Nnan Galaw Hpang Ai Ten Yak Ai Lam Gaw Nga Chye Ai

Nnan hpang ai ten yak ai ngu lam nga chye ga ai, dai ten myit hkum daw mat, hpa hpe mi galaw galaw nnan daw gaw yak ai lam teng nga ai, dai ni she bungli shang hpang ai zawn re ni, tinang myit shang sha ai lam ni hpe ya she galaw chyam yu ai zawn, tinang nchye shi ai gaiwang kata de sa ra ai ten ni zawn re ni, bai ya she nnan galaw hpang ra na lam ni hpe galaw ai ten, myit gum htawn hpa byim chye ai zawn, mau mau hkre hkre mung byim chye nga ai lam shanwg nnan tsun mayu ai

Galaw sa wa let, hku hkau kung kyang mat wa ai ten, gau ngwi ngwi loi wa na ra ai, dai majaw dai zawn mayak ni hpe hkam jan lu na atsam ahkyak nga ai mai byim yang gaw, tinang myit shang sha ai magam hpe sha galaw u, dai zawn myit lawm ai hpe galaw ai ten, mayak ni hte hkrum wa ai shaloi dang manga tawt lai lu ai atsam ningja ni paw pru wa na ra ai, raitimung, kalang lang mabyim masa a majaw, nkam galaw tim, galaw ra ai ten ni lawm wa chye ga ai, dai zawn ten ni hpe ngang ngang kang kang  hkam jan lu na ra nga ga ai re,

Ndai shara kaw tsawra ai ramma ni hpe langai matsing da shangun mayu ai lam gaw, sak prat hta myit nlawm ai bungli ni hpe galaw ra ai ten shagu galoi mung matsing bang da ra na gaw, “ Sak Prat hta galaw mayu ai lam raitim, nkam galaw ai lam raitim, hpa mi galaw ra galaw ra, mai kaja dik ai hku galaw u “ ndai hpe matsing dawk bang da let, shakut sa ai re yang, nmyit mada awng dang lam ni byim pru wa na rai nga ai,

Htawm hpang lai wa sai ten ni hpe bai nhtang sumru wa ai ten, myit malai nlu hkra nang galaw dat u ngu n gun jaw mayu ai, dai hku rai yang, yawm htum, mahkrum madup ni lu na rai nga ai sha nnga, dai mahkrum madup ngu ai gaw, gumhpraw hte mari la nlu ai lam hte, aten ni hpe ap nawng nna she lu la ai lam yan ni rai nga ai ngu, dai majaw ya ten hta tsawra ai ramma ni nang galaw taw nga ai hpa magam hpe mi raitim, mai kaja dik ai hku galaw shakut u ngu tsun shadum mayu ai

Matut nna mung lu su ngwi pyaw hkra nga mayu yang gaw ngu ai lam hpe bai jahta dan mayu ai.. dai zawn nga mayu ai rai yang, lu su na matu bungli galaw ai nga tim, sak prat ting hta, bungli ngut na bungli sha nga yang, kaja wa ajin aban rai na zawn rai nga ai, kaja wa hkrak tup sak hkrung let, tsa shadang hpring hpring nga sa mayu ai, ja gumhpraw mung tsang shara nnga hte, sim sa ai sak prat hpe lu madu mayu ai nga yang, ya kaw na lawu de tsun dan wa na akyang lailen nkau mi hpe tinang hta gaw sharawt da na ra nga ga ai dai lam ni gaw

