Ramma Hte Laili Laika ( Youth Program )

Ya prat na ramma ni gaw, htawm hpang a matu, mungdan, amyu sha, buga ginra mai kaja lam a matu, lahpa galai lit magam hpe gun hpai na, mungdan a ningbaw ningla ni rai nga ai. dai majaw ya na ramma ni a prat gaw, grai nan ahkyak la nga ai hte gawn lajang bau maka ya na ahkyak la nga ai re. dai hta madung ahkyak lareng ni gaw, kun dinghku langai a, shingyim nga sa lam madang shingdaw ai hta, dai kun dinghku hta, ja gumhpraw, arung arai, sutlu sutsu lam, myit dam lada ai lam ni hta, shanhte a nta kata laika dum tawn da ai lam hte, nta masha ni a, lai ka hti ai lam hta myit shang sha lam, hpaji tsaw ai lam ni gaw madung rai nga ai ngu mu mada nga ma ai.

Ndai ja gumhpraw, arung arai ni gaw, tara lam masa hku mi rai rai,ntara ai hku mi rai rai, gam maka akyu a majaw mi rai rai, shakut shaja ai a majaw mi rai rai, tam mahkawng mai nga ai, dai zawn sha, mungdan langai a bawng ring rawt jat masa hte shing daw kasi masa gaw arung arai hpring tsup lam, lamu ga npu ntsa nhprang sut rai hpring tsup lam, shingra tara hpun kawa madu ai lam, sut masa galaw shakut ai lam hte, hpyen hte seng ai jak rung ni madu ai lam ni a ntsa madung da ai lam nrai ai sha, dai mungdan kata hta, shingnu nga ai mung chying sha ni a, hpahi chye chyang kung hpan ai lam laika sawk hti bawng ring lam ni gaw madung npawt rai nga ai hpe mu lu nga ai laika hpaji tsaw nna, machye machyang  bawng ring rawt jat yang chyu sha laga hpan myu hkum hkra hta, bawng ring wa na rai nga ai dai majaw, hpaji tsaw wa na lam gaw, madung ahkyak ai shara kaw shang lawm nga ai re.

Htawm hpang na mungdan bawng ring rawt jat wa na lam hte, ngang gring wa na lam gaw, htawm hpang na mungdan magam lit ni hpe gun bai na dai ni na nang ngai ramma ni a ntsa madung rai nga ai hpe mung shadum n gun jaw mayu ai. dai ni na nang ngai ramma ni hpaji madang tsaw nna, laili laika hte galoi mung hkra taw nga ai hte, lam yan jaw jaw, hkawm sa yang chyu sha, mungdan ngwi pyaw simsa wa lu na teng sha rai nga ai law. aten nga shagu marai dat ra ai lam hte seng nna tsun ga nga yang, aten ngu ai hte maren sha, hkaja shakut lu ai atsam mai kaja htum aten, hti ai ngyan, matsing ngyan a mai kaja htum aten hte, hti hka ja la ai lam ni yawng hpe, tatut hkrang shapraw jai lang na mai kaja htum sak prat gaw ramma prat nan rai nga ai.

Dai ramma prat gaw, tinang a makau grupyin hta nga ai lam ni, na hte na ai nsen ni, myi hte mu lu ai mu mada lam ni yawng hpe hka ja sawk shagawn nga ai sak prat rai nna, dai sak prat gaw, manu dawdan nlu nna, sak prat ting hpe galai shai ya lu ai, ndai laili laika hte matut manoi lu dat ai ni gaw, htawnm hpang ptat a matu, shinglum lam hpe jaw ya lu na rai nga ai.. dai hku nrai ai sha hkrup katut ai ningmu ni hte sha kam galaw ai hpe galaw rai yang, jahkring na matu pri nem ai lam hpe hkam sha taw nga yang gaw, myit malai lu taw nga na teng sha rai nga ai, myit malai ai ngu ai lam gaw hpang de she rai nga ai. dai majaw ramma sak ram ten a matu, ahkaw ahkang kaja ai ahkying aten ni hpe hkam jan lu nna, kaja ai nkaja ai hpe sawn yu ding lik yu nna lata chye lu na matu, laili laika hpe sawk hti hka ja ga ngu n gun jaw mayu ai.

