Ramma Hte Lata Dat Ai Lam ( Youth Program )

Ramma shagu gaw, shangai ngut ai ten kaw na, sak si ai ten du hkra, kaji la ai magam bungli kaw na, prat magam hte seng ai lam yan ni du hkra shani shagu, lata ra ai lam ni law law hte hkrum katut wa nga ai. tinang a ra lata dat ai lam a ntsa hta madung da let, kaja ai, nkaja ai lam ni hpe akyu hkam sha nga ga ai re. Dai majaw kaji la ai magam bungli kaw na prat hte seng ai magam lam yan du hkra lam shagu a matu, myit sawn sumru yu let, nshut na matu ahkyak kaba rai nga ga ai.

Ramma ni a matu, prat magam hta hkawm sa ai hkrum lam ni hta, hpaji lam, magam bungli lata ai lam ni hte seng nna ndai lamang hta gam garan ya mayu ai. Hpaji hka ja sharin nga ai ramma ni gaw, tsang shi awng ai ten hta, matut sharin lung mayu ai sharin hpan ni, dakkasu ni hpe lata ra nga ga ai, dai zawn lata ra ai ten hta, teng man jaw manu dik ai lata ai lam ni gaw tsa hta shadang yawm na ngu shadu mu mada ai, Jaw ai lata ai lam ngu ai gaw, makau grupyin ni shing nrai, tinang hkum nan, arang lu ai, shang gumhpraw kaja ai ngu zawn re myit sawn lam magam bungli ni hpe gaw ntsun lu ai. tinang sak hkrung lam, tinang kaja wa myit lawm myit shang sha ai magam bungli ni hpe jaw jaw lata lu ai lam hpe tsun mayu ai rai nga ai. Hpa majaw nga yang, tsang shi awng ai ten ni hta gaw, madu hkum nan daw dan lu ai atsam nau n nga shi ai sha n ga, makau grupyin, dum nta ni a shingwan kata kaw na sha law malawng lata chye nga ga ai., kalang lang tinang hkum nan hpa pyi nchye dat ai sha lata hkrup ai ni mung law law rai nga shi ai Bai dakkasu ngut ai hpang mung magam bungli dap kata shang na matu kalang bai lata ra nga ga ai re.Tsang shi awng ngut ai hpang jaw jaw lata lu dat ai ni gaw, magam bungli shang na aten ni hta  tinang a yaw shada da ai pan dung de tsaw tsaw lahkam lu na matu sha ra kadawn nga ga ai ,jaw ai hku lata lu ai lam nnga ai ni a matu  lahkawng lang numdaw hku lata dat na ahkaw ahkang mung ra ahkang shang lawm nga ai, tinang sharin hkam la lu sai hpaji hte kan bau magam galaw na kun? ( sh) tinang myit lawm ai magam bungli hpe sha lata na kun?  ngu ai hpe, ten la nna sum ru daw dan ra na ahkyak ai.Sharin hkam la sai hpaji hpan hte  matut magam bungli shang mayu ai nga yang mung, kaja wa jai lang lu na madang langai du hkra matut hka ja shakut ra nga ga ai, Raitim tinang myit lawm myit shang sha ai lam, nre ai sha, ja gumhpraw a myiman hpe sha yu let, lata dat yang, magam bungli ngu ai gaw, sak prat hte rau galoi mung nga nga na re majaw, hkrum katut wa na mayak mahkak lam ni hpe dang manga hkam jan lu ai lam n nga ai sha, hkawm sa yang, lam dam mat wa chye ai hpe sadi maja ga ngu ndai shara kaw madi madun ya mayu nngai law.. Tinang myit lawm ai magam bungli hpe lata sa wa na nga yang mung, dakkasu jawng ni hta, arang bang da ai aten ni, ja gumhpraw ni hpe myit sawn ra na re, dai sha n ga, magam bungli langai hta, npawt madung hkrak rai na matu, yawm htum 3 ning ram sha gaw aten la ra na re majaw, kahtap arang bang da ra na aten ni, ja gumhpraw shadawn shadang ni hpe mung, jat bang myit sawn ra na ngu ndai shara kaw shadu ai. Lama wa kahtap shut ai lam nga yang aten grai kadun mat wa na rai nga ai. Ya ten shut ai lam nga mat yang, htum mat lai mat wa sai ten ni gaw bai kahtap nlu mat sai rai nga ai. Bai tsawra ai ramma ni, Asak 30 ning jan wa maga du hkra, sak prat gaw, npri nem shi nna, dinghku nlu gaw de shi ai nga yang mung, mungkan ga ntsa kaw bai du sa na kashu kasha ni a matu, bai myit yu na ra nga sai re. Hpa majaw nga yang, Kanu Kawa hte, Kashu Kasha lapran grai gang mat yang, generation gap mat chye nga ai re.Kanu Kawa ni gaw, kashu kasha ni hpe arang shaw ya ai lam hte sha, Awng dang ai lam hpe njaw ya lu nga ai majaw, kashu kasha ni hkawm sa mayu ai sak prat hkrun lam hpe lam madun ya lu yang chyu sha, awng dang ai lam hpe jaw ya lu na rai nga ai, Dai majaw Kanu Kawa gaw Kashu Kasha ni a prat hpe hkan dep lu hkra shakut ra nga ai dai majaw tsawra ai ramma ni aten ngu ai hpe, akyu nga nga jai lang let teng man jaw jaw lata lu na ahkyak la nga ai.