1.Jaw kaja ai magam bungli hpe tam u....Jaw kaja ai magam bungli ngu ai hta, tinang myit lawm ai bungli, ndai bungli galaw ai hpe ra sharawng nna, manu shadan da ai bungli hpe galaw lu na ra ahkyak ai kaw lawm nga ai. Tinang nra ai bungli langai hpe myi di chyip galaw taw nga yang myit pyaw lu na nrai nga ai, npyaw ai wa gaw, nlu su nga ai, ndai bungli hpe galaw sai nga yang, npawt kaw na lahta tsang de sa na ra nga ai, ndai magam dap hta ndai bungli hte seng nna hka ja ra ai lam ni, lu la ra ai lam ni, mahkrum madup hte hpaji ni nnga mat sai ngu aiten, grau nna, dam lada ai magam dap langai de gum htawn nna, tinang hkrai tinang shatsaw la dat u, ndai lam yan hte tinang a shara hta hkan nna manu ni, tsaw tsaw wa ai sha n ga, shara amyu myu kaw na lu la ai, hpaji ni a majaw, shinggyim sak prat hta, grau nna, kung hpan wa lu na rai nga ai, langai nga ai gaw, bungli nnan htawt sana nga yang, shata shabrai langai hpe sha nmai yu nga ai, ndai magam dap kaw na, ngai kade ram rawt jat wa lu shangun ai ahkaw ahkang ni nga na, ndai magam dap gaw nye atsam ningja hte  ngai sharawng ai mada de lam hpaw ya lu na kun ngu hpe mung yu na ra kadawn nga ai, dai rai yang sha tinang a atsam marai ni tsaw wa lu na rai nna, dai ja gumhpraw ngu ai wa mung kalang ta lawm wa lu na rai nga ai

2.Jai Lang ai lam shayawm u.... Lu su na matu nga nna shakut nga ai ni hta law malawng mu lu ai mang hkang langai gaw, lu ai gumhpraw hta, jai shama ai lam law nga ai lam rai nga ai, sak prat hta, lu su na matu, loi ai ladat tsun ga nga yang, tinang ra ai hta grau njai shama ai sha nga chye ai rai yang, lu su wa na teng sha rai nga ai ndai zawn jai lang ai lam shayawm wa lu na matu, jahpan chyarang hte shang ai le ai jahpan hpe galaw let jai lang chye na ra ahkayk ai kaw lawm nga ai

3.Gumhpraw mahkawng u.... Gumhpraw gaw ya na zawn mahkawng chye ai akyang nga ai ni hta, na na nga chye ai da, dai majaw gumhpraw mahkawng na matu myit shajin da u, htawm hpang hta ngai hpa byim mayu ai ngu na myit shingran let mahkawng chye u, hpang jahtum bungli hkring nna nga ra ai ten, nye sumpu hta gumhpraw kade mahkawng da  ngut sai  ngu nna, myit daw dan da dat u, sumpu hta gumhpraw nga ai wa gaw, lu su nga pyaw na matu, law law ni wa ai masha rai nga ai hpe shadum mayu ai. Bai langai gaw gumhpraw tam ai lam, gumhpraw mahkawng ai lam sha n ga, ndai gumhpraw hpe atsawm jai lang akyu jashawn chye na mung bai ra ahkyak nga ai. Nkau lu su sahte ni gaw, gumhpraw mahkawng nna, lu su ai ni hkrai nrai nga ai, ndai mahkawng da ai gumhpraw ni hpe,  jaw jaw ang ang  arang bang let, grau grau law htam lu su wa ia ni rai nga ai,

Jahtum hku nna tsun mayu ai gaw, Lu su na matu sha n ga, pyaw ai sak prat lu mayu yang, myit malai lu na zawn re ai sari hpoi ai magam lam ni hpe n galaw hkrup na ra nga ai, dingtawk lam hkan ai masha ni hpe myit n gun hkum lu, shanhte a myit mlai lu ai lam gaw, shanhte lu da ai sut gan ni hta grau law nga ai hpe myit dum u, Sak prat hta ja gumhpraw maga mung, sari sadang maga mung lu su taw nga lu na matu, jaw ai lam maga de  hkawm sa let, su gan ni hpe tam mahkawng u, ten shgu mi hta, lahkawm htawat dat shagu nang galoi hkrak sum mat lu na nrai nga ai ngu.

#youth

#rvakachinservice