Myu sha langai ngang ngang lu tsap lu na matu gaw, laili laika hpe yu kaji taw nga yang, hpung tang hpaji ni hpe yu kaji nga taw yang, shingni lam hpe yu kaji nga yang, sak prat hpe yu kaji taw nga yang, shawang tsawra myit hpe yu kaji taw nga yang, ja gumhpraw a hpang chyu hkang nang nga yang, dai amyu sha gaw, ngang ngang tsap lu na matu hte, madu myu sha a lai htung arawn alai ni, labau ni hpe,laili laika hti ai hku nna, hting hkang mai nga ai, anhte shinggyim masha ni a sak prat hta shinglum dik tsi mawan mung, ndai  laili laika hte, sawk hti ai lam rai nga ai. dai majaw, laili laika gaw shinggyim masha ni a matu, mai kaja dik jinghku kaja rai nga ai lam  chye chaylu rai nga ai.

Mu ai laika buk ni hpe hti ra ai....dai majaw sak ram ramma ni hku nna, laika a manu hte lachyum nam nak akyu chyeju ni hpe hkum dek hkam sha lu na matu hte, mung daw hte amyu sha bawng ring rawt jat wa lu na matu, laika law law hti ra nga ga ai. mu ai laika hpe hti ga, kahtap nna bai hti hti rai ga, dai zawn hti ai lang law wa yang she, laika kaja lata hti chye wa na rai nga ai. laika chye hti wa yang she, laika hti ai akyang lu wa ai sha n ga, matsing hpa ni, hkan nang hkan sa ra ai lam ni, mahkrum madup ni, koi gam ra ai lam ni hpe matsing chye wa lu na rai nga ai, shinggyim masha hpe myit gaw up hkang ai myit hpe gaw, ngyan hpaji gaw up hkang ai ngyan marai hpe gaw, machye machyang hku nna up hkang ai  dai majaw, machye machyang lu na matu, laili laika hpan amyu myu hpe hti ga ngu ramma ni hpe ga saw dat mayu ai.

Bai tsawra ai ramma kanau sha ni, laika hti ai wa she rat jat galu kaba wa na rai nga ai. dai ni na ramma ni gaw, htawm hpang myit mada shara pu tsawm ai nam pan ni, shata shagan ni, tsit tsawm na hpun ni ria nga ai. tu kaba bawng ring wa nna, masha law law a shingbyi shara shingnip, asi apu hte, malu sha kaja ni htuk shapraw lu na matu, hpun bawng ban kaw na hpang let, nli kaja, nam hpun kaja hte hka kaja, nbung kaja ni hte rau kaba wa na ra hkrak nga ai,

Dai majaw, sak ram ramma prat hta, laika law law hti ra nga ai, hpawt de ngu ai gaw nchye tsun ai ten rai nga ai majaw ten nga shagu, hti na matu myi kaja nga dingsa, matsing ngyan kaja nga ai ten, hkum hkrang zet let ai ten, laili laika hte nhka ai sha  lu tawn da ai aten, ahkaw ahkang ni hpe hti hka ja sum hting let akyu nga ai hku jai lang chye ga ngu  n gun jaw shadum mayu ai. Laika hti ai amyu ni gaw, rawt jat wa nna, rawt jat ai amyu ni gaw, laika hti ma ai nga nna tsun ai hte maren, laika hti ai a marang e mungkan hte shingdaw nna, hkan dep wa ai mung rai nga ai, ramma ngu ai gaw, mungdan langai a myit mada shara rai nga ai, anhte a mungdaw mungdan hpe,  htawm hpang ngu ai hpe, machye machyang hpring ai ramma ni hte gaw gap ai rai yang, mungkan madang hte shingdaw lu na teng sha rai nga ai hte, masha shagu laili laika hte nhka ai sha, laili laika hte galoi mung manoi hka ja let, ntsin htawng hpe ninghtoi tai ya lu mu ga ngu yaw shada  n gun jaw dat let, 

#youth

#rvakachinservice