wuhpawng, kun dinghku hpe hkrat sum ya shangun ai, nang hpam malu masha hpe koi gam kau lu hkra, shakut ra ai. “ Dai ni na ramma, Dai ni na ningbaw ningla ’’ nga ai hte maren, ramma ni yawng shakut shaja, sharin hka- ja ra ai lam ni hpe, zet tsang kung hpan ai hte sharin hka-ja  la ra ai. Dai rai yang she shawng lam prat na ningbaw ningla kaja ni tai wa na re. Nang hpam malu masha hpe lu sha ai, rai yang gaw, ningbaw ningla kaja ni gara hku mung byim tai wa na nrai nga ai.

Dai majaw, ramma ngu ai gaw, galoi mung, zet tsang kunghpan nga ra ai.Tinang a shawng lam prat a matu, myit yaw shada ai bandung shadaw ni nga ra ai. Mayak mahkak lam ni, myit ru myit tsang lam ni yawng hpe, myit n-gun kaba hte, tawt lai kau nna, shawng lam prat a matu, pu tsawm ai ningbaw ningla kaja ni, tai wa hkra, shakut sa wa ga. Ramma ni a prat hta e, tinang a prat hpe shahten shaza ya ai nampat 4, tsa chyaru,salik ni hpe gam kau nna, tinang a kun dinghku, makau grupyin, wuhpung wuhpawng, hte  myu hte mungdan a matu kam hpa ging ai ramma ni tai wa u ga kyu hpyi ya let.    Crd. Shanlay ( Nan Hkaing ).

#youthprogram #rvakachinservice #aungnanmkn.