Ramma Hte, Kanawn Mazum Lam Machye Machyang

Ramma Hte, Kanawn Mazum Lam Machye Machyang

Magam dap bungli shang ai shaloi tinang gaw hpaji maga hard skill maga de kade mi ningtawn taw tim, kanawn mazum ai lam nkaja na soft skill ngu ai maga kaw ningra lam nga yang hkrat sum na matu law nga ai, aten na na kadai mung lata gin dun galaw lu na nrai nga ai, magam dap hta mung pri nem lam nnga shinggan du taw nga chye ai hpe shang nnan e shadum ya mayu ai.

Shinggyim nga sa lam sak prat hta sha n ga, jawng ma prat ni hta mung, bai magam bungli dap de shang ai shaloi mi raitim, ahkyak ai lam yan langai gaw, shinggyim kanawn mazum ai machye machyang hpaji rai nga ai hpe mu mada lu ai. Hard skill ngu ai gaw, hpaji hparat gawng shingyan hte seng ai kung kyang ai lam rai nga ai, Soft Skill ngu ai gaw, nkau masha ni hta, hkritung kaw na lawm wa ai atsam marai rai nna, nkau mi gaw madu hkum madu galai shai nna she lu la mai ai baw rai nga ai.

Masha law law hte pri nem rap ra hkra chye nga ai lam, bawng ban jahkrum chye ai lam, ningbaw woi awn chye ai lam ni zawn re ni gaw, Soft Skill rai nga ai, Magam dap de shang ai shaloi, tinang gaw ya sha tsun lai wa ai hard skill maga de kade mi ning tawn taw nga ai raitim, Soft skill ngu ai shinggyim kanawn mazum lam hta n gun yawm taw yang gawm hkrat sum na law nga ai sha n ga, shaning galu kadai mung gin dun galaw sa wa na nrai nga ai, bai magam dap ni hta mung, masan nsa shingdu tawn da ai hpe hkrum sha chye nga ga ai. Ndai zawn akyang lailen ni hpe, dakkasu jawng ma prat ten kaw na, hka ja da yang she, magam dap de shang ai shaloi mayak nlaw ai sha pri nem ai hte awng dang ai lam lu la na rai nga ai. Jawngma wa gaw, laika sha galaw na, laga lam myit shang sha ai lam ni nmai nga ai ngu ai hkam la myit sawn ai lam ni mung shut nga ai re.

Roll no 1 ni gaw awng dang ai ni rai yang rai nga, raitimung awng dang ai ni shagu Roll 1 chyu nrai nga ai, pu kan magam bungli hpaji lam ( Hard Skill ) ngu ai hpe hka ja shakut le sharin hkam la na ra ai zawn maga mi de ( Sofr Skill ) ngu ai maga de mung hka ja shakut gring nga ai re Inteligent Quotient ( I O ) kade kaja kaja Emotional Quotient ( EQ) nnga yang gaw ya na prat masa hta ngang ngang shang tsap lu na gaw yak la nga na re hpe tsawra ai ramma ni mung dum chye chyalu sha rai nga ai, dai majaw sha, dakkasu jawng lung nga ai ten kaw na hka ja shakut na matu, ra kadawn nga ai, tinang a pawt sin dawng chye ai lam ni hpe hting hkang chye na matu, myit hkam sha lam ni hpe hkan nna ngalaw ai sha, tingkyeng a matu nmyit na matu grai nan ahkyak la nga ga ai, law malawng gaw, jawng kaw nga yang, tinang a manang ni hte sha, ganawn mazum ai lam hpe galaw nna laga manang ni hpe nchye ai zanw sha nga chey ai ni law nga ai, ndai gaw kaja ai akyang lailen nrai nna, masha shagu hte hku hkau lam lu hkra galaw shakut chye ra nga ga ai hpe shadum ya mayu ai. Bai tsawra ai ramma ni jinghku manaw manang ngu ai shara hta kaja ai manang ni hte hkrum chye ai zawn, nkaja ai manang ni hte mung hkrum chye nga ga ai. Manaw manang kaja hte hkrum ai shaloi gaw, tinang a matu mung, mai kaja ai lam ni hte hkrum katut chye ai zawn, nkaja ai manaw manang ni hte hkrum wa ai shaloi mung shanhte hpe mai kaja ai mamu magam de gayin wa lu hkra  galai shai ya na nang kaw lit nga ai hpe myit dum ra nga ai. Dai hte maren kaja ai nkaja ai ngu ai hpe gin hka chye na matu, laika law law hti ra nga ai, ya ten hta nga yang, internet laika man ni hkan mung machye machyang hkum sum hpa hpe hka ja mai nga saga ai majaw, dep hkap ai made hka ja shakut nga ngu na mung n gun jaw mayu ai. Manaw manang nkaja ai majaw mung hten  ai ngu ai ga hkum hpe mung na ga na ni law na re, ramma ni a hpan langai gaw, lam shagu hpe hkaja chyam mayu ai re, dai ten hta, nkaja ai ngu hpe chye nga ninglen tinang hkum nan n galaw hkrup na matu , alak mi shadum n gun jaw mayu ai.

