Nkaja Ai Sali Wunli N jaw Hkrup Hkra Shakut Ra Ai

Tsawra hkungga ai  kun dinghku kanu kawa ni anhte sali wunli ngu ai gaw ja gumhpraw,manu dan ai nhprang sut,arung arai ni sha nrai nga ai.Kanu kawa a sari sadang mung kashu kasha ni a matu arawng la hpa shing nrai kaya hpa myit kaji shangun hpa  ni mung sali wunli rai nga ai.Anhte hpaji hparat gaw sali wunli ngu tsun lu ai zawn kanu kawa ni ginlen ya ai kyang lailen kaja ni hte ningmu kaja ni mung sali wunli ni rai nga ai.

Anhte kanu kawa ni gaw kashu kasha ni hpe kaja ai lai kyang ni hte bau maka nga let tinang a myit tsampu lam ni hte rau hkrit tsang ni a majaw shut ai ningmu ni hte ma ni a myit hpe hkret nem shangun ai  nkaja ai wunli ni hpe jaw chye ga ai.

Anhte makau grup ying hta n tara ai lam hpe nmai hkap la ai, nmai hkam ai ngu sharin ya na malai n tara ai lam hpe baw gum hkam sharang ra ai ngu sharin hkrup jang kashu kasha ni gaw prat tup masha kaga ni roi rip dang sha ai prat kaw nlawt lu mat na re.Dai hku galaw dat ai kanu kawa ni gaw shanhte a kashu kasha ni a myit kraw kata hta hkrit tsang ai lam hpe bang dat ya ai hte bung nna n kaja ai sali wunli jaw bang ya ai hte bung nga ai.

Loi dik hku tsun ga nga yang gaw makau grup yin hta n tara ai lam hpe baw gum hkam sharang let prat tup masha ni roi rip dang sha ai prat hta nga taw nga ai ni gaw shanhte a kanu kawa ni jaw da ai nkaja ai sali wunli a akyu ara ni rai nga ai.

Anhte Myanmar mungdan hta anhte yawng roi rip dang sha ai hpe hkam sha ra nga ai gaw anhte a prat ban langai hte lahkawng a hkrit tsang ai baw gum nga ai majaw rai nga ai.Anhte mahkrup madup hte tsun ga nga yang ban langai hte ban lahkawng kaw na kashu kasha ni gaw shanglawt ai myit jasat ningmu hte ntara ai hpe nhkap la lu ai ma ni hpe hkang zing na matu shakut nga ai gaw tinang  myit masin kata hkring ai tara hpe kashu kasha ni a kraw kata de du hkra bang da ya ai zawn byin chye nga ai.Anhte masha langai gaw hkrit mat jang gaw hpa hpe mung nlu galaw mat sai rai nga ai.Hpa mung nbyin wa na rai nga ai.

Hpang jahtum hkrit ai myit gaw myit kaji ai hte tinang a lam hpe tinang hkum nan pyi nlu dawdan lu mat na rai nga ai.Lam shagu hta tinang hkum tinang pyi nkam hpa gwi ai ni ndaw dan lu ai ni hku nna asak hkrung nga ra ai gaw hkrit ai lam ni a majaw rai nga ai.

Dai ni asak 70 ning jan 80 ning gaw Hpyen dap asuya prat hta lai di lai wa nna gumshen hpyen dap asuya prat hta grai dakan malan ra ai langai ngu na prat ban ni rai nga ai.Bai nna dai ni asak40 ning jan 50 ning lapran ni gaw Hpyen dap asuya a lang htak hta masha ngu chye myit wa ai kaw nna hkrit ai myit ni hte sak hkrung nga ai ni rai nga ai.Ndai masha ni a myit kraw kata hta anhte a kashu kasha ni a prat hta anhte zawn nbyin hkra ngu ai myit masa ni anhte hkum shagu hta nga ai ni rai nga ai.Hpyen dap asuya prat hta bai ninghtang tsun ya rim adup zingri bawngdung ra na hpe hkrit ai majaw myit ndik ai lam ni hpe raitim n gup kaw nna hkum tsun sa,sat lawat lai nsam hte pyi nmadun gwin nga ai.Ntara ai lam hpe bawgum hkam nna lam shagu hpe asum jaw lai wa ra ga ai.Tinang a shawng hta ntara ai hku galaw taw nga ai hpe mu tim hkrit ai hte bawgum nna nchye masu ai hku nna hkrit ra nga ai.

