Prat Tup Ngang Grin Lu Ai Kun Dinghku Byin Tai Na Matu

Tsawra hkungga kun dinghku kanu kawa ni moi shawng de gaw kun dinghku de ai ngu ai gaw gram lajang na yak lam re ngu hkap la da nna hka na garan na ngu ai gaw myit hpe nmyit yu ai lam ni rai nga ai.Raitim ya dai ni na ten hta gaw kade mi madang tsaw wa sai nga tim anhte kadai mung tinang a kun dinghku hpe nkam jahka ni hkrai rai nga na ga ai.Moi shawng de na daram tinggyeng kam lam nja sai ai raitim tinang a kun dinghku hpe gaw ngang grin shangun mayu ai,ngwi pyaw ai kun dinghku hpe ra sharawng ai ni hkrai rai nga ai.

Dai re majaw kaning re ai prat hta mi du du kun dinghku hpe ngang grin shangun lu ai masa lam nkau ni hpe tsun dan mayu nngai.Tsawra hkungga ai kun dinghku kanu kawa ni e shawng nnan ahkyak ai gaw hpa masa lam hta raitim tinang a kun dinghku hpe ningshawng shara hta tawn da ra ai.Anhte a kun dinghku ngwi pyaw na matu nga yang tinang kun dinghku lam hta grau nna kaga lam ni hpe ningshawng jaw ai lam hpe koi gam ra ai.Pyaw hpa lam ni,shinggan manang ni kanawn mazum lam hte kaga ahkyak ai lam nre kaw hkan ningshawng jaw taw nga ai rai yang kun dinghku gaw ngwi pyaw lam lu na nrai nga ai.Htum hkra tsun ga nga yang gaw bungli hte hpaga dingga lam ni gaw ahkyak ai lam ni rai nga raitim tinang kun dinghku hpe ningshawng njaw sai nga jang tinang kaw nna dinghku hpe galoi mung ngang grin ai hku hting hkang na ngu ai gaw yak hkak wa chye nga ai.

Anhte madu jan madu wa lahkawng galoi mung ningdang ga law hkat ai masa lam langai langai hpe matsing da nna koi yen na matu mung ahkyak nga ai.Anhte kun dinghku shagu hta nhpri nem ai lam ni,ningdang galang nga hkat ra ai lam ni gaw nga ja lu sha rai nga ai.Ndai zawn ningdang hkat  ga law hkat ai ten ni hta langai wa hkrai asum jaw shayawm ai lam,langai wa hkrai dang la ai lam ni mung nbyin gring nga ai.Madu jan madu wa lahkawng maga shada da chye hkat na matu ahkyak nga ai.Dai majaw langai hte langai ningdang ga law hkat ai lam ni hpe matsing da nna dai lam hpe ntsun hkrup hkra sadi ra nga ai.Bai masum ngu na lam gaw n kaja ai ningmu hku mu mada chye ai lam hpe mai byin ai daram shayawm mat na mung ahkyak nga ai re.

Anhte kun dinghku ngu ai gaw tsun ga nga yang nbung ai jasam lahkawng rau jawm pawng nga ai re majaw lahkawng yan a kaja ai lam ni hte nkaja ai lam ni hpe hkap la ra na ga ai.Tinang a ningrum a kaja ai lam hpe mu chye hkra nshakut ding sa gaw n kaja ai lam ni hpe sha mu nga ninglen gaw anhte kun dinghku mung ten galu ngang grin ngu ai gaw nloi ai zawn madu jan madu war au nga ai ten mung nga pyaw na nrai nga ai.Bai mali ngu na hta gaw anhte kade mi pawt tim Nang Ngai ngu ga si jai lang nna ntsun ga.Anhte Madu jan Madu way an gaw tsawra ai majaw mi la hkat ai mi rai rai,kaning re ai masa lam hku nna mi la hkat ai mi rai rai kun dinghku langai madu jan madu wa ngu byin wa sai kaw nna gaw langai hte langai hkungga la ra hte kanawn mazum na ahkyak nga ai.

Dai majaw anhte madu jan madu wa shada da kade mi pawt taw ai raitim Nang Ngai ntsun hkat ai sha hkungga la ra hte tsun shaga hkat na grai ahkyak nga ai.Dai rai yang she anhte a kun dinghku gaw ten galu ngang grin na rai nga ai.

By : John Mung Hkrang