Prat a Tsinyam Hpe Rau Sha Da kan shakut Ra Ai

          Anhte Kun Dinghku dum nta masha shada da hkungga manu shadan let tsawra shawang myit ni hte kanawn tsun shaga nga ai kun dinghku gaw myit hkrum myit ra ginlung ai kun dinghku byin tai lu na rai nga ai.Bai nna anhte nkau mi gaw tinang nlu su tim sut su ai ningrum hte kun dinghku de ai ni nga ai zawn tinang zawn sha nlu su ai hte dinghku de ai ni mung anhte nga ga ai.Ja gumhpraw nhpring zup ai raitim rau sha shakut nna dinghku hpe gaw de sa wa ai ni mung anhte kun dinghku law law nga  na re.Langai a lata langai ngang ngang jum let mahkyit mahkut rai ruk yak jamjau lam ni hpe lai di ra na ga ai.Nga ai hte sha jai lang ra ai ten ni hta langai hte langai myit tau chye ya ai hte garan kachyan ya ai myit sha, mayak mahkak lapran kaw shada da tawn da ai tsawra shawang myit hpe anhte bai mu yang gaw anhte madu jan madu wa lahkawng mung myit dik myit pyaw lu na rai nga ai.

                Anhte madu jan madu wa shada da kun dinghku nnan de ai shaloi ningrum ningtau jan,ningrum ningtau wa  hpe gara hku galaw ya na gara hku tawn da mayu ai ngu ai shada shingran yup mang ni tsawra shawang myit hpring tup hte tsun hkat na ga ai.Anhte Prat hta myit pyaw lam myit dik lam ni hte hkrum wa ai ten langai hte langai n gun jaw hkat let aung dang lam hpe gam garan jai lai wa ra nga  ga ai.Bai nna anhte a prat hta hkret sum ai lam hpe hkrum wa yang langai hte langai grau grau nna tau chye na ya hkat let n gataw galau wa hkra n gun jaw hkat nga ra ai.Anhte kun dinghku hta madu jan madu wa ni ngu ai gaw langai ngai gataw galau wa yang lahkawng yan galau gataw hkrum ai sha rai nga ai.

               Dai majaw shada da pawn ba shamyat shanat nga ra ga ai re.Anhte a prat hta ja gumhpraw nlu nnga ai ten,nhprinem ai ten hta madu jan madu wa grau grau nna alum ala tsawra shawang myit hpring zup hte kanzawn mazum hkawm sa na grai ahkyak nga ai.Bai prat hta da kan ra ai hte hkrum wa ai ten prat a tsin yam hpe hkrum wa ai ten langai hte langai grau nna kam hpa shamyat shanat hkat na mung ahkyak nga ai.Dai zawn rai langai hte langai a ntsa tawn da ai tsawra shawang myit sha grau kaja myit pyaw ai lam hpe lu shangun nga ai.Dai myit dik myit pyaw lam sha yawng mayawng hpe hkrum kaduk lai lu ai atsam,mayak mahkak lam ni hpe lai di lu ai n gun atsam byin wa nga ai re.

             Tsawra ai kun dinghku kanu kawa ni dai hku nre ai sha langai hte langai Na a mara nye a mara nga mara shagun hkat nga ai.Madu jan madu wa shada shi hpe ngai yu gawn lanu lahku ra ai ten ngai hpe shi lanu lahku ai lam nnga ai dai hku sha nga kau na,ja gumhpraw nnga ai majaw ninggyet ga law hkat nga ai rai yang,Prat ai ruk yak jam jau lam ni hkrum kadup wa ai ten langai hte langai sat hkat na daram rai nju ndawng ai rai yang gaw anhte kun dinghku hta langai hte langai tsan gang hkat wa na sha rai nga ai.Dai re majaw tsawra ai kun dinghku kanu kawa ni e anhte kun dinghku gaw alum ala rai ngwi pyaw ai dinghku langai byin tai lu na matu gaw kawa langai hkrai,kanu langai hkrai a lit nga ai nre kun dinghku nta masha yawng hta lit nga ai re majaw shada da langai hte langai tau chye na ya ai pawn ba shamyat shanat hkawm sa let anhte kun dinghku gaw ngwi pyaw lu myit dik lu hkra hkawm sa nga ga law.    

By; John Mung Hkrang