Anhte gaw hkrit ai lam ni hte ka up tawn ai hpe shingla gasat lu na matu grai yak hkak nga lai wa sai.Kaja wa nga yang lak nak langa ai ni jai lang nga ai maju pala gaw hkrit ai tara rai nga ai.Masha ni hkrit hkra jahkrit nna up hkang ai ngu ai kaw nna gaw hkrit yang she shanhte galaw mayu ai hpe galaw lu ai ngu ai lam rai nga ai.Dai hpe anhte shawng na prat ban hta chye nga ninglen hkrit nga ra ga ai.Bai ya na lahkawng ngu na prat ban rai nga ai anhte ni gaw hkrit ai lam nnga ai kun ngu yang nga nga ga ai.Raitim mung ban masum ngu na anhte kashu kasha ni hpe anhte zawn jahkrit ni,a ngawk ai ni,roi rip dang sha ai prat hku nbyin shangun nga ga ai.

Anhte gaw mai byin yang gara ma ni hpe mung jaw kaja ai hpe sha tsun shangun mayu ai.Ntara ai hpe bawgum hkam sharang hkap la ra ai ngu n sharin yang kaja nga ai.Hpa majaw nga yang anhte zawn nbyin shangun mayu ai.Anhte gaw hkrit ai myit ni hte sak hkrung  ra ai si taw nga ai masha a prat zawn anhte a kashu kasha ni hpe nbyin shangun mayu ai.Dai re majaw anhte a hkrit ai myit hpe kashu kasha ni prat de du hkra n kaja ai lam hpe  ginlen njaw hkrup hkra sadi ra ga ai.

Tinang a hkrit ai tara hte tsampu ai myit ni gaw anhte amyu hte mungdan tinang a hpang na prat ban ni a matu n kaja ai sali wunli nbyin hkra galaw yang kaja nga ai.Anhte kashu kasha ni hpe tinang hkum tinang kam manoi lu ai ramma ni byin tai wa lu hkra bau maka pawnba ra nga ga ai.

Ntara ai hpe nhkap la lu ai zawn tinang hkum nan mung n galaw ai sha kaja ai masha ni byin wa hkra bau maka ra nga ai.Anhte kashu kasha ni gaw kanu kawa hta grau nna ningtawn ai ni grau nna kaja ai prat hpe lu ai ni byin hkra bau maka ra nga ai.Shanhte gaw anhte hta grau hkrit chye nna grau nna grit nem ai ni grau angwak ai prat ban ni nbyin hkra grai sadi let bau maka gring nga ai.Dai hku nna bau makaw pawnba lu na matu anhte kanu kawa ni hkum nang mung tinang ai kashu kasha ni hpe byin shangun mayu ai zawn hkan nga lu yang kaja nga ai.

Hpaji lam ni hpe numnak da ai kanu kawa ni a kashu kasha ni gaw hpaji lam hpe numnank da ahkyak da na sha rai nga ai.Arawn alai hpe numnak da ai kanu kawa ni a kashu kasha ni gaw  arawn alai hpe numnak da ai ni law nga ai.Tinggyeng lam nmyit ai sha masha law law a matu myit ai chye ai kanu kawa ni a kasha ni mung tinggyeng tam ai masha nbyin wa nga ai.Dai zawn tinang a kashu kasha ni hpe jaw kaja ai ladat hte bau maka lu hkra anhte kanu kawa ni mung tengman ai myit masa ni hte tinang hkum nan shaman nga sa let anhte kashu kasha ni hpe kaja ai sali wunli jaw lu hkra shakut nga ga law.