Ntsa De Mada Yu Ai Tsu Wa Yang, Npu De Gum Yu Dat U! ( Youth program )

Ntsa De Mada Yu Ai Tsu Wa Yang, Npu De Gum Yu Dat U!

          Mawdaw tsawm tsawm re ai ni, nta kaja tsawm tsawm re ai ni, phone kaja dik ai ni lang nga ai ni hpe yu nna, myit kaji nga taw nga ai kun? grai smart nga ai wa nbyin na myit kaji nga ai kun?, nta kaw Sky Net sha pyi nnga na, myit ru taw nga ai kun? dai nga yang gaw nang ntsa de yu mada ai grai law nga sai re.

Nang a shata shabrai sen mi jan sha lu na nang myit ru nga ai ten, dai na de shana shat sha na nnga na myit ru nga ai ni nga nga ai re, nang IPHONE nlu lang nna, myit ru nga ai ten ni hta, keypad phone langai pi nlu lang nna, myit kaji nga ai ni nga nga ai dai zawn, nang myi ntsawm nna, jam na hta yu shagu myit ru nga ai ten, dai jam na hpe mu na ahkang pi nlu nga ai ni nga nga ai

Nang masha shawng kaw lagaw lata hkum hkum hte hkawm sa lu nga ai ten, masha shawng de si na ram hkrit nga ai, nhkum tsup ai ni nga nga ai, nang dai ni sak hkrung nga taw tim, second shagu hta masha nkau si sum nga ma ai re, nang grai kam kaja nga ai, lahta de yu mada ngut nna, grai myit ru nga ai ten, npu de gum yu dat u, matsan maya re ai ni, garum ra ai ni law law nang na npu hta nga nga ai, galoi mung gum yu nna, lagawn taw na matu tsun ai nrai nga ai, lawhpa ai lam ni hte ga up wa ai ten, pyaw hpa lam ni mat mat wa chye ai majaw sadi jaw mayu ai lam rai nga ai.

Bai nang gaw hpun langai nrai nga ai, tsawra ai ramma ni na hkum nang hpun langai re ngu myit sawn yu ga ai kun?, shara mi kaw sha prat ting nga ra nna, gara hku mung htawt sit nmai ai hpun langai zawn, masha ni galaw ai lam shagu hpe hkam ra ai prat gaw kadaw daram sawng nga ai re hpa, raitimung nang kam kaja nga ai nye prat gaw sawng dik ai law ngu tsun tim, nang hpa ni n gun shadat taw nga ai kun dai hpe myit dum mai nga ai.

Sawng dik ai prawt ndai ga hkaw gaw na ga yu ai ga rai nga ai, ngai mung tsun ga yu ai ga si re raitimung ntsun ga mat ai shaning she gu mat sai rai nga ai, anhte shinggyim masha ni gaw, dai ga si hpe tsun ma ai, dai ga kaw na lawt lu hkra hpa ni galaw nga sai kun ngu yang, lagawn nga dingyang sha rai nga ai, ngai mung dai zawn byim yu ga ai sha rai nga ai raitim, dai ga hpa na ntsun mat sai i nga yang, gaya ai majaw rai nga ai, hpa mung ngalaw nga na gaw, sawng dik ai sak prat ngu tsun taw nga ai gaw, ram ram na lahta de, lachyum nrawng nga ai hpe chye ai majaw rai nga ai Ya tatut hta, hpa n galaw nna htawm hpang prat tsawm htap mayu ai nga wa gaw, hpa hte bung ai i nga yang, hpra hkrang pan nka ai sha, myi hte sha hkrang shapraw nga ai wa hte bung nga ai, shi lata hte shakut shakat hte myi maju jung le, hkrang pan ka na shingna lang nna nka taw nga ai, raitimung bawnu kata hta gaw, hkran pan langai tsawm tsawm re ra sharawng nga ai, nang myit sawn nga ai shara kaw na hprang wa ai ten gaw hpang hkrat taw nga sai, shai hkrang hpan mung hpa hkrang nshapraw shi nga ai hpe kajawng kaja mu na rai nga ai, kaja wa sha htawng hpang prawt tsawm htap mayu ai ni gaw ten shagu hta shakut shaja nga ga ai, htawm hpang prat ngu ai gaw, ya na aten hte gumhpawn da ai htingnu langai re ai lam chye nga ai, dai majaw shi ya na aten hpe hkungga ai, myit maju jung ai, ya na ten ni byawng nna lai sai ten na lam de galai shai mat yang, nang a htawm hpang de du wa mat na rai nga ai, dai majaw lai sai ten na  mabyin ni tsawm tsawm re hpe bai lu yu na matu gaw, ya na aten hpe hkrang shapraw tsawm ra nga ai

Dai majaw tinang du nga ai shara hta, nra sharawng shagu myit kaji ai myit hte shani shagu tawt lai nra nga ai, tinang ra sharawng ai shara de du hkra sa na nga yang, ngang gring ai daw dan ai lam ni hte nang a nhtoi ni hpe tawt lai dat u, shakut shaja ai lam ni hte shani shagu tawat lai hkawm sa u, dai rai yang nang a yup mang shingran ni  lani hte lani ni htep wa nna, awng dang ai sak prat hpe teng sha lu madu wa na rai nga ai ngu  shadum ya dat lu nngai .

#youth

#rvakachinservice