Prat Majan Man-ap Hkrum ( Ramma Lamang )

“ Prat ngu ai gaw, Majan” “ Prat ngu ai gaw, dakan malan ai’’ “ Prat ngu ai gaw,yak hkak jam jau ai ” nga nna, anhte shyinggyim masha ni tsun chye nga ga ai, prat ngu ai gaw, kaja wa mung yak nga ai. Dai yak ai ngu ai sak prat hpe man-ap hkrum lu na matu, nang hpa ni hkyen lajang da sai kun, yak ai ngu chye ai prat hpe man-ap hkrum na matu, lak nak nlawm yang gaw anhte ni hkrat sum mat na teng na daram rai nga ai, dai majaw lak nak langai shakap ra na re ngu shadum n gun jaw mayu ai.

Mang hkang mayak ni ngu ai gaw, myit yawn hpa ni, ra kadawn ai myit hkam sha lam ni, pawt sin dawng ai lam ni,myit tsang ai lam ni, myit malai lu ai lam ni ngu zawn re myit machyi ai lam ni gaw, anhte a prat hta shang wa nna, myit hpe nchyi nmu byim shangun nga ai, teng ai lam langai gaw, mang hkang ni hte lawt ai wa langai mung nnga na shadu ai, dai hta tsawra ai ramma ni, kaja wa nga yang mang hkang ni gaw, anhte a prat hpe machyi shangun ai nrai nga ai, mang hkang hpe hpang ai hkrang gaw, anhte a prat hpe machyi shangun ai lam rai nga ai, grau nna machyi shangun ai gaw, tinang a myit masa rai nga ai, sak prat hta mang hkang ngu nnga ra ai, mayak ngu ai gaw nmai nga ai lam ngu ai myit hkam la ai lam gaw, grau nna hkra machyi wa shangun nga ai re, sak prat ngu ai gaw, pri pri nem nem hte sha masan sa gring nga ai ngu ai myit mada lam tawn da ai lam gaw, grau machyi wa shangun ai, dai majaw ndai yak hkak ai sak prat hpe tawt lai lu na matu lam yan nkau mi hte hpaji jaw mayu ai.

Shawng nnan lang da ra na lak nak gaw, sak prat hta mayak mahkak ngu ai gaw, nga nan nga ra ai, koi yen na nmai ng ai  lam hpe hkam la lu ai atsam rai nga ai. Dai atsam hpe lu na matu, kaji la ai ma prat ten kaw na hpang let shaman shakyang da na ra nga ai, ma ni a matu, Ra Kadawn lam nnga prat zawn gin shalat nmai nga ai, nkau ma ni nga yang mu mamu la mayu, nlu yang hkrap ai, ma hkrap yang gaw masha kaba ni gaw na maza nhkam ai majaw, ra ai hpe jaw dat ai, dai hku sha ma ni gaw, shanhte a prat hta hpa mung lu ai, yak ai ngu hpe nchye ai, akyang lawm wa nna sak ram wa ai ten ni hta mung, ra ai lam ni yawng nlu ai ngu ai hpe nlu hkap la mat ai, nkau nga yang ra ai lam hpe lu hkra la dan ai, byim mayu ai hpe byim hkra galaw dan na ngu ai lam hte n galaw gring ai lam ni galaw chye nga ai, hpang jahtum gaw, tinang a sak prat hpe dang hkra nlu hkang let, nbyim gring ai ni byim mat ai, dai majaw, ma prat ten kaw na ra ai shagu nlu ai ngu ai hpe chye hkra shaman ya ra ai, masha kaba byim sai ni mung ndai lam ni hpe sharin hka ja na ra nga ai, anhte ni ra kadawn ai daram, sak prat gaw jahpring ya na nrai nga ai

Ra kadawn ai lam nlu,byim mayu ai nbyim yang myit machyi wa ra ai, raitim sak prat hta byim mayu shagu nbyim ai ra ai daram nlu ai lam anhte ni hkap la chye ra ai, dai zawn hkam la chye yang, machyi ai lam ni, yak hkak ai lam ni ngu gaw, shadawn shadang langai du hkra yawm wa lu na rai nga ai.

Ndai zawn ra kadawn myit ra ai lam hpe hkam sharang lu ai atsam nga hkra gin shalat shaman shakyang ai ten ni hta, myit masa rip kawp tara ni mung grai nan ahkak shang lawm ai lam yan langai rai nga ai, kalang lang up hkang ai masha kaba ni a, shut ai lam ni a majaw, ma ni gaw, jaw ai myit masa marai ni nlu sharin hka ja la mat ai, dai majaw sak prat ngu ai gaw, masa lam amyu myu hte hkawm sa chye yang hkrun lam du ai ngu masat da chye ma ai.

Tsawra ai ramma ni masha langai hku sak hkrung hkawm sa ai lam gaw, myit dik chye na lam grai nan ahkyak la nga ai, sak prat hta hkrum kadup wa na, shinggan a mayak mahkak ni hpe nhkrum kadup shi yang, madu hkum madu shawng man – ap hkrum ra nga ai. Kadai mung gara shara kaw gara hkrang hte shinggyim byim mayu ai hpe lata na ahkang nnga nga ai, tinang shyinggyim byim lu ai sak prat shadawn shadang hpe, myit dik ai hte, hkap la sak hkrung ku na ra nga ai.ndai ga a lachyum gaw shakut na nra nga ai hpe tsun mayu ai nrai nga ai, madu hkum a masa lam hpe hkap la let, simsa ai hte sak hkrung sa chye ai myit masa hpe tsun mayu ai rai nga ai, grau nna Ramma ni a matu, madu a hkum hkrang gawng shingyan hpe hkap la chye na grai nan ra ahkayk nga ai, tinang a kun dinghku gaw, matsan ai ratitim, myit dik chye na ra nga ai, laga ni hta nga ai lam ni ngai hta nnga ra ai i ngu ai myit sawn lam ni gaw, sak prat hpe grau yak hkak jam jau shangun nga ai

Shingra tara ni gaw, dan dan leng leng nrai ai sha, nmyit mada ai ten hta, anhte a sak prat hta shang wa chye nga ai, dai mayak ni hpe man – ap hkrum na matu, ahkak ai lam gaw, myit masa ngang kang ai lam rai nga ai, anhte ni yawng dai myit masa hpe gin shalat galai shai yang pri nem ai sak prat hpe lu madu wa lu na rai nga ai ngu

#youth

#rvakachinservice