Bai magam dap shang ai ten ni hta, shani shagu mayak amyu myu hpe, hkrum sha wa na gaw teng sha rai nga ai, Dai mayak ni hte hkrum katut wa ai shaloi, lata dat ai lam hta jaw ai wa, myit lawm ai lam hpe lata jaw dat ai wa gaw, apyaw sha lu lawt lai lu na rai nga tim, sharawng ai lam hte bungpre ai lam nnga ai sha lata hkrup ai ni gaw, tsun ga nga yang, lata ai lam shut mat ai ni gaw, hkrum katut ai mayak kaji ni sha raitim,  kaba ai mang hkang zawn gadau chye nga ga ai. Ja gumhpraw law law lu taw tim, magam bungli a mayak ni hpe hkam jan lu ai lam nnga ai sha, n gun dat ai lam ni yawm wa chye nga ga ai. Magam bungli a ntsa myit shang sha ai lam nnga ai sha, tit la ai daw ram sha galaw shakut nga yang, shata htum ai lam hpe sha hti yu let, shata shabrai hpe sha ala taw nga yang, awng dang ai lam hte, tsan mat wa nna, shaning law law na hkra sak prat hta awng dang wa lu na nrai nga ai. Magam bungli hpe kaja wa myit shang sha ai wa gaw, ten hte hkrak magam bungli a lam hpe myit yu let, gin shalat nga ai majaw, awng dang na lam lu na grai ni na rai nga ai, tsun mayu ai gaw, tinang lata dat ai magam bungli hpe kaja wa tsawra ra ai, raitim, kalang lang madu hkum nan hpa byim mayu ai re hpe nchye ai mung mang hkang langai mi rai nga ia, hpang langai gaw, madu hkum a myit majin hpe nmu mada nna, ni nawn ai makau grupyin ni hta, gaup da ai lam ni hpe tinang a ra sharawng ai lam ngu shadu kau chye nga ga ai, magam bungli langai hpe lata ai ten hta, dai lam masa ni hpe  koi gam nna, teng man ra sharawng ai lam hpe lata lu na matu, madu hkum nan jaw jaw dinglik yu chye na madung rai nga ai, dai majaw, magam dap de shang sana ramma shagu yawng, ra sharawng ai lam hte sak prat bungpre wa nna, myit lawm ai magam bungli shara hta aten hpe lai ladat jaw jaw masat nna awng dang ai lam hpe lu la mu ga ngu yaw shada let.

#youth

#rvakachinservice