Ramma Hte Magam Bungli ( Youth Program )

Anhte shinggyim  masha ni, shara ra kaw du hkawm ai ten hta, nhkrum ai grai na nna, ya bai hkrum wa ai ten, jinghku shada da, manaw manang shada da hkrum ai hte, Kaja Nga Ai I? nga nna, ta shakram hkat chye nga ga ai. Grau nna, ramma manaw manang shada da rai yang, Jawng Ngut Sai I? … Hpa Galaw Nga Ai Law nga nna, matut san hkat chye nga ga ai re. Dai ten: tinang gaw, hpa magam bungli mung nlu, ngalaw nga ai ten rai yang, Myiman kaji hkrum chye nga ga ai re.

Shinggyim masha langai a matu, sut masa lam mi rai rai, asuya magam bungli  mi rai rai, magam bungli langai ngai galaw na, lu tawn da ai gaw, tinang a sari shadang hte magam lit hpe, matsun madun ai lam rai nga ai. Dai rai nna, kaja nan magam bungli galaw na mung ra ahkrak dik rai nga ai. Mungkan ntsa sak hkurng nga ai ni gaw, bungli lama ma gawlaw nna she, tam lu tam sha nga ai ni hkrai rai nga ai. Moi karai kasang Adam hpe, Nang si ai ten du hkra, na a salu salat hte tam sha ra na rit dai nga nna, ga ndat da ai hte maren, anhte a sak hkrung lu na ahkrak dik malu masha a matu gaw, kan bau magam bungli galaw shakut ra ai lam nna rai nga ai. Dai rai nna, asak naw ram ai ramma ni, kanu kawa ni hpe bai nhtang bau na, anhte a lit nan rai nga ai re. Pru mat wa ai laika hta, karai kasang gaw Mawshe hpe ga ndat da ai. Bat mi hta na 6 ya tup gaw, bungli galaw shakut na matu jaw da ya sai. Ya dai ni anhte a prat hta, lani mi Naryii Hkum 8 bungli galaw ra sai re. Tsawra ai Ramma ni madu yesu shinggyim hkum hku, sak hkrung nga ai ten, magam bungli lam amyu myu, sasana majen je ai, shara shagu krai mungga shachyam shabra ai, machyi masha ni hpe shamai ai, Shadum jahprang, n-gun jaw ai magam law law, galaw lai wa sai. Hpang jahtum anhte shinggyim masha ni a shut hpyit mara a matu asak si hkrum ai ten du hkra, shakut wa sai re. Bai shinggyim masha nkau ni, bungli nkam galaw nna, magam bungli galaw ai uhpung ni hte kap sha nga ai ni mung naw nga nga ai re. Dai re majaw, kasa paulu gaw “ Bungli  n-galaw ai wa Shat hkum sha ” nga nna, tsun shadum da nga ai . Dai re majaw dai ni anhte ramma ni mung, sak naw ram ai ten kaw na, myitsu myit kawp let, shakut sa wa ga. Magam bungli lata nna, bungli n-galaw ga. Nkau mi gaw shata shabrai nlaw ai, anhte chye da ai hpaji hte n-ging ai nga nna, nkam galaw ai ni mung law law rai nga ai.

Nawku hpung ra kadawn nga ai magam hta mung, garum shingtau na matu saw shaga garum hpyi yang, shata shabrai nlu na re, nga nna, shang lawm ai lam mung nnga ai, shata shabrai law lu ai she tam na nga nna, lagawm mat ai ni, dai zawn rai, na wa magang, bungli galaw mayu ai myit mung zim mat wa magang rai wa nna, hkrat sum mat ai ramma ni law law nga ai hpe mung mu lu nga ai. Slg Willian Hold ngu ai wa tsun ai hta, magam bungli a matu kaja dik ai hku lajang shachyip ai gaw, Bungli lam hpe myit sawn taw nga ai lam rai nna, Bungli hpe sha maram yu taw nga ai mung nre, Bungli lam tsun shaga chyai ai mung nrai, Magam bungli galaw shakut ai lam she re nga nna, tsun da nga ai. Dai majaw anhte ramma ni bungli langai hpe galaw sana nga yang, naw maram yu nga ai zawn, galaw na zawn nkam galaw ai zawn, rai ahkying shama, bungli gaw nbyim re ai ni mung law law nga ai hpe mu lu nga ai. Hpang jahtum bungli gaw nlu, majoi wam dam nga nna, nhkru nkaja ai manang hte hkrum nna, tsa ya, kani ya sha byim mat ai ,bai nkau mi gaw kaning re ai bungli mi rai rai, Asuya hte Karai Kasang hte nhtan shai ai mgam bungli nrai jang rai sai nga nna, hta galaw dat ai ni mung nga ai. Dai hpang magam bungli mahkrun kaja mu mada wa nna, gau ngwi ngwi awng dang wa ai. Dai hta Kalu Kaba wa ai ni nga  ai hpe mung mu lu nga ai. Mai gan Myit sawn hpaji ninghkring wa tsun ai hta, magam bungli ngu ai gaw.1. lagawn lamawn ai 2. Nhkru nkaja ai mgam bunli hte 3. Matsan mayen ai ngu ai ai ndai ni hpe ninghkap kau lu ai lam re nga nna tsun da nga ai hpe mu lu ai. Tsawra ai Ramma ni ndai lam masum hpe ninghkap kau lu na, koi gam kau lu na matu magam bungli  nan ria nga ai

Magam bungli hte seng ai lam yan nga ai dia ni gaw 1. Magam bungli hpe awng dang hkra kaja lam hku galaw shakut ga.2. Magam bungli hpe manu shadan nna, galaw sa wa ga .3. Magam bungli galaw shakut ai a marang e prat a matu, awng dang lam hte, sari makawp maka lam hpe gaw sharawt nga ga ngu ai ni rai nga ai. Tsawra ai Ramma ni ndai lam 3 hpe madung da nna, magam bungli ni galaw shakut sa wa ga. Dai rai yang anhte marai hkum shagu, awng dang lam lu la na re ngu n-gun jaw dat nngai law.

#youth

#rvakachinservice