Bai nna kun dinghku a kam hpa gring ai masha byim mayu ai rai yang, nkaja ai lam yan ni hpe n galaw hkrup hkra sadi maja nga sa ra ai re manang wa hpe mai kaja ai lam de woi awn sa lu ai wa byim hkra mung shakut ra ai, bai dang di dang dep ai maga ra kadawn nga ai ni hpe garum shingtau chye na mung ra ahkayk shang lawm nga ai. manang wa tinang a ntsa kaja ai raitim nkaja ai raitim masha shagu a matu tinang gaw jinghku kaja tai lu hkra sak hkrung hkawm sa ra nga ga ai, dai hte maren, masha ngu ai gaw tinang hkrai nga mai ai lam nrai nga ai , dai majaw wuhpung wuhpawng ni hte nga wa ra ai shaloi pri nem htuk manu hkra nga chye na matu ra ahkyak la nga ai, masha a myit ngu ai gaw, ding yang nrai nga ai, pyaw ai ten ni nga ai zawn, yawn ai ten ni mung nga ai, zet tsang ai ten nga ai zawn myit daw ai ten ni mung nga ai ndai lam ni ma hkra hpe chye na da ra na mung madung ahkyak rai nga ai. Bai masha langai hpe ntsa lam yu nna, nmai daw dan kau nga ai. Madu hkum hpe shagrit shanem chye ra ai sha n ga, shakawng shakat re ai lam hpe mung masha law malawng ni nra sharawng nga ma ai re. bai tsun shaga ai shaloi mung si mani hkra tsun shaga chye ra ai.

Bai tsawra ai ramma kanau sha ni, ga san ni hpe san na hkum hkrit, san ai lam nga yang she, mahtai ngu ai nga ai rai nga ai, bai lung taw nga ai jawng sharin dabang ni hkan mung, Presentation galaw shangun yang, masha law law a shawng hta tsun shaga ra ai lam ni hpe nmai hkrit gaya ai, dai zawn byim nga yang mung, ndai lam hpe kahtap kahtap galaw ya ai a marang e hkrit ai lam ni hpe tawt lai lu nga ai re. jawng kaw mi rai rai, shinggan kaw mi rai rai mang hkang langai byim yang, kade a majaw byim ai ngu layung madun mara shagun na malai, hpa majaw byim ai gara hku hparan ra ai ngu ai mahtai hpe tam na ra nga ai, dai hta tinang hta grau kung kyang ai ni hte bawng ban jahkrum nga ra nga ai ngu shadut n gun jaw mayu ai. bai ahkyak dik ai gaw, Ningbaw langai a myit masa hpe gin shalat la ra nga ai. Ningbaw byim wa na wa gaw, jawng lung nga ai aten laman hta chye lu nga ai, anhte manaw manang shada da kaw pyi ningbaw ai wa ngu ai nga nga chye ai rai nga ai. shi hkum shi ningbaw ai wa ngu ntsun ai sha, masha law malawng maga masat shagrin jaw ai lam ni rai nga ai, langai ngai nga yang dai wa hpe sha kam mayu, jahkrum mayu ai lam ni, mang hkang hparan lu ai  akyang nga na, tinang hta sara kaja, jinghku kaja, manaw manang kaja ni law law nga ai rai yang, jawng ngut mat nna, magam bungli galaw shakut nga ai ten, matut mahkai kaja ni byim wa nna, tinang a matu madi shadaw ya lu ai manang kaja ni byim wa na rai nga ai, dai kaw na awng dang ai masan sa ai sak prat hpe lu madu na rai nga ai ngu gam garan ya let lamang hpe ndai kaw naw jahkring sai law.

#youth

#rvakachinservice